Jou oupa se God

Grandfather's God

Ek bedoel nie dat almal se oupas die Here gedien het nie. Ek probeer eerder om die moderne sentimentele god met die God van jou oupa se tyd te kontrasteer. Die god van ons dag kan net iets doen as ons ‘lewe spreek’ of vir Hom toestemming gee. Maar in jou oupa se tyd was die mens niks sonder Here nie en kon ons niks doen nie. God was soewerein en het gedoen wat Hy wou.

Ek glo nie dieselfde as John Wesley oor die uitverkiesing nie. Maar Wesley se hoë siening van God maak dat mense in my kamp (Calviniste) respek het vir hom. Spurgeon het bv. gesê dat as twee apostels by die groep gevoeg moes word, John Wesley ongetwyfeld een van hulle sou wees [Randy Alcorn, hand in Hand (Colorado Springs: Multnomah Books, 2014), 189-190]. Volgens Iain Murray kan ons baie by John Wesley leer. [Iain Murray, The Old Evangelicalism (Edinburgh: The Banner of Truth Trust, 2005), 135-165. Sien ook Wesley and the Men who Followed (Edinburgh: The Banner of Truth Trust, 2003) deur dieselfde outeur]. T.s.v. die verskille tussen hulle, was George Whitefield en John Wesley goeie vriende.

Calviniste en Arminiane verskil al vir eeue, maar beide groepe het respek vir mense soos D.L. Moody, Charles Spurgeon en A.W. Tozer. Hoekom is dit so? Dit is omdat hierdie mense, t.s.v. hulle teologiese verskille, die Here liefgehad het en ‘n hoë siening van Hom gehad het. Dit is wat ek bedoel met ‘jou oupa se God’. Ek praat van die God van Jes. 46:8-13.

 

  1. Die enigste God (v.8-9)

Ek het onlangs van ‘n kerk gehoor waar die ds. soos volg gebid het: ‘Ons moeder wat in die hemel is…’ Toe iemand daarop reageer, toe sê die kerk: ‘Elkeen moet doen soos hy gemaklik voel.’ Maar dit is postmodernisme, waarin elkeen vir hom- of haarself kan kies wat waar is. Daar bestaan dus nie so iets soos absolute waarheid nie.

As ons ‘n stap verder gaan kom ons by godsdienstige pluralisme, waarin alle paaie na die hemel toe lei (in teenstelling met Joh. 14:6, Hand. 4:12). Hierdie mense sal sê: ‘As Islam of die voorvader geeste vir jou werk, is dit so goed soos Jesus en die godsdiens van Bybel.’

Jesaja verskil. Israel moes weet en verstaan dat die afgode dood is (v.1-2, 6-7). Die God van die Bybel is uniek en die enigste God (v.5, 8-9, hfst. 45, Deut. 6:4, 1Kor. 8:4-6). Israel moes in hierdie waarheid vasstaan en nie wankel nie (v.8).

Hulle moes hulleself aan God en sy werke in die verlede herinner: die tien plae, die Rooi See, sy voorsiening in die woestyn, die Tien Gebooie, die tabernakel, die Jordaan rivier, die Beloofde Land, die Rigters, die konings, die profete, ens. (v.8-9). Deur dit te doen sou hulle nie na ander gode toe draai en teen die Here oortree nie (v.8).

Jy moet dieselfde doen en aan die Here se werke in jou lewe dink: jou redding, God se antwoorde op gebed, sy ingrype in krisisse, ens. Dink aan sy werk in jou gesin, die gemeente en die kerkgeskiedenis. Dit sal jou help met die probleme wat jy tans beleef, asook met die probleme wat jy in die toekoms gaan teëkom (2Kor. 1:10).

 

His love, in time past,

Forbids me to think

He’ll leave me at last

In trouble to sink

-John Newton-

  1. Die soewereine God (v.10-11)

Ek was op ‘n kamp waar die spreker gesê het dat hy vir ons gaan bid om in tale te praat. Hy het Luk. 11:13 gebruik om sy praktyk te regverdig: “hoeveel te meer sal die hemelse Vader die Heilige Gees gee aan die wat Hom bid?”

Maar die vers gaan nie eers oor die gawe van tale nie. Ons maak soms met die Bybel soos wat Snoopy en Charlie Brown met hulle legkaart toe hulle daarop spring om te maak dat die stukke pas: ons verdraai tekste, sodat dit by ons teologie pas.

Sê asb. vir my as ek Jes. 46 en ander Bybeltekste verdraai. Maar as ek dit nie verdraai nie moet jy jou aan die Skrif onderwerp (al stem my interpretasie nie ooreen met wat jy voorheen geglo het nie).

Anders as die gode van silwer en goud, kondig die Here die einde aan van die begin af, van ouds af, van die ewige verlede af (v.10, 41:22-23). Hy spreek van dinge wat nie bestaan nie nog voordat dit gebeur. Hy praat nie net nie, maar doen. Hy het bv. volgens sy raadsplan vir Kores soos ‘n arend uit die ooste geroep om vir Babilon te vang en Israel vry te laat (v.10-11, 44:28, 45:1-4, 13, Eseg. 17).

Daar bestaan dus nie so iets soos blinde geluk of toeval nie. Die outeur van The Secret (Rhonda Byrne) laat dit klink of die heelal alles bepaal. Party Christene leef asof die duiwel alle lyding veroorsaak. Ander dink weer dat ons vrye wil alles bepaal. Hulle sê dat God vooruit gesien het wat ons sal kies en dat Hy daarby inpas.

Maar volgens v.10 en die res van die Bybel sal God se raad vasstaan en doen Hy wat Hy wil (Ps. 115:3). Geen mens, duiwel of iets anders kan sy planne keer nie. Hy maak nie ‘n plan B nie. Hy herbereken nie soos jou GPS nie. As Hy iets wil doen voer Hy dit uit (v.10, 14:24, 27, Job 42:2, Dan. 4:35).

 

[a] Hy beheer die geskiedenis (v.11, Jes. 45, Luk. 2:1-7).

[b] Hy besluit wat met die nasies gebeur, waar hulle bly en vir hoe lank hulle bestaan (Job 12:23, Ps. 33:10-11, Hand. 17:26).

[c] Hy stel konings aan en af, en beïnvloed hulle besluite (Spr. 21:1, Dan. 2:21).

[d] Hy bestuur alledaagse gebeure soos ‘n mossie wat op die grond val of ‘n haar wat van jou kop af val (Matt. 10:29-30).

[e] Hy beheer sg. geluk: ‘n swerfkoeël wat iemand tref of ‘n dobbelsteen wat op 3 val (1Kon. 22:23, 34, Spr. 16:33).

[f] Hy is soewerein oor elke skepsel (Ps. 135:6, Kol. 1:17, Heb. 1:3).

  • Hy besluit bv. waar beeste loop (1Sam. 6).
  • Hy het die vis, die wurm, die son en die plant in Jona beheer.
  • In Matt. 17 het Hy gemaak dat daar ‘n muntstuk in die vis se mond is.
  • In 1Kon. 17 het Hy die kraaie beveel om vir Elia kos te vat.
  • In 2Kon. 17 het Hy leeus gestuur om mense te vang, en in Dan. 6 het Hy die leeus verbied om vir Daniël te byt.
  • In 2Kon. 2 het Hy bere gestuur om rebelse kinders te verskeur.
  • In 2Kon. 9 het Hy honde gestuur om Isebel se lyk te eet.
  • Volgens Ps. 148:8 voer vuur, hael, sneeu, miswolke en stormwinde sy bevele uit.

[g] Hy is soewerein oor die moederskoot. Hy besluit of en wanneer ‘n vrou kinders kry of nie (Gen. 29:31, 30:2, 22, 1Sam. 1:6, 11, 20, 2:21).

[h] Hy bepaal die tyd en plek van jou geboorte, die detail van jou lewe, hoe lank jy lewe, asook hoe en wanneer jy doodgaan (Deut. 32:39, 1Sam. 2:6, Job 14:5, Ps. 139:16, Spr. 16:1, 9, 19:21, 20:24, Pred. 3:1-8, Jer 15:2-3, Jak. 4:13-15, Op. 1:18).

[i] Hy besluit wanneer jy siek of gesond is, en watse siekte jy kry (Eks. 4:11, Deut. 32:39).

[j] Hy besluit wie ryk en arm is (1Sam. 2:7).

[k] Hy stuur rampe oor ‘n stad, gebied of land (45:7, Eks. 7-12, Klaagl. 3:37-38, Amos 3:6).

[l] Hy is soewerein oor Satan en demone, sodat hulle nie kan doen wat hulle wil nie (Job 1:12, 2:6, Matt. 4:10-11, 8:31-32).

[m] Hy is soewerein oor alles (Ps. 103:19, Ef. 1:11, Rom. 11:36).

 

There’s not a sparrow or a worm

Overlooked in His decrees;

He raises monarchs to a throne,

Or sinks with equal ease.

-Isaac Watts-

Laat hierdie waarheid jou help en aan jou vrede gee in beproewing. Die Here het Kores beheer en hom vir Israel se beswil gestuur (v.10-11, 3-4).

Dit geld nie net vir Israel nie, maar vir almal wat Hom liefhet en volgens sy besluit geroep is (Rom. 8:28). Moet dan nie jou beproewings of die toekoms vrees nie, maar vertrou die Here. Moet ook nie bygelowig wees asof die uil op jou dak, die swart kat in jou erf, of die halsnoer om jou nek goeie of slegte geluk bring nie. Die Here beheer alles. Vertrou Hom en bid tot Hom.

God se soewereiniteit moet jou ook help om nie bitter te raak as iemand jou lelik kritiseer of sleg behandel nie. Selfs sonde is binne die Here se raadsplan. Jesus, Josef en Dawid het dit geweet en kon daarom hulle vyande vergewe (Gen. 45:5, 8, 50:15-21, Ps. 105:17, Hand. 2:23, Hand. 4:27-28, Luk. 23:34, 2Sam. 16:10-11, 19:18-23).

Maar maak dit nie dat God die outeur van sonde is nie? Nee. Randy Alcorn sê: ‘God isn’t the author of evil, but He is the author of a story that includes evil’ [Ibid., 43]. Vat bv. Shakespeare se toneel MacBeth. In die toneel vermoor MacBeth vir king Duncan. Het Shakespeare king Duncan se dood veroorsaak? Ja. Maar het Shakespeare king Duncan vermoor? Nee, MacBeth het [Wayne Grudem, Systematic Theology (Nottingham: Inter-Varsity Press, 1994, 2007), 322]. Net so speel sonde ‘n rol in God se plan, maar Hy is nie die Een wat sonde doen nie.

‘Maar as God alles bepaal is die mens ‘n robot,’ sê iemand. Dis nie waar nie. God se beheer en die mens se besluite is eerder soos man wat ‘n visbak van die sitkamer na die kombuis toe dra, terwyl die visse swem waar hulle wil. Die visse is onder die man se beheer, maar swem nog steeds waar hulle wil [Alcorn, Ibid., 178].

Net so sondig die ongelowige deur sy eie wil, maar voer hy terselfdertyd God se raadsplan uit. En as die gelowige kies wat goed is, maak God hom gewillig (Fil. 2:12-13).

God vervul sy raadsplan deur jou en my aksies. Ons kan dus nie passief terugsit en sê: ‘God sal sy planne uitvoer, of ek nou bid, besluite neem en ‘n aktiewe rol speel of nie.’ Die waarheid is eerder dat God jou beskerm deurdat jy jou traliehek sluit en jou sitplekgordel vasmaak [Ibid., 160].

Vermy daarom alle sonde. Neem besluite, bid, tree aktief op en doen wat God in die Bybel sê. Doen hierdie dinge al weet jy nie hoe God se soewereiniteit en die mens se verantwoordelikheid saamwerk nie. Los dit vir Hom om te verstaan.

 

  1. Die reddende God (v.12-13)

Hettie is in 1999 gebore. Die evangelie wat sy in die kerk hoor klink so: Jesus is lief vir jou en het vir jou gesterf. Hy het ‘n goeie plan vir jou lewe. Moenie sonde kies nie, maar gee jou hart vir Jesus en lewe vir Hom.

Hettie se oupa is in 1930 gebore. Die evangelie wat hy gehoor het klink so: A.g.v. die mens se sonde is sy hart hard en luister hy nie na God se wet nie (v.12). Ons is ver van God se geregtigheid af (v.12, Rom. 3:23).

God is genadig en het deur Jesus se lewe en kruisdood die geregtigheid voorsien wat ons nodig het om voor Hom te staan (v.13, 2Kor. 5:21). Ons ontvang hierdie geregtigheid deur die geloof (Rom. 1:17, Rom. 3:21-4:25, Fil. 3:9).

God verklaar ons regverdig, maar skryf ook die wet op ons harte en stel ons in staat om dit te doen. Sy geregtigheid is naby ons: op ons rekord en in ons harte (v.13, Rom. 10:5-10). Die Heilige Gees maak dat ons in realiteit regverdig word volgens die geregtigheid wat ons reeds in die hemel op ons rekords het. Ons lewe hierdie geregtigheid uit in die kerk waar die Heilige Gees ons lei om ons aan die Bybel te onderwerp.

Die evangelie wat Hettie hoor hang af en wag vir die sondaar om sy hart vir Jesus te gee. Die Bybelse evangelie wat Hettie se oupa gehoor het wag nie vir ons om iets te doen nie. God neem die iniasitief. Hy vertoef nie. Hy het bv. vir Kores gestuur om Israel te bevry (v.13). Dit was maar net ‘n voorskou van sy plan om die Messias te stuur om vir sy volk se sondes te sterf (Matt. 1:21).

Vra jy vir verlossing, maar die Here vat lank? Vra jy vir vergifnis, maar jy voel nie anders nie? God sal nie vertoef nie (v.13). Hy sal binnekort kom om jou te red. Is jy ‘n gelowige wat vra hoe lank die beproewing nog sal aanhou (Ps. 6:4)? Hoe lank sal dit voel of die Here my vergeet het en Homself vir my wegsteek (Ps. 13:2, 89:47)?

Hoe lank sal ek worstel en dit lyk of die vyand wen (Ps. 13:3, 35:17)? Hoe lank sal God stil wees en ons gebede onbeantwoord laat (Ps. 74:9, 80:5)? Hoe lank sal mense sy Naam laster en Hy hulle nie straf nie (Ps. 74:9-10)? Hoe lank sal Hy nog kwaad wees en ons tugtig (Ps. 79:5)? Hoe lank sal ons in ‘n wêreld lewe waar ons geliefdes sterf (Ps. 90:13)? Hoe lank sal goddelose mense God se kinders onderdruk (Ps. 94:3, 119:84)?

God sal nie meer lank vat nie, maar jou binnekort help (v.13, Luk. 18:7-8). Bid dat Hy gou sal terugkeer om ons uit hierdie wêreld te red: “Maranáta!” (1Kor. 16:22).

God het belowe om sy verlossing na Jerusalem of Sion toe te stuur (v.13). Hy het dit vervul toe Hy vir Kores stuur om Jerusalem te laat herbou (44:28, 45:13). Hy het dit finaal vervul deur Jesus wat in Jerusalem gesterf het, die Gees uitgestort het in Jerusalem en die evangelie laat versprei het vanuit Jerusalem. Dit is verder vervul in die kerk wat die Nuwe Jerusalem is, en die Nuwe Jerusalem wat uit die hemel sal neerdaal wanneer Jesus weer kom.

Die evangelie van Hettie se kerk laat haar nie aan God se verlossing in die ou- en Nuwe Jerusalem dink nie. Haar kerk fokus byna uitsluitlik op materiële voorspoed in die hier en nou. Haar godsdiens draai om die mens en is anders as haar oupa s’n.

Die evangelie wat haar oupa geglo het gaan nie oor wat ons vir die Here kan doen nie. Dit het eerder gegaan oor God wat sy volk verlos om sý heerlikheid te wys (v.13, Matt. 5:16, Rom. 8:18, Ef. 1:6, 12, 14, 2Tess. 1:10, 1Pet. 2:9, 12). Dit het alles oor Hom gegaan en nie oor die mens nie. Hettie se oupa het geglo dat ons maar net die bevoorregtes is wat God se heerlikheid kan sien en dit vir ewig geniet.

Vergeet van die hulpelose god van Hettie se kerk, die god van populêre outeurs vir wie alles oor die mens gaan. Keer terug na jou oupa se God toe; die God van ons vaders; die God van Abraham, Isak, Jakob.

“So spreek die HERE: Staan op die weë, en kyk en vra na die ou paaie, waar tog die goeie weg is, en wandel daarin; en julle sal rus vind vir julle siel…” (Jer. 6:16).

Die God van ou mense en kinders

Grandmother and child

Kom ek vertel jou van twee mense in ons gemeente. Die eerste een is ‘n ma met ‘n baba in haar baarmoeder. God is besig om die kind te vorm en het alreeds die kind se hele lewe uitgelê.

“Want U het my niere gevorm, my in my moeder se skoot geweef. Ek loof U, omdat ek so vreeslik wonderbaar is; wonderbaar is u werke! En my siel weet dit alte goed. My gebeente was vir U nie verborge toe ek in die geheim gemaak is nie, kunstig geweef in die dieptes van die aarde. U oë het my ongevormde klomp gesien; en in u boek is hulle almal opgeskrywe: dae dat alles bepaal was, toe nog geeneen van hulle daar was nie.” (Ps. 139:13-16).

Die tweede persoon is ‘n oom wat baie pyn het. Dit is byna ondraaglik. Pynpille help nie. Hy kan skaars loop en slaap nie in die nag nie. Jes. 46:1-7 is o.a. geskryf om te wys hoe die Here ou mense en kinders dra, en hoe dit hopeloos is om op afgode te vertrou.

 

  1. Babilon se afgode (v.1-2)

Ek het lank gelede ‘n storie gelees van sewe sendelinge wat na ‘n eiland teen die Chinese Suidkus toe is. ’n Sestienjarige seun was deel van die span. Op 9 Jan. het hy en die span vir die eilanders gevra hoekom hulle nie in die Here wil glo nie.

‘Ons het ’n god (Ta-wang) wat ons nog nooit in die steek gelaat nie,’ het hulle geantwoord. Volgens hulle het Ta-wang reeds vir 286 jaar mooi weer gegee op die jaarlikse feesdag wat vir hom gehou is.

‘Wanneer is hierdie jaar se fees?’ het die sendelinge gevra. ‘Ons hou dit 11 Jan. om 08:00,’ het hulle geantwoord. ‘Hierdie jaar sal dit reën,’ het die 16-jarige sendeling gesê. ‘Goed so,’ het die eilanders gesê. ‘As dit op die 11de reën, is julle God God!’

Die sendelinge het begin bid. Op 11 Jan. om 07:00 het die son geskyn en was daar nie ‘n teken van reën nie. Die sendelinge het gebid. Die reën het neergesak.

Die jong eilanders het uitgeroep dat die sendelinge se God die ware God is. Maar die ouer mense het vir Ta-wang uitgedra om die reën te stop. Die reën het nóg harder geval.  Die draers het gestruikel en vir Ta-wang laat val. Die afgod se kaak en linkerarm het afgebreek.

Die eilanders het gesê dat hulle per ongeluk die verkeerde dag gekies het, en dat die fees eintlik op 14 Jan. om 18:00 gehou moes word. Die sendelinge het weer vir reën gebid. Tussen 11 en 14 Jan. het meer as 30 mense op die eiland tot bekering gekom.

Toe 14 Januarie aanbreek was dit ‘n mooi dag. Teen laatmiddag het die sendelinge weer gebid. Die Here het dadelik reën gestuur. Ta-wang kon nie die Here keer nie. Bekerings het gevolg [https://goeietyding.wordpress.com/2015/11/21/die-god-van-elia/].

Babilon se afgode was so (v.1-2). Die God van Israel het hulle platgeslaan sodat hulle inmekaar sak soos as ‘n bokser jou in die maag slaan. Bel of Bel-Marduk is afgelei van Baäl en was die Babiloniese oppergod (v.1). Ons sien sy naam in name soos Belsasar (Dan. 5). Nebo was Bel se seun en was die god van wysheid en geleerdheid (v.1). Ons sien sy naam in name soos Nebukadnesar (Dan. 2-4).

Toe Bel en Nebo tot ‘n val kom, het Babilon se godsdiens saam met hulle geval [Edward J. Young, The New International Commentary on the Old Testament: The Book of Isaiah, vol. 3 (Grand Rapids: William B. Eerdmans Publishing Company, 1972), 219-220. Alec Motyer, The Prophecy of Isaiah (Leicester, Inter-Varsity Press, 1993), 368]. Kores van Persië het die Babiloniërs oorwin (v.1, 21:9) en hulle gode op beeste, kamele en donkies weggevoer (v.1-2). Die gode kon nie self loop nie, maar moes gedra word!

Babilon se afgode het die diere uitgeput (v.1). Hulle was m.a.w. ‘n las en goed vir niks (v.1). Hulle kon nie eers hulleself red nie (v.2, vgl. Jer. 48:7). Hoe kon hulle dan mense red (v.2)?

Elke Christen sal saamstem dat afgode dood is, maar in die praktyk leef ons nie altyd so nie. Wat bedoel ek? Christene se kinders leer van ander godsdienste by die skool. Dit is nie ‘n probleem nie. Die probleem lê daarin dat die onderwysers maak of Allah, Krishna en die voorvaders gelyk is met Jesus. Hulle maak of die Big Bang wetenskap is en stel dit bo Gen. 1. Hul maak of evolusie wetenskap is en stel dit bo die God van die Bybel.

Maar die ergste is dat party ouers oningelig is oor wat hulle kinders by die skool leer. Of miskien weet hulle, maar hulle ken nie die Bybel goed genoeg om hulle kinders reg te help nie. Of dalk weet hulle wat hulle kinders leer, maar hulle gee nie om nie.

Moenie so wees nie, maar help jou kinders reg. Wys vir hulle wie die ware God is wat alles gemaak het. Wys vir hulle dat Jesus die enigste en ware God is. Sê vir hulle dat die ander gode van wie hulle leer dood is.

Wees egter versigtig dat jy nie net op die skool se verkeerde lering reageer nie. Leer hulle ook die positiewe waarhede van die Skrif. Hoe doen ‘n mens dit?

Kies ‘n tyd om jou kinders die Bybel te leer. Maak dit ‘n prioriteit; moet dit nie mis nie. Moenie rond en bont leer nie, maar beplan wat jy wil leer. Werk bv. deur Genesis, die tien plae of die lewe van Jesus. Leer vir hulle wie God is. Wanneer jy Bybel stories vertel, moet jy nie net lesse leer oor hoe hulle soet moet wees en nie stout nie. Mik eerder vir die evangelie. Wat leer die betrokke gedeelte oor God en die verlossing van sondaars?

Memoriseer die Bybel deur te sing en vrae en antwoorde (kategismes) te leer. Bid saam met jou kinders. Bid vir sendelinge, siek mense, die kerk, bekerings, ens. Wat jy bid sal vir jou kinders wys wat belangrik is. Hoe jy bid sal hulle leer om die Here te vrees (of nie). Wees vars in jou gebede en moenie net rympies bid nie.

Groei in jou verhouding met die Here. Dan sal jou lering nie vervelig en droog wees nie. Jy sal self opgewonde wees oor wat jy vir hulle leer. Wees lief vir die Here. Gehoorsaam Hom. So sal jou lewe vir jou kinders ‘n voorbeeld wees. Leer jou kinders op informele maniere. Vertel hulle van die Here as jy ‘n kleurvolle blom, voël of sonsondergang sien.

Leer vir hulle ‘n Bybelse perspektief op wen en verloor, op manwees en vrouwees. Leer hulle om nie selfsugtig te wees met speelgoed nie, maar om met ander te deel. Help hulle om ander eerste te stel. Leer hulle om netjies en hard te werk by die skool.

Vertel vir jou kinders hoe die Here jou gered het, hoe Hy jou gebede beantwoord, en wat Hy vir jou gedoen het. Gebruik biografieë en die geskiedenis om vir jou kinders te vertel wat die Here vir sy kinders doen.

 

  1. Die God wat ons dra (v.3-4)

Elke mens gaan deur stadiums waarin iemand hom of haar moet dra. Jou ma het jou vir nege maande in die baarmoeder gedra. Jou ouers het jou gedra totdat jy begin kruip het. Toe jy al kon kruip en loop het hulle jou nog steeds gedra. Hulle het jou gedra toe jy in die laerskool was en in die kar aan die slaap geraak het. Mense sal jou weer in ‘n rolstoel ‘dra’ wanneer jy oud is. Hulle sal jou ook in ‘n kis dra wanneer jy dood is.

Die Here dra ons beter as dit. Hy het die oorblyfsel van Israel in Babilon gedra (v.3). Hy het vir Jakob gekies en hom in die moederskoot gedra (Gen. 25:23, Rom. 9:10-13). Hy het vir Dawid, Jeremia en Paulus in die moederskoot gedra, en doen dieselfde vir jou (Ps. 22:10-11, 71:5-6, 139:13-16, Jer. 1:5, Gal. 1:15). Hy dra ons van die baarmoeder af totdat ons oud is (v.3-4).

“die HERE jou God [het] jou gedra…soos ‘n man sy seun dra” (Deut. 1:31). “…Ebenhaéser…Tot hiertoe het die HERE ons gehelp.” (1Sam. 7:12). “Geloofd sy die Here! Dag ná dag dra Hy ons!” (Ps. 68:20). “Ek is met julle al die dae tot aan die voleinding van die wêreld.” (Matt. 28:20).

Dit was die Here wat jou gehelp het toe jy amper verdrink het. Hy het hulp gestuur toe jy alleen langs die pad gestaan het. Hy het geld voorsien toe jy dit broodnodig gehad het. Hy het jou beskerm toe jy nie eers geweet het jy is in gevaar nie. Hy het jou teen die duiwel beskerm.

Hy het die beproewing gestuur om te keer dat jy verder op die verkeerde pad loop. Hy het jou op ‘n siekbed laat beland, sodat jy sy liefdevolle sorg kon ervaar. Hy het gemaak dat jy jou kar stamp, sodat jy nie in die gewapende roof ingery het nie. Hy het jou in verkeer laat sit, sodat jy die fratsongeluk vrygespring het.  John Piper sê: ‘…God is up to something good for us in all our delays and detours’ [John Piper, Future Grace (Leicester: Inter-Varsity Press, 1995), 174].

Die God wat jou in die verlede, hede en toekoms gedra het is die ewige en onveranderlike EK IS (v.4, Eks. 3:14, Ps. 90:2, Mal. 3:6). Hy het nie ‘n verlede en ‘n toekoms soos ons nie (v.3-4). Hy was nie jonk nie en word ook nie oud nie. Hy het nie ‘n begin en ‘n einde soos ons nie. Hy is dus altyd by ons, selfs as ons oud is.

Moet daarom nie die toekoms vrees nie. Jy hoef nie bang te wees vir die dag wat jy aftree, min geld het, oud word, ‘n invaliede raak, in ‘n aftree oord of ouetehuis beland nie. Die God wat jou van jou moederskoot af gedra het sal jou nie verlaat wanneer jy oud is nie (v.3-4). “Verwerp my nie in die tyd van die ouderdom nie, verlaat my nie as my krag gedaan is nie… En ook tot die ouderdom en die grysheid toe—o God, verlaat my nie…” (Ps. 71:9, 18).

Al kry jy Alzheimer’s soos my ouma, sal die Here jou nie vergeet nie. Die Here sal jou nie eers vergeet as jy Alzheimer’s kry en Hom vergeet nie. John MacArthur vertel van sy mentor, dr. Charles Feinberg, wat Alzheimer’s gekry het.

Dr. Feinberg was ‘n Joodse Rabbi voor hy tot bekering gekom het. Na sy bekering het hy die Here getrou gedien en die Bybel goed bestudeer. Maar toe hy in sy ou dag Alzheimer’s kry, toe sê hy dat Jesus nie die Messias is nie.

Genadiglik hang ons verlossing nie af van ons breinkrag nie. God se beloftes en getrouheid is groter as ons geheue. “As ons ontrou is, Hy bly getrou; Hy kan Homself nie verloën nie.” (2Tim. 2:13).

Selfs wanneer jy oud en gedaan is en grys hare het, bly die Here jou God. Hy sal jou dra as jy op jou sterfbed lê (Ps. 23:4). Hy sal sy engele stuur om jou na die hemel toe te dra (Luk. 16:22). God se ewige arms sal onder jou wees (Deut. 33:27). Dan sal jy die God sien wat jou gemaak het en gered het, die God wat sy volk geskep het en hulle uit Egipte en Babilon verlos het (v.4, 45:9-10, 43:1, Deut. 32:6).

Maar jy sal nie hierdie God sien bloot omdat jy glo Hy het jou gemaak en deur moeilike tye gehelp nie. Jy moet in sy Seun glo. Hy moet jou God wees deur geloof in Jesus Christus en sy kruisdood vir sondaars.

 

  1. God en die gode (v.5-7)

My pa hou van flou grappe wat nie sin maak nie. Hier is een: ‘Wat is die ooreenkoms tussen ‘n fiets en ‘n olifant? Beide kan vlieg behalwe die fiets en die olifant.’ Dis flou, ek weet. Maar die punt is dat daar geen ooreenkoms tussen ‘n fiets en ‘n olifant is nie.

Net so is daar geen ooreenkoms tussen God en die gode nie (v.5). Die Here is lewend en die gode dood. Hy is uniek, gans anders, een van ‘n soort en heilig (v.5, 40:18, 25). “O HERE, wie is soos U onder die gode? Wie is soos U, verheerlik in heiligheid, gedug in roemryke dade, een wat wonders doen?” (Eks. 15:11).

God is ‘n ewige Gees wat alles gemaak het (Joh. 1:1-3, 4:24). Die gode is van die goud en silwer uit iemand se beursie gemaak (v.6). God het ons geskep, maar ‘n goudsmid het die gode gemaak (v.4, 6). Is dit nie dom dat mense voor hulle eie handewerk neerval en dit aanbid nie (v.6)?

Die Here dra ons, maar mense dra hulle gode op hulle skouers (v.7, 1-4). Die Here lei ons deur ons lewens, maar mense sit hulle gode wat nie kan loop nie êrens neer (v.7, Ps. 115:7). Die god kan nie beweeg totdat die aanbidder besluit om dit te skuif nie (v.7).

Die Here is lewend; die gode is dood. Die Here antwoord ons wanneer ons Hom aanroep en tot Hom bid (Ps. 65:3, Jer. 33:3, Luk. 11:9-10). Die gode is doof en kan nie hoor nie; hulle is stom en kan nie antwoord nie (v.7, Ps. 115:5-6).

Waar is die Moslem en Hindoe wat kan getuig van gereelde antwoorde op gebed? Enige ware Christen kan getuig van gereelde antwoorde op gebed. Lees gerus George Müller se autobiografie in hierdie verband.

As jy die ware God ken sal jy sien hoe Hy jou gebede beantwoord. Hy is nie ‘n dowe afgod wat ons nie uit die moeilikheid kan red nie (v.7), maar Hy gee wat ons vra (Matt. 7:9-11). In party gevalle sê Hy ‘nee’ of ‘wag’, maar dit is die uitsondering. Wat is hierdie uitsonderings?

  • Die Here sê ‘nee’ vir jou gebede as jy ongered is (1Pet. 3:12).
  • Hy sê ‘nee’ as jy besig is met sonde (Ps. 66:18).
  • Hy sê ‘nee’ indien jy kleingelowig is (Jak. 1:5-8).
  • Hy sê ‘nee’ as jy selfsugtig bid (Jak. 4:3).
  • Hy sê ‘nee’ as jy bitter is teenoor jou lewensmaat of iemand anders (1Pet. 3:7, Matt. 6:14-15).
  • Hy sê ‘nee’ as Hy ‘n beter plan vir jou het (2Kor. 12:8-9).

Gewoonlik antwoord die Here ons egter wanneer ons Hom aanroep, en red Hy ons uit ons benoudheid (v.4, 7, Ps. 34:5, 7, 18, 20). Wat is jóú benoudheid? Sê vir die Here dat Hy nie ‘n hulpelose afgod is nie (v.7), en vra Hom mooi om jou te help. Vra veral dat Hy jou geestelik sal help in jou beproewing. Wat bedoel ek?

Vra dat die Here jou beproewing sal gebruik om jou karakter te vorm (Jak. 1:2-3). Vra dat jy God se Woord beter sal leer ken (Ps. 119:71). Vra dat jy meer soos Jesus sal word (Rom. 8:28-29). Vra dat jy meer heilig sal word en meer vrug sal dra (Heb. 12:10-11). Vra dat jy ander mense kan help (2Kor. 1:6). Vra dat jy sal leer om meer te bid (2Kor. 1:11). Vra dat die Here jou teen Satan sal beskerm (2Tim. 4:18). Vra dat jy die strikke waarin jongmense trap sal ontwyk (2Tim. 2:22). Vra dat jy tot die einde toe sal volhard as jy oud is (Rom. 5:3-4).

Al dink jy nou dat die Here jou vergeet het, sal jy op jou sterfbed soos Jakob wees. Deur sy lewe het hy baie probleme ervaar a.g.v. sy eie sonde, ander mense se sonde, die Here se tugtiging, lewe in ‘n sondige wêreld.

Dertien jaar voor hy dood is, het hy teruggekyk en gesê: “vol teëspoed was die dae van my lewensjare” (Gen. 47:9). Maar op sy sterfbed het hy net lof gehad vir “die Engel wat my uit elke teëspoed verlos het” (Gen. 48:16).

Mag dit ook jou perspektief wees wanneer jy eendag op jou sterfbed lê en terugkyk oor jou lewe: “Ek was jonk, ook het ek oud geword, maar nooit het ek die regverdige verlate gesien…nie” (Ps. 37:25).

Donald Trump: die Here se herder

Donald Trump with shepherds crook

In die Ou Testament het Egipte se Farao’s en die konings van Babilon geglo hulle is gode. In die vorige eeu het mense Adolf Hitler, Haile Selassie en ander diktators as messiase beskou. Volgens die media dink Julius Malema dat hy die messias van ons tyd is wat Suid-Afrika gaan red. In Noord-Korea dink Kim Jong-un se mense dat hy ‘n god is.

Is dit dan nie lasterend as my tema impliseer dat Donald Trump die Here se herder is nie? My punt is nie spesifiek dat Donald Trump die Here se herder is nie. Ek gebruik hom eerder as ‘n voorbeeld om te wys dat konings partykeer optree om die kerk te bevoordeel. En dit is daardie opsig wat hulle sy herders is. So leer Jes. 44:28 vir ons: “…Kores…is my herder, en hy sal alles volbring wat My behaag…” Dit is ook waaroor Jes. 45:1-13 gaan.

1. Kores en die nasies (v.1-8)
Keiser Konstantyn was die Here se herder in die 4de eeu n.C. Kort nadat hy oor ‘n deel van die Romeinse Ryk begin regeer het, het hy wette gemaak om die kerk te beskerm.

Op ‘n soortgelyke wyse was Kores die Here se herder. God het hom 150 jaar voor sy geboorte gekies. Hy was die gesalfde in God se regterhand (v.1, vgl. 1Sam. 24:6). Hy het God se volk uit Babilon bevry en die tempel in Jerusalem laat herbou (v.4, 13, 44:28).

Hy was ‘n voorskou van die Gesalfde of Messias aan God se regterhand (Ps. 110:1). Tydens die Messias se 33 jaar op aarde het God sy regterhand vasgehou om sy taak te volbring (Ps. 16:8).

God hou ook jou regterhand as jy in Jesus glo (41:13, Ps. 121:5). Hy hou dit wanneer jy beproef word, of as jy onseker, verward, angstig, bang, rigtingloos, hartseer, ens. is.

God het die nasies voor Kores oorwin en konings se gordels losgemaak sodat Kores oor hulle regeer het (v.1, 22:21, Job 12:21). Hy het stadshekke en paleisdeure oopgemaak sodat Kores maklik kon ingaan (v.1). Hy het voor Kores uitgetrek en die hoogtes (nasies en konings) voor hom gelyk gemaak (v.2, 2:14).

Ook in hierdie verband was Kores ‘n prentjie van God wat besig is om die Messias se vyande onder sy voete te plaas (Ps. 2:8-12, 110:1). Jesus sal regeer totdat al sy vyande onder sy voete is (1Kor. 15:25). Al lyk dit dus of die kerk verloor, sal dit op die einde triomfeer.

God sal die deure open en hindernisse verwyder, sodat lande soos Noord-Korea en Soedan nie vir altyd die evangelie sal kan uithou nie (v.1-2, Sag. 4:6-7, Mark. 11:23, Op. 3:7-8). ISIS sal nie die laaste lag hê nie, en die 10/40 venster sal nie vir altyd onder Islamitiese bewind wees nie. Dit behoort aan Jesus. Hy het die sterk man (Satan) gebind en sal terugvat wat die Vader aan Hom gegee het (Matt. 12:29, 28:18, Ps. 2:8). Koperdeure en ystertralies kan Hom nie keer nie (v.2, Ps. 107:16, Matt. 16:18).

God het verder vir Kores die skatte gegee wat die Babiloniërs en ander nasies in donker en geheime plekke weggesteek het (v.3). Deur hierdie voorspellings het Kores geweet dat die Here hom by die naam geroep het om sý taak uit te voer (v.3-5, 41:22-23). God het sy naam gekies en hom tot Israel se voordeel geroep (v.4, 1). God het vir Kores geken, al het Kores Hom nie geken nie (v.4-5).

Net so ken die Here jou. Hy het jou gekies en jou voor die skepping en jou geboorte liefgehad (Gal. 1:15, Ef. 1:4, 2Tim. 1:9). Moet dan nie sy liefde betwyfel wanneer dit met jou sleg gaan nie. Hy het jou van die ewige verlede af liefgehad (Jer. 31:3).

Hy is die soewereine Here, EK IS WAT EK IS, onafhanklik, onveranderlik, en ewig (v.5). Kores moes Israel vrylaat sodat die nasies van oos tot wes kon weet Hy is die enigste God (v.5-6, 22, Ps. 113:3, Mal. 1:11, Op. 5:9, 7:9). Hy het lig en donker geskep, voorspoed en teëspoed (v.7). Hy het alles gemaak (v.7).

Dit beteken dat terminale kanker, die brand in Knysna, ‘n kind wat verdrink, die droogte in die Kaap, ‘n leeu wat ‘n mens vang nie buite sy beheer is nie (v.7, Deut. 28:23-24, Job 1-2, Ps. 148:8, 2Kon. 17:25, Klaagl. 3:37-38, Amos 3:6).

Maar wat van Satan en sonde? God het nie boosheid geskep soos wat ‘n Hindoe in Nelspruit vir my gesê het toe hy Jes. 45:7 lees nie. En tog gebruik die Here die duiwel en sonde om sy goeie planne uit te voer (Gen. 50:20, Hand. 2:23). As ek dit nie mis het nie was dit Walter Kaiser wat gesê het: ‘God uses sin sinlessly.’

Wat moet jou reaksie hierop wees? Moenie die Here beskuldig en Hom die outeur van sonde maak as jý self gekies het om te sondig nie (Jak. 1:13). Vrees Hom eerder wat alles beheer. Rus in Hom en weet jy is in goeie hande.

Hy is God wat sy geregtigheid en verlossing soos reën uit die hemel stuur, sodat dit goeie vrug voortbring soos die aarde ná ‘n lekker reënbui (v.8, 55:10-11, Hos. 10:12). Dit is gedeeltelik vervul toe God Kores gestuur het om die volk te bevry. Uiteindelik word dit egter in die Messias vervul:

  • Hy het uit die hemel gekom om ons te red (v.8).
  • Hy het die Heilige Gees uit die hemel gestuur om ons te wederbaar en goeie vrug in ons lewens voort te bring (v.8).
  • Hy sal weer uit die hemel kom om ‘n nuwe hemel en aarde te skep waarin geregtigheid woon (v.8).

Het jy deel hieraan? Is jy van jou sonde en God se oordeel gered? Is jy ‘n nuwe mens, anders as voorheen (v.8, 2Kor. 5:17)? Dra jy die goeie vrug van bekering (v.8, Joh. 15:1-8, Gal. 5:22, Fil. 1:11)?

2. Die pottebakker en die ouer (v.9-13)
George Müller het vir weeskinders gesorg en die Here vertrou om vir hom geld te voorsien. Soms het hy groot bedrae gekry. Maar by tye het die Here bietjie vir bietjie voorsien. Hy het die Here vir beide geprys en dit as sý voorsiening beskou.

Israel het nie. Toe hulle uit Egipte trek toe gebruik die Here vir Moses en toe red Hy hulle deur die tien plae en die Rooi See wat oopgaan. Maar toe Hy hulle uit Babilon red toe gebruik hy die heidense Kores sonder enige wonderwerke. Om hierdie rede het hulle teen die Here gekla.

Maar wie is die pot om vir die Pottebakker te sê dat Hy verkeerd werk (v.9, 64:8, Gen. 2:7, Job 33:6, Ps. 2:9, Pred. 6:10, Jer. 18:1-6, 2Kor. 4:7)? En sal ‘n ongebore kind vir sy pa sê hoe en wat hy moet verwek (v.10)? Sal ‘n kind vir sy ma sê óf en wanneer sy swanger moet raak, en wat die kind se geslag moet wees (v.10)?

Net so kon Israel nie vir die Here voorskryf wat Hy met die werk van sy hande mag en nie mag doen (v.11). God het Kores, Israel en die mensdom gevorm, verwek en gebaar, en daarom kon Hy met hulle doen wat Hy wou (v.9-10).

Vir Israel wat die toekoms wou beheer het God gesê: ‘Wil julle nie asb. vir my sê wat Ek moet doen nie? Ek weet immers nie hoe nie, aangesien Ek maar net die mens, die heelal en die sterre geskep het (v.11-12, 40:22, 26, 42:5, Gen. 1-2, Ps. 147:4)!’

‘Basta!’ is wat my oom sou sê. God het alles geskep en beheer die geskiedenis. Hy het nie verkeerd gedoen om die heidense Kores op te wek nie (v.13). Hy het Kores se weë gelyk gemaak om Jerusalem te herbou en die Jode vry te laat (v.13, 2, 44:28). Kores het nie beloning of betaling gesoek nie (v.13), maar die Here van hemelse weermag het dit vir hom gegee (43:3-4).

Die Here is ook soewerein oor jou lewe. Jy het nie self gekies om te lewe nie. God het besluit. Hy het jou geslag, asook die dag en plek van jou geboorte gekies. Hy het ook voor jou geboorte gekies om jou te red; Hy het jou gekies nog voordat jy Hom gekies het (Joh. 1:12-13, 15:16, Hand. 13:48, Rom. 9:11-13). Soos die pottebakker en die ouer het die Here nie jou toestemming nodig gehad om jou nuut te maak en te red nie. Dit gaan oor die pottebakker en ouers se besluit, en nie oor die kleipot en kind wat gebore word nie (v.9-11, Rom. 9:14-18). Wat beteken dit prakties?

God kan maak wat Hy wil, soos Hy wil. Hy het alles geskep en kan ook met ons doen wat Hy wil. Dit is niks van jou besigheid as Hy Kores kies om Israel te bevry, of as Hy Jakob kies en nie vir Esau nie (v.9-11). Moet Hom dan nie bevraagteken nie:

“Maar tog, o mens, wie is jy wat teen God antwoord? Die maaksel kan tog nie vir die maker sê: Waarom het u my so gemaak nie? Of het die pottebakker nie mag oor die klei, om uit dieselfde klomp die een voorwerp tot eer en die ander tot oneer te maak nie?” (Rom. 9:20-21).

Buig eerder nederig en vra dat Hy jou genadig moet wees. Bid vir jou geliefdes, jouself, jou kinders en glo dat God net sal doen wat reg, goed, heilig, wys en regverdig is (Matt. 7:11, 11:25-27, Rom. 8:28). As jy nie voor sy soewereine wil buig nie, sal jy sleg daarvan afkom. Jy kan nie teen die Here stoei en wen nie (v.9a).

Moenie sy soewereiniteit uit die hand verwerp omdat dit logies vir jou nie sin maak nie, omdat jy dit nie met die mens se verantwoordelikheid kan versoen nie, omdat dit nie pas by hoe jy God sien nie, of omdat dit vir jou lyk of dit met ander tekste bots nie.

Wees eerder soos wyle dr. Martin Holdt. Hy het teen die soewereiniteit van God geskop, maar na ‘n worstelstryd het hy vir sy vrou gesê: ‘Ek het besluit om God se soewereiniteit in Rom. 9 te aanvaar soos dit is.’

Sy vrou het die vleismes laat val. ‘Maar wat van my pa?’ het sy gesê. ‘As dit van jou pa afhang is daar geen hoop nie, maar as dit van die Here afhang is daar hoop,’ het hy haar geantwoord.

God se soewereiniteit raak alles. Hy is soewerein oor nasies en die breë stroke van die geskiedenis, maar ook oor individue en spesifieke gebeure soos Kores wat God se volk bevry, Donald Trump wat in Amerika regeer, Cyril Ramaphosa wat die president van Suid-Afrika is, en die daaglikse gebeure in jou en my lewe.

Buig onder hierdie God se kragtige hand en sê dankie dat Hy jóú God is: “Welgeluksalig is die nasie wie se God die HERE is, die volk wat Hy vir Hom as erfdeel uitgekies het.” (Ps. 33:12).

Mense se afgode en die God van die Bybel

True God and idols

Is dit moontlik dat ‘n nuwe Christen in China versoek kan word om voor ‘n afgodsbeeld te buig, hulp te vra, en dan later berou te hê? Nee? Wat van Christene in die weste wat versoek word om ‘n afgod te maak van geld, plesier, gemak, kos, ens.? Paulus praat in Kol. 3:5 van “gierigheid, wat afgodediens is”.

Paul Tripp vertel van ‘n ervaring wat hy in Indië gehad het. Hy het gesien hoe mense voor ‘n groot afgodsbeeld buig. Dit het hom ontstel. Hy het na sy kar toe gehardloop en vir die Here dankie gesê dat hy nie so is nie. Die oomblik toe hy dit sê, toe tref dit hom: ‘Jy is presies so.’ Hy het besef dat sy gode nie in die vorm van ‘n klip beeld is nie, maar dat hy ook versoek raak om afgode te maak.

Ek sê nie dat ons vir afgode lewe nie, maar die ou sondige natuur neig daarheen. Jes. 44:6-20 wys hoe dom afgode is, en leer ons om die ware God te aanbid.

1. Die enigste God (v.6-8)
Monoteïste [mono beteken een en theos God] glo dat daar een God is. Politeïste [polu beteken baie] glo dat daar baie gode is. Die Romeine was politeïste en het bv. geglo dat Neptunus die god van die see is, Mars die god van oorlog, Venus die godin van liefde en Jupiter die oppergod. In ons tyd is Hindoes politeïste en Christene monoteïste wat die ware God aanbid. Wie is hierdie God?

[a] Hy is die soewereine Here van die hemelse weermag, die Koning van Israel (v.6, 43:15). Volgens die Nuwe Testament is Jesus die Koning van Israel (Matt. 27:11, 42, Luk. 1:32, Joh. 1:50, Fil. 2:11). Hy is m.a.w. die God van Jes. 44:6.

Wat is die implikasie hiervan? Mense wat die Vader sonder die Seun aanbid, aanbid ‘n afgod (1Joh. 2:23, 5:20-21, Joh. 14:6). Dus aanbid die Jode, die Moslems en die Jehova’s Getuies ‘n afgod.

[b] Hy is die Verlosser van Israel (v.6, 43:1, 14). Hy het sy volk uit Egipte en Babilon verlos. Hy het ook as Verlosser na die wêreld toe gekom om sy volk en die nasies te verlos (Matt. 1:21, Luk. 2:11).

As Hy ons Verlosser is, moet ons nie dink dat Hy aan die kruis maar net ons redding moontlik gemaak het, en gehoop het iemand glo nie. Nee, Hy is ‘n Verlosser wat regtig verlos. Deur sy dood het Hy sy skape en kerk se redding suksesvol gekoop en bewerk (Joh. 10:11, Hand. 20:28). Ken jy ‘n ander god wat so kan verlos?

John Blanchard het ‘n storie in hierdie verband vertel. Een Goeie Vrydag het hy na ‘n ander dorp toe gery om te preek. Oppad het hy ‘n paar jong manne in hulle sokker klere opgelaai. Die gesprek het gou na geestelike dinge toe gedraai.

‘Weet julle watse dag dit is?’ het hy gevra. ‘Ja, dit is Goeie Vrydag,’ het hulle geantwoord.

Blanchard: Weet julle wat op Goeie Vrydag gebeur het?
Seuns: Ja, Jesus het aan die kruis gesterf.
Blanchard: Weet julle hoekom Hy aan die kruis gesterf het?
Seuns: Hy het gesterf sodat ons vry kan wees van ons sonde.
Blanchard: En… is julle?
Seuns: Stilte.

‘n Jaar later het Blanchard op Goeie Vrydag by dieselfde kerk gaan preek. Na die diens toe kom daar ‘n jong man na hom toe. ‘Onthou jy my?’ het hy gevra. Blanchard kon hom nie plaas nie. ‘Ek is een van die jong manne wat jy verlede jaar op Goeie Vrydag opgelaai het. Jou woorde het my gepla, en ek het kort daarna tot bekering gekom.’

Is Jesus jóú Verlosser; is jý van jou sonde verlos?

[c] Hy is God, die Eerste en die Laaste. Hy is die Eerste uit wie alles ontstaan het, en die Laaste vir wie alles bestaan (v.6, 41:4, 48:12, Rom. 11:36). Volgens Kol. 1:16, Op. 1:17, 2:8, 22:13 is Jesus die Eerste en die Laaste deur wie alles ontstaan het, en vir wie dit bestaan.

Jesus is m.a.w. die God van Jes. 44:6. Merk dit in jou Bybel, sodat jy nie verward raak wanneer die Jehova’s Getuies weer vir jou sê dat Jesus nie God is nie. Moenie aan Jesus se Godheid twyfel nie, maar aanbid Hom met vrymoedigheid.

[d] Daar is geen god buiten Hom nie (v.6, 8, 43:10b, 1Kor. 8:4-6). Ons glo in Een God en nie in drie gode soos wat die Moslems sê nie (v.6, 8). En tog glo ons nie soos Oneness Pentecostalism dat God net een Persoon is nie.

Volgens Matt. 3:16-17, 28:19 is God drie Persone: die Vader, die Seun en die Heilige Gees. God is m.a.w. Een, maar ook Enig [Deut. 6:4, Heb. ‘echâd]. Die Vader is God (Ef. 4:6). Die Seun is God (Joh. 1:1, Rom. 9:5, Kol. 2:9, Heb. 1:8). Die Heilige Gees is God (Hand. 5:3-4, 1Kor. 2:10-11). En tog is daar net een God (v.6, 8).

Michael Reeves sê dat God voor die skepping eensaam sou wees as Hy net een Persoon was. Hy sou niemand gehad het om lief te hê voor die skepping nie. As Hy net een Persoon was, dan het Hy die wêreld geskep omdat Hy ons en die skepping nodig het, en omdat Hy liefde soek.

Maar as God nog altyd drie Persone was het Hy voor die skepping volmaakte liefde in die Drie-Eenheid geniet. Hy het vervulling in Homself beleef voordat Hy die wêreld gemaak het. Die liefde en lewe tussen die Vader, die Seun, en die Heilige Gees het oorgeloop toe God die wêreld maak. Hy het ons nie geskep, omdat Hy ons nodig gehad het of eensaam was nie, maar vir sy eie plesier en tot sy eer (Op. 4:11, King James Version).

Ons geniet die voordele van ‘n God wat nie die lewe uit jou suig nie, maar wat oorvloedig en uit liefde gee. In sy groot liefde gee Hy sonskyn, reën, familie, vriende, die huwelik, kos, werk, vakansie, speel, warm klere, diere, die see, sy Seun, die Heilige Gees, die Bybel, die kerk, ens.

Die Drie-Eenheid is dus nie net ‘n teorie wat niks verander nie. Dit verander alles. Die Heilige Gees kommunikeer die Vader en die Seun se liefde en lewe aan jou hart. Jy ontvang dit deur die geloof, en geniet dit deur die Woord, die gemeenskap van gelowiges en gebed (Joh. 14:23, 17:3, Rom. 5:5, Ef. 2:18, 3:16-19, 4:4-6, 2Pet. 1:4, 1Joh. 1:3).

[e] Niemand is soos die Here nie: Hy is uniek, heilig en een-van-’n-soort (v.7, 40:18, 25). Kan enige van die gode soos Hy ‘n volk van ouds af kies en red (v.7)? Kan hulle die toekoms voorspel (v.7, 41:22-23)? Laat hulle dit asb. wys (v.7). Israel kon getuig dat Jahwe dinge uit die ou dae voorspel en vervul het: Hy is die ware God (v.8, 43:10-12).

Omdat Hy die toekoms beheer hoef ons nie daaroor te stres nie (v.8, 46:10, Ps. 139:16, Matt. 6:34). God is ewig en buite tyd – jy nie. Jy kan nie in môre lewe en dit verander nie. Die Here kan, omdat Hy die toekoms beheer en bepaal. Glo en vertrou Hom dan vir die dag van môre.

God sal aan jou die krag gee om regte situasies in die hede te hanteer. Maar Hy sal jou nie die krag gee vir dinge wat jy in jou verbeelding oor die toekoms opmaak nie. Glo dus dat die Here vir jou genoeg krag sal gee vir vandag, en moenie in die toekoms lewe nie.

[f] Hy is die Enigste Rots (v.8, Deut. 32:4, 1Sam. 2:2, Ps. 18:3, 19:15, 62:3, 7-8). Hy is nie onbetroubaar soos die afgode nie, maar vaster as Ayers Rock in Australië wat 3.6 km x 2.4 km x 348 m is.

Jesus is hierdie Rots (8:14, 1Kor. 10:4, 1Pet. 2:8). Bou op Hom deurdat jy sy Woord gehoorsaam (Matt. 7:24). As jy dit doen sal dit jou help in ‘n land vol onsekerheid. Die ekonomie is onseker, asook die politieke situasie, jou werk, jou kinders se tersiêre opleiding, boere se plase, reën, ens. Maar die Here is ‘n hoë Rots wat jou uit die modderslyk red en jou voete op Hom plaas (Ps. 40:3, 61:3).

2. Mense se afgode (v.9-20)
Ek het eenkeer met ‘n man oor sy drank probleem gepraat. Hy het gesien hoe dit sy huwelik, kinders, familie en lewe opmors, maar het daarmee aangehou. Hy het besef dat dit ‘n probleem is, maar het gou bygevoeg: ‘Darem is ek nie verslaaf nie; ek is nie ‘n alkoholis nie.’

Sy afgod het hom mislei. So gebeur dit met enigiets waarvan ons ‘n afgod maak: jy wil dit beheer om jóú te dien, maar op die einde beheer dit jou. Dit is die punt van v.9-20: afgode kan jou nie red soos wat die Here kan nie, maar dit maak van jou ‘n slaaf.

Afgode en dié wat hulle maak is niks (v.9). Mense kan nie getuig van enige hulp of voordeel wat afgode vir hulle bring nie (v.9). Hulle is stom en staan beskaamd as jy hulle hieroor vra (v.9, 11). Die afgode is goed vir niks en in tye van nood laat hulle mense in die steek (v.10-11).

Dit kan nie anders nie, want die ambagsman wat hierdie god maak is net ‘n mens (v.11). Hy is ‘n ystersmid wat yster in die kole sit, met ‘n hamer en sy sterk arm op die aambeeld slaan en die god vorm (v.12). Hy raak moeg, honger, dors, flou, uitgeput, en sloof hom af om die god te maak (v.12, sien 40:28, 31!).

Die timmerman span ‘n lyn, merk met ‘n potlood, meet met ‘n passer, vorm die god en skaaf dit (v.13). Hy vorm ‘n god wat soos ‘n mens lyk en maak tot ‘n huisie vir hom (v.13, kontr. Deut. 4:12, 15-16, 2Kron. 2:6, Joh. 4:24, Hand. 17:28-29).

Hy plant ‘n seder, eik of sipres, en soek reën vir sy boom by die god wat hy wil maak (v.14)! Hy kap die boom af, gebruik ‘n stuk daarvan om ‘n lekker kaggel vuur te maak (Ah!), brood te bak en vleis te braai (v.15-17).

Hy vat die res om ‘n god te maak, buig voor dit, en vra dat die god hom moet red (v.15-17)! Afgodery maak ‘n mens blind en dom, sodat jy nie besef dat jy die gruwelike beeld se ‘tweeling’ tot as verbrand om kos te maak en hitte te kry nie (v.18-20)!

Afgodery bedrieg en mislei mense, sodat hulle nie kan sien dat die beeld in hulle regterhande hulle nie kan red nie, maar dat dit ‘n leuen is (v.20, 17, Jer. 17:9). Afgodery is m.a.w. baie subtiel en vang selfs Christene. Jy dink dat geld, pornografie, drank, pille, baie likes op Facebook, status, applous, kos, ens. jou gelukkig sal maak en dat jy dit kan beheer.

Maar op die einde bring dit hartseer en beheer dit jou. Vat bv. man wat vroue verafgod. Hy kyk pornografie vir sy eie plesier. Om te verhoed dat hy uitgevang word, kyk hy dit wanneer sy vrou slaap. Omdat hy laat wakker bly, is hy moeg by die werk en raak sy werk agter.

Hy voel ook skuldig en depressief, en drink dan anti-depressante om beter te voel. Hy kyk nog pornografie. Maar om dit net te sien is nie genoeg nie. Hy soek meer en flirt by die werk. Daarna soek hy meer. Uiteindelik raak hy betrokke in ‘n immorele verhouding.

Hy is bang dat sy vrou sal uitvind en lieg oor hoekom hy laat uitbly. Hy is bang sy sal uitvind hy lieg. Die stres maak dat hy fisies siek word. Hy verloor geld en tyd, omdat hy dokter toe moet gaan. Dit gebeur gereeld. Sy baas raak ongelukkig, omdat hy nie by die werk is nie.

Sy werk kom in die gedrang. Hy werk op ‘n kommissie basis, en verloor geld omdat hy gedurig a.g.v. siekte nie by die werk is nie. Hy vat geld uit die kleinkas en dink dat hy dit later sal terugsit. Sy baas vang hom uit en dank hom af. Hy lieg vir sy vrou oor wat by die werk gebeur het. Na ‘n paar maande kom die hele lelike storie uit. Sy lewe, huwelik en gesin val uitmekaar.

Afgode maak ‘n mens moeg en tap jou krag (v.12). Dit vang jou in ‘n strik waaruit die afgod jou nie kan red nie (v.20, 17, Spr. 5:22, Joh. 8:34). Die Here sal jou aan hierdie afgode oorgee as jy hulle bo Hom kies (v.18, 6:9-10, 2Tess. 2:11). Hy het jou lief en wil hê jy moet besef dat die afgod hartseer veroorsaak en jou nie kan help nie (Jer. 2:19). Sy doel is dat jy die afgod moet los en na Hom toe moet terugkeer.

Moenie soos ‘n man wees wat ek geken het nie. Toe hy uitgevang word is sy trots gewond en het hy sy lewe geneem. Vra eerder vir Jesus om jou van die eintlike probleem te red, nl. jouself. Dit is die senter van afgodery. As jy die ware God aanbid fokus jy op Hom, maar as jy afgode aanbid fokus jy op jouself.

Die wêreld hits dit aan en sê vir jou dat jý die belangrikste is (2Tim. 3:2). Vergeet jouself en volg vir Jesus (Luk. 9:23, 14:26). Net Hy kan jou oë oopmaak om deur die afgod se leë beloftes en leuens te sien; net Hy kan jou vrymaak (v.18, 20, 42:7, Joh. 8:32, 36, 2Kor. 4:4-6).

Maar wat van ‘n ongelowige wat dit regkry om ‘n afgod soos dwelms sonder Jesus se hulp te los? Ek ken ‘n ongelowige wat aan drank verslaaf was en opgehou het. Wat van sulke mense?

Hulle is nie vry van hulleself nie, maar het bloot die afgod verskuif. Dink bv. aan iemand wat dwelms los, en dan ‘n afgod van oefening en ‘n mooi liggaam maak. Net Jesus (deur sy kruisdood en opstanding) kan iemand vrymaak. Kom na Hom toe, erken met berou dat jy gesondig het, en roep uit dat Hy jou sal help. Dan sal ander mense ook sien dat jy jou soos die Tessalonisense “van die afgode bekeer het tot God, om die lewende en waaragtige God te dien” (1Tess. 1:9).

Die belangrikste paragraaf in die Bybel

Romans 3:21-26

Toe ek in die laerskool was, was daar ‘n Vita-C advertensie van ‘n ou man en ‘n seuntjie wat op ‘n park bankie sit. Die ou man het ‘n lemoen gehad en die seuntjie ‘n Vita-C lekkertjie.

Die ou man wou baie graag ‘n lekkertjie hê en het vir die seuntjie gesê dat hy sy lemoen vir ‘n Vita-C sal ruil. Die seuntjie wou nie, omdat een lekkertjie meer vitamien C as ‘n lemoen bevat.

Rom. 3:21-26 is so: dit is redelik kort, maar elke woord is vol betekenis. ‘n Australiese teoloog genaamd Leon Morris sê oor hierdie verse: ‘This is possibly the most important single paragraph ever written.’ [Aangehaal in John Stott, The Bible Speaks Today: Romans (Notthingham: Inter-Varsity Press, 1994), 109]. In hierdie verse antwoord Paulus Job se vraag: “hoe kan ‘n mens regverdig wees by God?” (Job 9:2). Kom ons bestudeer die frases een vir een.

1. God openbaar sy geregtigheid sonder die wet (v.21a)
Die Puriteine het die rare vermoë gehad om ‘n hele boek te skryf oor een vers of oor ‘n deel daarvan. Martyn Lloyd-Jones het lank na hulle geleef, maar was tot ‘n mate so. Hy het bv. ‘n hele preek oor die woorde, ‘Maar God’ in Ef. 2:4 gepreek. In hierdie woorde wys Paulus die kontras tussen ons sonde en God se liefde.

Die woorde, ‘Maar nou’ in Rom. 3:21 is byna dieselfde en is volgens party mense twee van die mooiste woorde in die hele Bybel. Paulus stel hier ‘n kontras tussen mense wat die wet breek (1:18-3:20) en God wat sonder die wet sy geregtigheid aan ons voorsien, sodat ons voor Hom kan staan (v.21).

Sulke liefde moet jou hart smelt om die Here te prys, te dien, lief te hê, te gehoorsaam en jouself aan Hom te gee (Ef. 1:3-14, Rom. 12:1, 1Joh. 4:19). Dit is ondankbaar om die God te ignoreer wat aan jou asem gee. Maar dit is erger as jy die Een wat alles gedoen het om sondaars te red ignoreer. In daardie geval is jy so ongevoelig soos vet en het jy ‘n hart van klip (2:5, Ps. 119:70).

Om net ‘n kennis van die Bybel te hê, kerk by te woon, te bid, ens., sonder dat jy ‘n hart van liefde vir God het, is nie Bybelse Christenskap nie (Luk. 10:27). Dit is ‘n bose namaaksel.

Maar dit help ook nie dat jy hierdie emosies kunsmatig probeer opwek nie. Om hierdie emosies reg te voel moet jy die volgende doen:

  • Bid dat die Heilige Gees jou hart en verstand sal open om evangelie te verstaan.
  • Oordink die evangelie en bid vir nog begrip.
  • Glo die evangelie.
  • ‘n Gevoel van berou, liefde, blydskap, dank, vrede, ens. sal volg.
  • Toon ‘n gepaste reaksie op die bg. emosies. Voel jy berou? Bely jou sonde en bekeer jou. Voel jy blydskap en danksegging? Bid en sing. Voel jy liefde? Prys en gehoorsaam die Here. Voel jy vrede? Sê dankie en rus in God se vrede.

Die punte wat ek hierbo genoem het geld nie net vir ongelowiges nie, maar vir gelowiges wat koud en hard geraak het (Ps. 51:14, 2 Tim. 1:6, Op. 2:4). As jy nie na die Here toe terugkeer nie, sal jy ongelukkig bly en sal Hy jou aktief teenstaan (Op. 2:5).

2. Die wet en die profete getuig daarvan (v.21b)
Die son se invloed is oral in die skepping. Dit laat groen plante groei en maak so dat mense en diere kos het. Dit bak die aarde warm en laat die warm lug opstyg. Die warm lugstrome laat die wind waai. Die son laat die see verdamp, die wolke vorm en die reën val. Die son hou die maan en planete in hulle wentelbane.

Jesus is so en hou die Ou- en Nuwe Testamente bymekaar. Hy is oral in die Skrif. Die wet en die profete getuig van die geregtigheid van God wat ons deur Hom ontvang (v.21b, Eks. 12, Ps. 22, Jes. 53). As God dan die evangelie eeue voor Christus reeds aangekondig het, wys dit dat Hy al lankal beplan het om ons te red. Hy het dit voor die skepping beplan (Ef. 1:4-5) en direk na die sondeval in Gen. 3:15 aangekondig.

As God dit dan lankal in die wet en profete aankondig het, wys dit dat Hy gewillig is om ons te red. Verlossing is sý inisiatief en plan. Moet daarom nie dink dat Hy onwillig is om jou of ander sondaars te red nie. Herinner Hom aan sy gewilligheid om te red, en bid vir jouself en jou geliefdes.

3. Ons ontvang dit deur die geloof (v.22-23, 25)
Hoekom kan ons nie deur die wet reg wees met God nie? Want almal het gesondig en God se wet gebreek (v.22-23, 10-12, 1:18-3:20). Ons leef vir onsself en ons sonde, en nie volgens ons skeppingsdoel tot God se eer nie (v.23, Jes. 43:7, 21, 1Kor. 10:31).

Party mense is beter as ander, maar almal skiet ver kort (v.23). Dit is soos ‘n klomp mense wat op die strand staan: party spring verder as ander, maar niemand kan oor die see spring nie. Handley Moule sê: ‘The harlot, the liar, the murderer, are short of it [God’s glory]; but so are you. Perhaps they stand at the bottom of a mine, and you are on the crest of an Alp; but you are as little able to touch the stars as they.’ [Ibid.].

Hoe verklaar God ons dan regverdig? Deur geloof in Jesus Christus (v.22, 25). As jy in Jesus glo gee God sý regverdige rekord vir jou en aanvaar Hy sy kruisdood asof jy self die prys vir jou sonde betaal het (v.22, 25, Fil. 3:9).

Doen daarom alles moontlik om hierdie geloof te kry. Dit is immers die sleutel wat God se skatkis oopmaak en aan jou die res van sy gawes gee. Geloof is die hand wat Jesus uit die hemel na jou hart toe bring. En as jy Jesus het, het jy alles uit die bodemlose put van sy genade. Jesus is die Erfgenaam van alles en ons saam met Hom (Rom. 8:17, Ef. 1:3, Heb. 1:2).

Hoe kan jy hierdie geloof kry wat Jesus afbring na jou hart toe? Vra Hom daarvoor (Mark. 9:24, Luk. 17:5, Ef. 2:8-9, Fil. 1:29). Moenie in jouself kyk of jy dit het nie. Vergeet van jouself en kyk na Jesus in die Woord. Bid dat Hy Homself aan jou bekend sal maak.

4. God gee dit gratis (v.24a)
Mense raak agterdogtig as jy ‘n duur item gratis weggee. Hulle is al genoeg gevang met sms’e en oproepe wat geld en gratis vakansies belowe. Hulle beskou daarom ook God se gratis verlossing met agterdog.

En tog is dit nie verdag nie: die geregtigheid wat jy nodig het om voor God te staan is regtig gratis (v.24a, 6:23). Sal God sy geliefde en unieke Seun vir jou gee en die gratis geregtigheid wat jy nodig het om in die hemel te kom terughou (Rom. 8:32)?

Los jou agterdog en ontvang God se gratis geregtigheid deur die geloof (v.22, 24a). Los ook jou trots wat nie wil erken dat jy te sleg is om God se verlossing te verdien nie. Dit verheerlik die Here as jy niks bring en vir sy genade vra. Dit is ‘n klap in sy gesig as jy sê dat Jesus se kruisdood nie voldoende is nie, maar dat jy iets wil bydra.

5. Jesus koop dit vir ons (v.24b)
Gestel ‘n ryk man gee vir jou ‘n Rolls Royce. Beteken die gratis kar dat dit goedkoop is? Nee. Dit kos hom ‘n goeie R20-30 miljoen. Net so beteken God se gratis geregtigheid nie dat dit goedkoop is nie. Dit kos Jesus se lewe (1Pet. 1:18-19). Hy het ons van sonde en Satan vrygekoop (v.24b).

Die gepaste reaksie is nie om die Bybel te lees, te bid, geld te gee, kerk by te woon en goeie werke te doen asof jy Hom kan vergeld nie. Doen eerder hierdie dinge uit liefde met die wete dat jy Hom nie kan terugbetaal nie. Sê net dankie, prys Hom en vra vir nog genade.

Om vir nog genade te vra verheerlik Hom net soveel soos danksegging, omdat jy daardeur erken dat Hy ryk is en jy arm. Sodoende erken jy ook dat alles wat jy het van Hom af kom (1Kron. 29:14, Joh. 3:27, 1Kor. 4:7, Jak. 1:17).

Wat ek is is net genade,
wat ek het is net geleen

-Koos du Plessis-

6. Jesus het dit bevredig (v.25-26)
Omdat ons God se wet gebreek het, vereis sy geregtigheid dat ons gestraf moet word. Maar in sy liefde het Hy mens geword om die wet namens ons te onderhou en ons straf te dra asof Hý dit oortree het. Op hierdie manier het Jesus die Vader se toorn afgewend en dit bedaar. Dit is wat die Griekse woord vir versoening [hilastērion] in v.25 beteken.

Liberale teoloë haat dit dat God se toorn op sy Seun uitwoed en noem dit Cosmic Child Abuse (John Dominic Crossan). Ander mense wil liede soos In Christ Alone sing maar die woorde verander. Een groep wou bv. nie die woorde hê wat sê:

’Til on that cross as Jesus died,
the wrath of God was satisfied.

Maar hulle haat vir God se toorn op Golgota wys dat hulle dink die mens is nie so sleg nie en God nie so heilig nie. Hulle beskou v.25 verkeerd en dink dat Jesus ons wil red, maar die Vader nie. Hulle dink dat Jesus aan die kruis gesterf het om ‘n kwaai God te keer.

Maar die Vader self het ons lief en het die inisiatief geneem om ons te red (v.25, Joh. 3:16, 16:27, 1Joh. 4:10). Die evangelie is nie ‘n heidense godsdiens waarin die aanbidder iets moet offer om ‘n wispelturige god se toorn te bedaar nie. God het Homself in Christus gegee om sy toorn af te wend (v.25). Jesus se bloed het uitgeloop. Hy het die beker van God se toorn gedrink sodat ons nie hoef nie (Joh. 18:11, Op. 14:10).

Ons wil die lering oor God se toorn vermy en nie daaroor dink nie. Maar soms moet ons daaroor dink om te besef waarvan Hy ons gered het, asook wat dit Jesus gekos het om ons te red. As ons dit besef sal ons die Vader en die Seun meer liefhê, en sonde meer haat.

As jy dink dat sonde nie so erg is nie, sal jy sê dat die hel onregverdig is, en dat die kruis nie só nodig is vir ons redding nie. Jy sal dink dat ons ook deur ander godsdienste gered kan word. Jy sal dink dat God ‘n R150 boete afgeskryf het, en Hom nie so liefhê soos iemand wat besef dat Hy eintlik ‘n $900 triljoen boete afbetaal het nie (Luk. 7:41-43, 47).

Nou en dan sê een of ander liberale teoloog dat die God van die Ou Testament kwaai is en net wil straf, terwyl die God van die Nuwe Testament liefdevol en genadig is. Hulle maak asof daar twee Gode is, en verkies die God van die Nuwe Testament.

Maar dit is niks anders as die antieke dwaling wat gnostisisme genoem word nie. Hierdie lering is onwaar, aangesien die God van die Ou Tesament baie liefdevol en geduldig is. Vir 4000 jaar het Hy juis nié die mens uitgewis soos wat hy verdien nie. Hy het bv. nié vir Adam en Dawid hel toe gestuur nie, maar hulle sonde oorgesien.

Beteken dit dat Hy ‘n korrupte Regter is wat die onreg laat seëvier? Nee. Hy het hulle sonde oorgesien, omdat Hy self in die toekoms die straf vir hulle sonde sou dra aan die kruis (v.25). Jesus het m.a.w. nie net aan die kruis gesterf om ons sonde weg te vat nie, maar om te wys dat God regverdig is en die sonde nie oorsien nie (v.25). Op grond hiervan het John MacArthur in ‘n preek gesê: ‘Who did Jesus die for? He died for God, to show his righteousness.’

God wys ook sy geregtigheid wanneer Hy deur Jesus se kruisdood die vuil klere van jou sonde uittrek en vir jou die skoon klere van Christus se geregtigheid aantrek (v.26, Sag. 3:3-5, 2Kor. 5:21). As God ons sonder die kruis vergewe en regverdig verklaar het, was Hy soos ‘n korrupte regter in Suid-Afrika wat die misdadiger vrylaat. As Hy ons aan die ander kant gegee het wat ons verdien, was ons almal in die hel.

Jesus se kruisdoood is die oplossing: God is regverdig en straf ons sonde in Christus. Hy verklaar ons ook regverdig deur ons geloof in Christus (v.26). Die kruis wys God se geregtigheid en genade: “Goedertierenheid en trou ontmoet mekaar; geregtigheid en vrede kus mekaar.” (Ps. 85:11).

As God dan soveel moeite gedoen het om sy geregtigheid te wys, moet ons Hom nie van ongeregtigheid beskuldig nie.

  • Hy is nie onregverdig as Hy mense wat in hulle sonde volhard hel toe stuur nie.
  • Hy is nie onregverdig as Hy vir Jakob kies en nie vir Esau nie (9:14, 21, Matt. 20:15).
  • Hy is nie onregverdig as Hy die heidene wat nog nooit van Jesus gehoor het vir hulle sonde straf nie (1:19-21, 2:14-15).
  • Hy is nie onregverdig as Hy mense aan hulle harde harte oorgee, sodat hulle nie kán glo nie (9:18).
  • Hy is nie onregverdig as Hy geduldig is met Julius Malema en Hom nie dadelik vir sy sonde straf nie.
  • Hy is nie onregverdig as Hy sg. ‘onskuldige’ mense doodmaak nie (5:12).
  • Hy is nie onregverdig as Hy beproewing oor jou pad stuur nie.

Sê eerder dat God reg is, al verstaan jy nie alles nie. Hy is die definisie van wat reg en verkeerd is. Buig voor wat Hy sê reg is.

Maar prys Hom die meeste dat Hy jou deur die kruis so regverdig soos Jesus beskou. Deur Christus se geregtigheid is jy in status so regverdig soos die gelowiges in die hemel. Vir ‘n vrou in Oos-Londen was dit die beste nuus ooit. Toe sy hoor hoe wyle dr. Martin Holdt daaroor preek, wou sy niks anders hoor nie. En as jy dit eers snap sal jy dieselfde voel, omdat dit die beste nuus in die wêreld is.

Hoekom Jesus beter is as die ander gode

Jesus among other gods

My tema impliseer dat daar ander gode is, maar dit is nie wat ek bedoel nie.  Volgens die Bybel is daar net een God: die Vader, die Seun en die Heilige Gees (Deut. 6:4, Matt. 3:16-17, 28:19, Joh. 1:1, Ef. 4:4-6, 1Kor. 8:4-6, Jak. 2:19).  Buiten Hom is daar geen ander God nie (Jes. 45:5-6, 14, 18, 21-22).  Derhalwe kan Hy ook doen wat geen ander god kan nie, en is Hy beter as hulle.  Jes. 41 wys vir ons hoe die Here se dade groter is as die ander gode s’n.

 

  1. Hy beheer die nasies (v.1-7)

Die ANC glo dat die voorvaders ons land se toekoms beheer, maar volgens die Bybel beheer God die nasies en beveel Hy hulle in v.1 om stil te wees in sy hof (Ps. 46:11, Hab. 2:20, Sag. 2:13).

 

Die Here het sy volk versterk (40:29, 31), maar die nasies moet hulleself versterk voordat hulle in sy hof verskyn (v.1).  Laat hulle nader kom, praat, hulle saak voor die Here stel, en vir hulleself oordeel of Hy die ware God is (v.1).

 

Toe die nasies hulle saak gestel het toe kom hulle onder kruisverhoor (v.2).  Hier is wat die Here hulle gevra het:

 

  • Wie het koning Kores van Persië uit die ooste opgewek (v.2, 44:28)?
  • Wie het hom gestuur om te oorwin met elke tree wat hy gee (v.2)?
  • Wie het die nasies voor hom platgevee en in sy hand oorgegee (v.2)?
  • Wie het konings onder sy voete vertrap (v.2, Jos. 10:24, 1Kon. 5:3)?
  • Wie het hom gehelp om die nasies en haar konings soos stof te maak met sy swaard, soos wind-verwaaide stoppels met sy boog (v.2, 40:24)?
  • Wie het gemaak dat hy veilig is terwyl hy sy vyande verjaag (v.3)?
  • Wie het gemaak dat hy so vinnig oor die aarde beweeg dat sy voete nie grondvat nie (v.3, vgl. Dan. 8:5)?[1]
  • Wie het al hierdie dinge gedoen (v.4)?
  • Wie het van die begin af die geslagte of nasies van die aarde in die lewe geroep (v.1, Hand. 17:26)?

 

‘Ek, Ek, Ek, Ek…’ sê die Here dwarsdeur die hoofstuk.  “Ek, die HERE, die Eerste, en by die laaste is Ek dieselfde.” (v.4).  Israel en die nasies moet weet dat Hy en nie die afgode nie, die ware God is wat nasies en konings beheer (v.2-4, 40:15, 17, 23).

 

Hy is die Eerste wat voor die begin bestaan het (Gen. 1:1), en wat tot op die laaste dieselfde sal bly (v.4).  Hy is die Eerste uit wie alles ontstaan het, die Laaste tot wie se eer dit bestaan (v.4, 44:6, 48:12, Joh. 1:2-3, Kol. 1:16, Op. 1:8, 17, 2:8, 22:13).  “Want uit Hom en deur Hom en tot Hom is alle dinge. Syne is die heerlikheid tot in ewigheid. Amen.” (Rom. 11:36).

 

Hoe het die nasies en eilande hierop gereageer?  Hulle was bang en het gebewe (v.5).  Maar in plaas daarvan dat hulle na die Here toe draai (v.1), het hulle mekaar moed ingepraat om gode te maak wat hulle kamtig teen die koning van Persië sou beskerm (v.5-7).  Maar watse soort god is dit wat deur mense hande gemaak word en dan nog deur hulle versterk moet word (v.7, Jer. 10:4)?

 

Ek vertrou eerder op die Here wat konings en nasies beheer.  Hy het die presidente van ons land aangestel en weer uit die amp verwyder (Dan. 2:21, Rom. 13:1).  Hy lei hulle om goed te doen en laat toe dat hulle kwaad doen (Esra 1:1, 6:22, 7:27, Spr. 21:1, Joh. 19:10-11).

 

Die Here veroorsaak nie sonde nie, maar is soewerein oor presidente en konings se sondige keuses (Hand. 4:27-28).  Dit geld o.a. vir absurde wette wat sonde goedpraat, bv. gay huwelike in Australië, grondgrype sonder vergoeding in Suid-Afrika, geslagsverwarring in Kanada, ens.

 

God is in beheer selfs wanneer ‘n baba ontvoer word, ‘n leeu sy eienaar byt, of as demone mense met vals lering vang (Gen. 45:5, 8, 50:20, Ps. 105:17, 2Kon. 17:25, 1Kon. 22:20-23, 2Tess. 2:11).

 

Dit beteken nie dat die Here sonde goedkeur nie.  Inteendeel, Hy haat dit.  Maar Hy is in beheer daarvan.  En as jy aan hierdie God behoort en Hom liefhet sal Hy maak dat die grootste tragedie tot jou voordeel uitwerk (Rom. 8:28).  Is dit nie wat deur Jesus se kruisdood gebeur het toe Hy vir ons lewe en verlossing gebring het nie?

 

  1. Hy red sondaars (v.8-20)

Mense in kultusse en ander godsdienste moet hulleself red.  Hulle god is nie sterk genoeg om dit te doen nie.  Hulle moet sekere reëls nakom en rituele beoefen.  En selfs as hulle dit gedoen het is dit waarskynlik nie genoeg nie; die ‘god’ sal besluit of dit voldoende is of nie.

 

Met die Here werk dit anders.  Hy red sondaars wat niks kan doen om hulleself te red nie; alles moet van Hom af kom.  Dit is wat Hy met Israel gedoen het.  Hy het sy vriend Abraham en dié se nageslag gekies om aan Hom te behoort (v.8, 2Kron. 20:7, Jak. 2:23, Deut. 7:7-8).

 

Hy het hulle aan die eindes van die aarde gaan haal: Mesopotamië, Egipte en Babilon (v.9, 43:5-6, Jos. 24:2-3, Hand. 7:2).  Hy het hulle nie geheel en al verwerp nie, en sal hulle daarom weer in die toekoms na Hom toe bring (v.9, Rom. 11:28-29).

 

Israel het nie rede gehad om bang te wees en angstig rond te kyk vir ander gode se hulp nie (v.10, 5).  Die Here sou hulle met sy kragtige regterhand red, help, versterk en ondersteun (v.10, 40:29, 31, Ps. 46:2).

 

Die vyande wat kwaad was en teen hulle baklei het sou misluk en in die skande kom (v.11-12).  Die Here sou hulle van die aardbol af verwyder en maak dat hulle niks is nie (v.11-12, 40:17, 23, Ps. 37:10, 36).  Dit was onnodig vir God se volk om bang te wees, aangesien die Verlosser en Heilige van Israel soos ‘n Vader langs die klein ‘wurmpie’ gestaan het om sy hand vas te hou en hom te help (v.13-14).

 

In Christus geld die bg. beloftes ook vir ons (2Kor. 1:20): ons is die Here se diensknegte (v.8, 1Pet. 2:16).  Hy het ons uitverkies (v.8, Ef. 1:4-5, 2Tess. 2:13).  Ons is die nageslag van Abraham (v.8, Gal. 3:7, 29).  Ons is sy vriende (v.8, Joh. 15:13-15).  Hy het ons by die eindes van die aarde kom roep (v.9, Hand. 1:8).  Hy sal ons nooit verwerp nie (Joh. 6:37, 10:27-28).

 

Moet dan nie bang wees nie… moenie bang wees nie… moenie bang wees nie (v.10, 13, 14).  Hoekom nie?  Nie omdat God die beproewing kan wegvat of keer dat jy daardeur gaan nie, maar omdat Hy met jou is en jou nie sal verlaat nie (v.10, 13, 14, 43:2, Ps. 23:4, Matt. 1:23, 28:20, Heb. 13:5).

 

Jy hoef nie angstig rond te kyk vir ander hulp nie (v.10, 5-7).  Sonder die Here kan geen politieke party, berader, geld of enigiets anders jou help nie.  Kyk daarom deur geloof, die Woord en gebed na die Here toe (v.10, 5-7).

 

As jy by die Here skuil kan niemand jou seermaak nie (v.11-12, Sag. 2:8, Rom. 8:31).  Die Here sal sy kinders se vyande vernietig.  Waar is die Babiloniërs, Amalekiete, Filistyne en ander nasies wat teen die Here se kinders baklei het?  Waar is die Romeinse Ryk wat hulle vervolg het?

 

Net soos wat die Here van Griekse mitologie ontslae geraak het, sal Hy Islam, evolusie en die res van die kerk se vyande onder sy voete vertrap (Ps. 110:1, 1Kor. 15:25).  “Jy sal hulle soek, maar hulle nie vind nie” (v.12).

 

Vir iemand om God se kinders seer te maak is soos vir ‘n boelie om jou te klap terwyl jy langs jou pa staan en sy hand vashou (v.13).  Eintlik is dit erger, omdat ons Verlosser die Heilige van Israel is (v.14).

 

Dalk voel jy so klein en hulpeloos soos ‘n wurm.  Onthou asb. dat dit vir die Here maklik is om ‘n wurm in ‘n skerp, nuwe dorsslee met baie tande te verander.

 

Hy het dit met Israel gedoen en deur hulle die nasies soos berge en heuwels afgemaai, fyngemaal, uitgewan, en in die stormwind van sy toorn verstrooi (v.14-16, 2, 2:14, 40:4, 12, 24, Ps. 1:4, Jer. 51:2, Miga 4:13, Sag. 4:7).  Hieroor het Israel hulle in die Here verbly, en nie in die nasies se gode geroem nie (v.16).

 

Jesaja wissel nou ratte, maar eintlik wys hy nog steeds hoe die Here sy volk verlos.  Hy gebruik simboliese taal om die nuwe verbond en Israel se toekoms mee uit te beeld.  Die belofte is vir dié wat arm van gees is (v.17, Matt. 5:3).  Hulle besef dat hulle niks het om God se verlossing te koop nie, maar dat alles van Hom van kom.

 

Hulle het ‘n dors na die vars water van Christus en sy verlossing (v.17, Ps. 42:2, 63:2, Matt. 5:6, Joh. 4:14, 7:37-39).  Die Here verhoor hulle en gee dit in oorvloed (v.17-18).  Deur die Gees wat Hy op hulle uitstort verander Hy sy volk se dor lewe in ‘n water paradys vol koeltebome (v.18-19, 12:3, 32:15, 35:6-7, 44:3, 55:13, 60:21, 61:3, Ps. 92:13-15, 1:3, vgl. Eks. 15:27, 17:1-7).

 

Wanneer die nasies hierdie nuwe skepping sien sal hulle weet dat die Here God is, omdat net Hy die transformasie van ‘n veranderde en nuwe lewe kan meebring (v.20, 2Kor. 5:17).  Die nasies se gode kan dit nie doen nie.  Wys vir my die ongelowige wat nie net uiterlik goed lyk nie, maar totaal en al van binne af getransformeer is.

 

Drie maande gelede het ‘n jong man vir my gevra of die Here iemand hel toe sal stuur as hy reg lewe maar nie in Jesus glo nie.  My antwoord was tweeledig.  Eerstens oortree so iemand die grootste gebod wat sê dat jy die Here met jou hele wese moet liefhê.  Tweedens is dit nie moontlik om reg te lewe as jy nie in Jesus glo nie, omdat Hy jou deur die Heilige Gees in staat moet stel om reg te lewe.

 

Juis om hierdie rede is mense wat ander gode aanbid geldgierig, oneerlik, hoogmoedig, immoreel, losbandig, skelm, bitter, vreesagtig, kwaad, ens.  As jou hart so leweloos soos ‘n woestyn is en jou lewe nie anders as die wêreld s’n lyk nie, is dit omdat jy nie weergebore is nie (al sê jy ook dat jy die Here ken).

 

Vra die Here om die dor woestyn van jou lewe in ‘n paradys te verander.  Vertrou dat Jesus jou deur sy Gees sal nuut maak as jy in Hom en sy kruisdood vir sondaars glo.  Sien die liefde van Een wat:

 

  • Angs beleef het sodat jy kan bly wees,
  • Uitgewerp is sodat Hy jou kan inbring,
  • As ‘n vyand vertrap is sodat jy as ‘n vriend verwelkom kan word,
  • Aan die hel oorgelewer is sodat jy die hemel kan erf,
  • Naak was sodat jy geklee kan word,
  • Gewond is sodat jy genees kan word,
  • Dors was sodat jy kan drink,
  • Gepynig is sodat jy getroos kan word,
  • Tot skande gemaak is sodat jy sy heerlikheid in besit kan neem,
  • In duisternis gehang het sodat jy God se lig kan sien,
  • Getreur het sodat jou trane afgevee kan word,
  • Gekreun het sodat jy vir ewig mag sing,
  • Pyn verduur het sodat jy gesondheid kan geniet,
  • ‘n Doringkroon gedra het sodat jy ‘n heerlike kroon kan hê,
  • Sy hoof laat hang het sodat jy joune kan oplig,
  • Sy oë in die dood gesluit het sodat jy joune in die hemel kan open,
  • Sy asem uitgeblaas het sodat jy vir ewig kan lewe.[2]

 

  1. Hy beheer die geskiedenis (v.21-29)

Het jy al gehoor hoe mense dit in Engels sê: ‘History is His Story’?  Dit is waar, omdat God in die geskiedenis besig is om sy planne uit te werk.  Dit is waaroor Hy die gode in v.21-29 aanvat.  Na aanleiding van v.1-20 daag die Koning van Israel die nasies voor sy hof om aan Hom te bewys dat hulle gode gode is (v.20, 1).

 

‘Laat julle gode vir ons sê wat in die toekoms gaan gebeur,’ het Hy gesê (v.22).  ‘Kom klip-gesig, voorspel asb. die toekoms (v.22).  Of dalk wil jy ons van die verlede vertel, sodat mense daaruit kan leer en nie in die toekoms dieselfde foute sal maak nie (v.22)?  Wat lê vir ons voor: wil jy ons nie asb. van môre vertel nie (v.23)?  As jy die toekoms kan voorspel sal almal weet dat jy die God is wat dit beheer (v.23, 48:5-8).

 

‘Hoekom doen jy nie iets goed soos om mense te verlos, of skade soos om ‘n nasie te oordeel nie (v.23, 45:7)?  Wys asb. jou mag, sodat almal vreesbevange kan wees (v.23).  Verbaas ons; almal wil tog sien dat jy ‘n god is (v.23).

 

‘Nes Ek gedink het: jy en jou makkers is niks!  Julle werk bestaan ook nie en is minder as niks (v.24).  Die een wat besluit om julle te aanbid is afskuwelik; afgodery is haatlik (v.24)!’

 

God is anders as die gode.  Hy voorspel nie net die toekoms nie; Hy beheer dit (46:10, Ef. 1:11).  In 539 v.C. het koning Kores van Persië se weermag van die noorde en ooste af op die Babiloniërs afgekom en hulle soos klei vertrap (v.25).

 

In dieselfde jaar het Kores volgens Jesaja se voorspelling die Here se Naam aangeroep (v.25).  Hy het in Jahwe se Naam die Jode vrygelaat en hulle na Jerusalem toe terugstuur (Esra 1:1-4).  God het hierdie dinge meer as 150 jaar vroeër deur Jesaja voorspel.

 

Kan enige van die gode dit doen?  Laat hulle dit wys sodat ons kan weet dat hulle gode is (v.26, 47:13).  Ons wag… geen antwoord nie… stilte… (v.26, 28).  Die gode bestaan nie en is ‘n illusie (v.29).  Soos Willards se Cheese Curls is hulle so leeg soos wind (v.29).  Maar die Here bestaan en het vooraf die goeie nuus van Kores se koms deur Jesaja voorspel (v.27).

 

Hy het honderde ander gebeure voorspel wat tot op die letter vervul is.  Ek wil op die Messiaanse voorspellings fokus (iets wat een van my dosente op Sem ontken het).  Die Ou Testament het o.a. voorspel:

 

  • Die Messias sal in Betlehem, uit ‘n maagd, uit die stam van Juda en uit die geslag van Dawid gebore word (Miga 5:1, Jes. 7:14, Gen. 49:10, Ps. 132:11).
  • Hy sal in die Galilea-streek preek (Jes. 8:23-9:1).
  • Hy sal op ‘n donkie in Jerusalem inry (Sag. 9:9).
  • Een van sy vriende sal Hom verraai (Ps. 41:10).
  • Hy sal onskuldig wees en stilbly by sy verhoor (Jes. 53:7-9).
  • Hy sal gegesel word (Jes. 50:6, 53:5).
  • Hy sal tussen misdadigers gekruisig word en vir sy vyande bid (Ps. 22:17, Jes. 53:12).
  • Hy sal sê: ‘My God, my God, waarom het U My verlaat?’ (Ps. 22:2). Sy vyande sal sê: ‘Laat die Here Hom red as Hy ‘n behae in Hom het!’ (Ps. 22:8-9).
  • Hy sal dors word aan die kruis (Ps. 22:16, 69:4). Sy vyande sal vir Hom asyn gee om te drink (Ps. 69:22).  Hulle sal sy klere verdeel, lootjies trek vir sy kleed en ‘n spies in sy sy steek (Ps. 22:19, Sag. 12:10).
  • Hy sal in ryk man se graf begrawe word (Jes. 53:9).
  • Hy sal uit die dood uit opstaan (Jes. 53:10).

 

Die Nuwe Testament wys vir ons dat hierdie dinge so gebeur het.  God beheer die geskiedenis.  Hy doen dit nie net op ‘n groot skaal nie, maar stel belang in die detail van jou persoonlike lewe en geskiedenis:

 

“U ken my sit en my opstaan; U verstaan van ver my gedagte. U deurvors my gaan en my lê, en U is met al my weë goed bekend. Want daar is nog geen woord op my tong nie—of U, HERE, U ken dit geheel en al… in u boek is hulle almal opgeskrywe: dae dat alles bepaal was, toe nog geeneen van hulle daar was nie.” (Ps. 139:2-4, 16).

 

In C.S. Lewis se Chronicles of Narnia moes Shasta ‘n gevaarlike reis deur die woestyn aanpak om betyds by ‘n sekere koning Lune uit te kom.  Gedurende die reis het hy vir ‘n nag tussen die grafte geslaap, was hy bang vir jakkalse en het ‘n leeu hom gejaag.  As baba het iemand hom in ‘n boot naby die water se kant gekry.

 

Toe Aslan die leeu vir Shasta ontmoet, toe sê hy vir hom: ‘Ek was die kat wat jou rustig laat voel het tussen die grafte.  Ek was die leeu wat die jakkalse verdryf het sodat jy rustig kon slaap.  Ek was die leeu wat jou gejaag het en die perd bang gemaak het, sodat hy vinniger kon hardloop en jy betyds by koning Lune kon uitkom.  En ek was die leeu wat die boot gestoot het toe jy as kind byna gesterf het, sodat ‘n man wat teen middernag buite gesit het jou kon ontvang.’[3]

 

Wanneer jy eendag in die hemel is sal Jesus vir jou soortgelyke dinge sê, en sal jy weet dat Hy jou nooit verlaat het nie.  Dan sal dit weereens vir jou duidelik word dat Hy beter is as die ander gode.

 

[1] Alec Motyer, The Prophecy of Isaiah (Leicester: England, Inter-Varsity Press, 1993), 310

[2] Vry vertaal en aangepas uit Arthur Bennett, The Valley of Vision: A Collection of Puritan Prayers & Devotions (Edinburgh: Scotland, The Banner of Truth Trust, 1975), 42

[3] Vry vertaal uit C.S. Lewis, The Chronicles of Narnia: The Horse and His Boy (New York: NY, HarperCollins Publishers, 1954), 281

Die beste troos in beproewing

Eagle Soaring

Waaroor gaan die top-verkoper boeke in Christelike boekwinkels?  Nie oor God nie, maar oor hoe jý ‘n beter mens kan wees.  Martyn Lloyd-Jones het dit reg gehad: ‘Our thoughts revovle around ourselves.  We think we are the centre of the universe.  But we are not, my friends.’[1]

 

Jesaja se benadering om ons in beproewing te troos is heeltemal anders as moderne Christenskap s’n.  Jes. 40 begin nie by mense nie, maar by God.

 

  1. God se vergifnis (v.1-2)

Soms praat mense van koffie as boeretroos.  Maar as jy sonde in jou lewe het sal die beste koffie jou nie troos nie.  Net die Here kan.  Sy troos is so goed dat Hy dit ‘n eeu voor 39:5-7 se beproewing voorspel het: “Troos, troos my volk, sê julle God.” (v.1).

 

Jesaja se herhaling van die woord ‘troos’ wys dat die Here ‘n God van vertroosting is (v.1, Joh. 14:16, 2Kor. 1:3).  Ons het God se troos in die Messias en sy vergifnis leer ken (v.1-3, Luk. 2:25).

 

Jerusalem het teen die Here gesondig, maar Hy het saggies tot haar hart gespreek (v.2, Hos. 2:13).  Dit is hoe die Here sondaars na Hom toe trek.  ‘n Puritein genaamd William Gurnall (1617-1679) het gesê: ‘Sondaars word nie met die klippe van harde en uitdagende woorde in Christus in gesmyt nie, maar met sagte vermanings wat die hart smelt word hulle na Hom toe getrek.’[2]

 

Wat het die Here vir sy volk gesê?  Juda se stryd met Babilon was verby, maar haar stryd met die Here ook (v.2).  Met die koms van die Messias sou die Here met haar versoen raak en haar sonde vergewe.  Sy het uit die Here se hand dubbel ontvang vir al haar sondes (v.2).  Dit beteken nie dat Hy haar dubbel sou straf nie.

 

Die Hebreeuse woord [kephel] beteken ‘duplikaat’ of ‘om dubbel te vou’.[3]  Jesus se kruisdood was m.a.w. genoeg om sy volk se sonde te vergewe.  Daar is nie ‘n sonde wat Hy nie kan vergewe nie.  ‘The deepest sin can’t rise above Calvary’s love.’ (Steve Green).  “waar die sonde meer geword het, het die genade nog meer oorvloedig geword” (Rom. 5:20).  Vat dan die sonde wat jou so pla na Jesus toe dat Hy dit kan vergewe.

 

  1. God se heerlikheid (v.3-5)

Richard Wurmbrand (1909-2001) was ‘n Roemeense Christen wat vir sy geloof vervolg is.  Hy was vir 14 jaar in die tronk.  Hy vertel hoe hy God se heerlikheid in die tronk beleef het.  ‘Ek het nog nie iets mooier in my lewe gesien nie,’ het hy gesê.[4]

 

Dít is die heerlikheid waarmee Jesaja die volk bemoedig het.  Johannes die Doper het in die woestyn gepreek dat mense hulle moet bekeer en vir die Messias se koms moet voorberei (Matt. 3:1-6).  Hy was as’t ware die boodskapper wat voor die Koning uithardloop om slaggate op te vul en hindernisse uit die pad te verwyder (v.3-4).

 

Johannes het aangekondig dat Jesus die Here en God van Jes. 40:3 is!  In sy Persoon, lering, wonderwerke, kruisdood, opstanding, hemelvaart en wederkoms sou mense God se heerlikheid sien (v.5, Ps. 24:7-10, Hab. 2:14, Matt. 17:2, 25:31, Luk. 9:32, Joh. 1:14, 2:11, 11:40, 17:1, 2Kor. 3:18, 4:4-6, Heb. 1:3, Op. 1:12-17).

 

As ons die Here vra sal Hy sy belofte vervul en hierdie heerlikheid vir ons wys (v.5).  Dit sal miskien nie dadelik jou beproewing wegvat nie, maar dit sal jou help om dit beter te hanteer.  Wat my betref hardloop ons te gou na beraders toe.  Ek is nie teen berading nie, maar glo dat ons eers die Here moet vra om sy heerlikheid vir ons te wys.  As dit gebeur sal jou beproewing nie vir jou soos ‘n berg lyk nie (v.4), en sal ons ook met die regte ingesteldheid na die berader toe kom.

 

  1. God se Woord (v.6-8)

Omtrent ‘n maand gelede toe staan ek en die buurman op die sypaadjie en gesels.  Ek het gister gehoor dat hy oorlede is.  Ons heerlikheid is nie soos die Messias s’n nie, maar is soos gras en veldblomme wat verdor en verlep (v.6-7).  As God se asem oor ons gaan sterf ons (v.7, 24).

 

God se Woord daarenteen bly vir ewig (v.8, Matt. 5:18).  Sy belofte om sy volk te vergewe kan nie faal nie (v.2).  As jy hierdie ewige Woord glo sal jy ook vir ewig lewe (1Pet. 1:23-25).  Leef vir dit wat ewig is en nie vir tydelike rykdom en plesiere nie (Matt. 6:19-20, 1Kor. 7:31, 1Joh. 2:17, Jak. 1:10-11).  ‘Only one life, it will soon be past; only what’s done for Christ will last’ (C.T. Studd).

 

  1. God se arm (v.9-11)

As jong seuns het ons arm gedruk om te kyk wie die sterkste is.  Maar hoe sterk is die Here se arm?  “Het jy dan ‘n arm soos God?” (Job 40:4).  Hy is die onoorwonne kampioen van die heelal; niemand kan Hom wen nie.  En Hy is ons God.

 

Jerusalem of Sion moes van ‘n berg af vir die ander stede in Juda skreeu dat hierdie God hulle sou herstel (v.9).  Sy moes ook die goeie nuus van die Messias se vergifnis aankondig (v.9, 2).  Die goeie nuus of evangelie het inderdaad van Jerusalem af na die res van die land en wêreld toe versprei (2:3, Luk. 24:47, Hand. 1:8).

 

Juda se magtige God sou met sy sterk arm oor haar vyande triomfeer (v.10).  Die magtige Messias of arm van die Here (9:5, 52:10, 53:1) sal kom om sy kinders te beloon en sy vyande te vergeld (v.10, Rom. 2:6-11).

 

Hierdie selfde magtige arm laat God se skape wei, tel die lammers op, en lei dié wat swak is (v.11).  Wat ‘n troos is dit nie in beproewing nie?  Ek is nie verbaas dat Ps. 23 baie mense se gunsteling hoofstuk in die Bybel is nie (veral op grafstene en begrafnisse).  As die Herder van v.11, Ps. 23 en Joh. 10 jóú Herder is, het jy niks om te vrees nie.

 

  1. God se grootheid (v.12-26)

In C.S. Lewis se Chronicles of Narnia vra die heks vir Aslan die leeu hoe sy met sekerheid kan weet hy sal sy belofte hou.  Ewe skielik brul hy sodat sy op haar agterstewe beland.

 

Hoe kon Juda weet dat God die beloftes van v.1-11 sou hou?  Want Hy is die God van v.12-26.  Hy het die oseane, riviere, damme, mere en ondergrondse water in die holte van sy hand afgemeet (v.12).  Hy het die ‘oneindige’ hemelruim met sy handbreedte afgemeet (v.12).

 

Hy het die sand van die woestyne, strande en seebodem in ‘n skaal gemeet (v.12).  Hy het die magtige Himalayas, Rotsgebergtes, Andes, en ander berge saam met die heuwels in ‘n skaal geweeg (v.12).  En wat is nou weer die beproewing waaroor jy stres?

 

God is ‘n oneindige Gees (Ps. 139:7-8, Jer. 23:23-24, Joh. 4:24) en kan nie soos die skepping gemeet word nie (v.13, Heb. tâkan).  Hy is oral in sy volheid teenwoordig.  Hy het nie afmetings nie.  ‘n Puritein uit die 1600’s het gesê: ‘God se senter is orals en sy omtrek nêrens.’[5]

 

Ons kan Hom ook nie raad gee nie (v.13).  Die Babiloniërs se skepper god Marduk kon nie sonder Ea se raad skep nie.[6]  Die ware God is nie so nie en het geskep sonder iemand se insette (v.13-14).  Sy kennis is oneindig en perfek; niemand kan Hom iets leer of vir Hom insig gee nie (v.14, Ps. 139:17-18, 147:5).

 

John Piper sê van sy kennis: ‘[it] makes the Library of Congress look like a matchbox, and all the information on the Internet look like a little 1940’s farmers’ almanac, and quantum physics – and everything Stephen Hawking ever dreamed – seem like a first grade reader’.[7]

 

En dan wil ons vir die Here sê hoe Hy ons probleme moet oplos.  In ons era van wetenskap, tegnologie, filosofie, Google, ens. dink ons ons weet baie, maar eintlik weet ons niks.  Ons verstand is klein en beperk.

 

Daarom is dit ook dom om die Here te probeer uitwerk.  Ek ken twee baie intelligente mense (‘n dokter en ‘n ingenieur) wat alewig besig is om die Here te probeer uitwerk: sy alomteenwoordigheid, ewigheid, almag, ens.  Maar is dit nie beter om saam met Dawid te sê: “O Here, my hart is nie hoog en my oë nie trots nie; ook wandel ek nie in dinge wat vir my te groot en te wonderbaar is nie.” (Ps. 131:1)?

 

Laat vaar jou trots.  Jy ken nie eers 1% van die kennis wat bestaan nie.  Wat weet jy van die wêreld se tale en grammatika, die visse van die see, al die insekte, voëls en diere, die geskiedenis, die menslike liggaam, DNA, kulture, wetenskap, biologie, die sterre, engele, demone, die Bybel, die getal van mense se hare, die sand, die sterre, en God se gedagtes?

 

Almal van ons se kennis saam is soos ‘n enkele sonstraal s’n teen die triljoen x triljoen x triljoen… sonne van God se oneindige kennis.  Ons roem gans te maklik oor ons sandkorrel-grootte kennis wat buitendien van Hom af kom (Spr. 2:6, 1Kor. 4:7).  Berus jou eerder daarby dat God alles weet en dat Hy sal doen wat reg is (v.14).

 

‘Maar wat van my beproewing?’ wou Juda weet.  ‘Wat van die nasies wat teen my is?’  Wat daarvan?  Die nasies is ‘n druppel in die emmer, stof wat die skaal nie eers ‘n millimeter laat roer nie, niks en minder as niks (v.15, 17).  En wat kan ‘n druppel doen aan die God wat die oseane in sy hand afmeet; kan ‘n stoffie Hom seermaak wat die eilande soos stof tussen sy twee vingers optel (v.15, 12)?

 

En as die nasies niks teen die Here kan doen nie, wat van die individu by jou skool of werk wat dinge vir jou moeilik maak?  Moet jou nie verder daaroor bekommer nie, maar gee dit vir die Here (1Pet. 5:7).

 

Laat God se grootheid jou ook help om van jouself te vergeet: jou sg. goeie selfbeeld, jou selfbejammering, jou begeerte om erken te word, jou obsessie met jouself op Facebook, ens.

 

Jy is niks voor die Here nie en kan ook nie genoeg offers bring om sy guns te wen nie (v.16, Job 35:7, Hand. 17:25).  Slegs Hy kon die offer van oneindige waarde voorsien om ons met Homself te versoen (Jes. 53).  Sonder Jesus se kruisdood is daar vir ons geen hoop nie.  Wat jy het en is, is alles a.g.v. Hom.

 

Moet Hom dan nie met ander gode vergelyk nie (v.18).  Hy is een van ‘n soort, heilig en uniek (v.18, 25).  Hy is in ‘n klas van sy eie; daar is nie ‘n ander God soos Hy nie.  Logika sê vir jou dat daar nie twee oneindige en ewige gode kan wees nie.  Om die waarheid te sê kan daar glad nie ‘n ander god wees nie: “Ek is die HERE, en daar is geen ander nie; buiten My is daar geen God nie” (45:5).

 

Moet dan nie TBN se onsin glo wanneer hulle sê dat ons klein gode is nie.  Moet ook nie vir Allah, Vishnu, Krishna, of ander sg. gode in dieselfde asem as Jesus Christus noem nie.

 

Juda het van die Here af weggedraai om afgode te aanbid.  Maar hoe is ‘n houtbeeld wat iemand gemaak en met goud en silwer oordek het, jou skepper (v.19-20)?  En hoekom het mense in ons tyd die idee dat geld jou maak wie jy is?  Die begeerte na rykdom is niks anders as antieke afgodery nie (Matt. 6:24).

 

Van die begin af is dit duidelik dat die Here alles gemaak het (v.21, Rom. 1:19-21).  Hy sit as Koning bo die sfeer van die aarde om daaroor te heers en dit in stand te hou (v.22).  Hy strek die hemelruim uit soos ‘n gordyn of ‘n tent (v.22).  Vanuit sy verhewe posisie lyk die bewoners van die aarde soos sprinkane op ‘n grasperk (v.22).

 

Voor die Koning van die hemel is aardse regeerders soos Jacob Zuma en Robert Mugabe niks (v.23, 17, Joh. 19:10-11).  Hulle is soos plantjies wat sopas gesaai is en skaars wortel geskiet het: hulle vrek as die Here op hulle blaas en is soos stoppels wat in ‘n stormwind wegwaai (v.24, 6-8, Ps. 1:4, 35:5).  Moet Juda dan die koning van Babilon vrees, of sal ons paniekerig raak as Julius Malema in die Here se ore raas?

 

Vrees Hom wat die sterre met sy asem en vingers gemaak het, wat hulle getal bepaal, wat aan elke ster sy naam gee, en wat hulle in die lug hou dat hulle nie koers verloor nie (v.26, Ps. 8:4, 33:6, 147:4-5, Heb. 1:3).

 

Kyk minder op jou selfoon, staan onder ‘n uitgestrekte hemel koepel en besef dat God groter is as wat jy gedink het en jy kleiner.  Moet egter nie soos Juda en Babilon die sterre aanbid nie (47:13, Deut. 4:19); moenie in die Huisgenoot kyk wat die sterre oor die toekoms sê nie, maar aanbid die Een wat die sterre gemaak het (v.26).

 

  1. God se mag (v.27-31)

James se pa is ‘n biljoenêr.  Toe die atletiek seisoen aanbreek toe sê die afrigter dat elke kind die volgende dag R5 skool toe moet bring.  James was bang dat hy nie die geld sou hê nie.

 

Grap jy?  Nee, want dit is presies wat ons met die Here doen.  Al is Hy die God wat ek hierbo beskryf het, dink ons soos Juda dat Hy ons vergeet het (v.27, 49:14).  Maar sal Hy wat die sterre se name onthou sy kinders s’n vergeet?  Het Hy van Juda in Babilon vergeet?  Of vergeet Hy van jou soos ‘n vrou haar kos op die stoof vergeet?

 

Eintlik is daar nie ‘n goeie rede om kleingelowig en depressief te wees nie.  As die Here sterflik en veranderlik was het jy ‘n verskoning gehad, maar Hy is nie.  Hy is nie soos veldblomme en gras nie (v.6-8), maar is ewig (v.28, Eks. 3:14, Ps. 90:2, 102:28).

 

Volgens v.28 het Hy die eindes van die aarde geskep (ook Babilon).  Sy krag kan nie opraak nie; Hy is onveranderlik (v.28, Mal. 3:6, Heb. 13:8).  Selfs wanneer Hy vir ons krag gee het Hy nie minder krag nie (v.28-31).  Ons kan nie die dieptes van sy verstand peil nie (v.28, Rom. 11:33).

 

Benodig jy krag in jou beproewing; voel jy fisies, geestelik en emosioneel uitgeput (v.29-30)?  Vra die Here om jou krag te vermeerder (v.29, 31).  Wag deur gebed op sy beloftes en glo dat Hy vir jou bonatuurlike krag sal gee, sodat jy soos ‘n arend is wat met min moeite bo die aarde sweef (v.31, Ps. 27:14, 103:5, 130:5-6).

 

Met die Here se krag kan jy aanhou, selfs as die stryd so hard soos ‘n maraton is, of so aanhoudend soos iemand wat ver moet loop (v.31): “Ek is tot alles in staat deur Christus wat my krag gee.” (Fil. 4:13).

 

Moenie vergeet dat Jesus die God van Jes. 40 is nie.  Die Herder wat jou in sy arms dra is die God wat die skepping afgemeet het in sentimeters en gramme.  Die Messias met spyker merke in sy hande is die God wie se hande die heelal en oseane afgemeet het.  Dit is ook hierdie hande wat jou deur jou beproewing lei, sodat jy in die toekoms sal getuig van “die goeie hand van my God oor my” (Neh. 2:8).

 

[1] Martyn Lloyd-Jones, The All-Sufficient God, The Banner of Truth Trust, Edinburgh: Scotland, 2005, p. 83

[2] Vry vertaal uit Iain Murray, Pentecost – Today?, The Banner of Truth Trust, Edinburgh: Scotland, 1998, p. 102 n. 1

[3] James Strong, Strong’s Hebrew and Greek Dictionaries, 1890, Public Domain, H3718; Alec Motyer, The Prophecy of Isaiah, Inter-Varsity Press, Leicester: England, 1993, p. 299

[4] Richard and Sabina Wurmbrand: The Underground Pastor and his Wife (DVD)

[5] Vry vertaal uit Thomas Watson, A Body of Divinity, The Banner of Truth Trust, Edinburgh: Scotland, 1958, 1965 (1692), p. 46

[6] Motyer, Ibid., p. 303

[7] John Piper & Justin Taylor (Ed.), Sex and the Supremacy of Christ, Crossway Books, Wheaton: Illinois, 2005, p. 39