Geskiedenis

Op 13 November 1963 is ’n belangrike vergadering by die Baptiste Seminarium in Kemptonpark gehou. By hierdie vergadering het ds. Wessel (W.J.) Venter van
Primrose Baptistekerk die Baptiste van Kemptonpark meegedeel dat sy gemeenteraad dit sou goedkeur as ’n ABK-werk in Kemptonpark begin word. Hierdie voorgestelde werk sou vir ’n proeftydperk van drie maande uitgetoets word voor ’n finale besluit oor afstigting van Primrose geneem sou word.

J.W. Albertse wat destyds ’n tweedejaar student was by die Seminarium, is gevra om Sondag eredienste en bidure waar te neem tydens die somervakansie. Die leiding van die gemeente is waargeneem deur ’n komitee wat alle sake sou hanteer: J. Grové (tesourier), F. van Vuuren (sekretaris) en mnre. Botha en Bothma. Dienste is gehou in een van die Seminarium se klaskamers.

Na afloop van die drie maandelange proeftydperk, is besluit dat die werk op Kemptonpark ’n takgemeente van Primrose sou word. Daar was 20 ingeskrewe lidmate. Die eerste persoon wat beroep is tot predikant van die nuwe werk, A.J. Erasmus, het die beroep bedank.

Daar is op ’n volgende vergadering besluit dat die gemeente van die moedergemeente, Primrose sou afstig. Op 17 Mei 1964 het die Afrikaanse Baptistekerk Kemtponpark gestig met twintig lidmate op die register. Die nuwe gemeente het dr. J.D. Odendaal aangestel om reëlings te tref vir eredienste.

Op 25 Junie 1964 beroep hulle vir J.W. Albertse (toe in sy derdejaar by die Seminarium) as predikant.

Aanvanklik het die gemeente aansoek gedoen om ’n deel van die Seminariumgronde te koop om ’n kerk te bou. Die aansoek is van die hand gewys. In April 1965 is drie standplase in Commissionerstraat, oorkant Kreft Laerskool, gekoop vir die som van R4200-00. Die gemeente het ’n lening hiervoor gekry by die SA Permanente Bouvereniging.

Gedurende Maart 1966 is toestemming verleen vir die gebruik van die skoolsaal van Laerskool Kreft vir eredienste en bidure. Die skool het van die klaskamers beskikbaar gestel vir die Sondagskool.

Op 31 Januarie 1975 is die kerkgebou van die Afrikaanse Baptistekerk Kemptonpark in gebruik geneem. Ds. I.H. duP van der Walt het die deure amptelik vir die geleentheid oopgeluit.

Die Baptistekerk Kemtponpark is binne die bestek van 50 jaar bedien deur 10 predikante: J.W. Albertse, J.H.G. Raubenheimer, I.H. duP van der Walt, F.J. Pelser, W.J. Venter (ds. Venter is nie amptelik deur die gemeente beroep nie), C.J. Fourie, J.J. van der Hoven, Stephen Coertze, J.P. du Preez en I.E.J. Jefferies.