Word wakker Here!

Big green alarm clock on dark blue background

My tema klink byna soos lastering, behalwe dat dit in die Bybel voorkom (ek sal later vir jou wys). Ons wil dit nie hardop sê nie, maar soms voel dit vir ons of die Here slaap. Hoekom doen Hy nie iets aan die onreg in die land nie: kinders word ontvoer, die regering het planne om plase te onteien sonder vergoeding, misdaad neem toe, korrupsie is aan die orde van die dag? Dit lyk of die Here anderkant toe kyk vir die gay wette in die weste. En hoekom is die kerk so klein, swak, en lyk dit of ons geen impak het op die samelewing nie? Jes. 51 wys dat die Here ons nie vergeet het nie, en dat Hy sy planne sal uitvoer. Hy is wakker en slaap nie soos ons partykeer dink nie.

 

  1. Voorspoed (v.1-3)

‘n Ouer predikant het vertel hoe hy platgeslaan voel wanneer hy by Prosperity kerke verby ry. ‘Hoekom het hulle so baie mense en ons so min?’ vra hy. Die min mense in die kerk en baie in die wêreld pla my ook. Israel het dieselfde gevoel. Na die ballingskap was hulle uitgedun. Hulle het mismoedig gevoel. Net ‘n paar van hulle het regverdig gelewe en die Here gesoek (v.1). God het hulle nuwe perspektief gegee en vir hulle gesê om te luister (v.1, 4, 7, 17, 21). Hy het hulle daaraan herinner dat Hy hulle uit die steengroef van Abraham en Sara gekap het toe hulle, wat vrugbaarheid betref, so dood was soos ‘n klip (v.1-2). Maar die Here het een man in ‘n menigte verander (v.2, Gen. 12:1-3, 15:5, 22:13).

Hy sou die herstelde stede vir hierdie menigte gee (v.3). Hy sou die stede transformeer om soos die tuin van Eden te lyk (v.3, hfst. 35, Op. 22:1-2). Dit was vir hulle ‘n troos wat sou lei tot vreugde, danksegging en lofgesange (v.3, 40:1, 52:9). Onthou dit wanneer jy voel dat die kerk klein, in die minderheid, hulpeloos en swak is. Kry perspektief. Die kerk het gegroei van ‘n paar honderd in Hand. 2, na meer as ‘n half biljoen evangeliese Christene wêreldwyd. Daar is Christene in elke land op aarde. Deur die eeue was daar miljoene Christene, en in die hemel sal daar ‘n ontelbare menigte wees (Op. 7:9).

Daar is nog mense wat geregtigheid najaag, die Here soek en vind (v.1, 5, 6, 7, 8, 55:6, Deut. 4:29, Jer. 29:13, Dan. 9:3, Matt. 5:6, 6:33, 7:7-8, Fil. 3:9). Jy is nie die enigste een nie en sal eendag in ‘n herstelde Paradys woon waar alles net heilig, vreugdevol en vol lof is (v.3, Op. 21:27, 22:3, 15).

 

  1. Verlossing (v.4-11)

Hoe het wêreld 1000, 2000, 3000 en 4000 jaar gelede gelyk? Baie erger as nou. Daar was nie net partykeer oorlog nie, maar vir baie eeue het die stede mure om gehad en het hulle wagte daarop geplaas. Wat het gemaak dat dit nie meer so is nie? Hoekom is lande soos die V.S.A., Engeland, Duitsland, Switserland, Australië en Nieu-Seeland so ver voor die res?

Dit is a.g.v. die evangelie en die Bybel. God se wet en Woord is die lig wat uit die verlede tot in ons tyd en wêreldwyd skyn (v.4-5, 2:3, Ps. 119:105). God se arm, die Messias, het hierdie voorspoed gebring (v.5, 2:4, 53:1). Hy vervul en versadig ons hoop (v.5).

Wil jy die volgende geslag beïnvloed? Leer hulle die evangelie en die Bybel (v.5-6). Moenie dink dat dit ‘n klein taak is as jy jou kinders opvoed of in die Sondagskool en jeug betrokke is nie. Die verlossing wat jy deel strek wyer en verder as wat jy besef.

Die hemel sal soos rook verdwyn, die aarde soos ‘n verslete kleed, en die mens soos ‘n muggie of muskiet (v.6, 8, Ps. 102:26-28, Matt. 24:35, 2Pet. 3:10-12, Op. 20:11, 21:1). Maar die verlossing wat jy met jou kinders en ander mense deel duur vir ewig (v.6, 8). Moet dus nie jou taak ligtelik opneem of dit afskeep nie. Maak erns daarmee. Skep weer moed en tel die gebreekte stukke op as jy verflou het.

Dalk vrees jy dat die EFF en ander vervolgers God se verlossing sal keer, sodat jou kinders dit mis. Moenie bang wees nie: as die wet in hulle harte is, kan niemand dit wegvat nie (v.7, Ps. 37:31, Jer. 31:33, 2Kor. 3:2-3, Heb. 8:10). God se verlossing is vir ewig, maar wurms sal die kerk se vyande opeet (v.8, 6, 50:9).

Met die vyand rondom jou wonder jy dalk of die Here slaap (v.9, Ps. 44:24, Luk. 8:24). Jy wonder waar God se sterk arm, die Messias, is. Waar is God se arm wat die dood oorwin het, Israel uit Egipte verlos het, Egipte soos ‘n draak in stukke gekap het en Israel deur die Rooi See gelei het (v.9-10, 30:7, Eseg. 29:3)?

Hy slaap nie. Hy het ons van die sonde bevry en lei ons na die Nuwe Jerusalem waar ons nie meer hartseer sal wees en sug nie, maar lofliede vol blydskap sal sing (v.11, 3, 35:10, Rom. 8:18-27, Op. 7:17, 21:4). Hy is die God wat baie mense gered het in Handelinge, die Reformasie en die herlewings in die kerk se geskiedenis (v.9). En kan sy sterk arm nie weer die Heilige Gees in herlewing stuur en groot getalle red nie? Het die slegte samelewing Hom nou gekeer dat Hy nie meer in staat is om te red nie? Is Suid-Afrika, die wêreld en die kerk te sleg, sodat Hy nie weer ‘n herlewing kan stuur nie? Jy is kleingelowig as jy so dink.

 

  1. Vertroosting (v.12-16)

Wat dink jy van verjaarsdag boodskappe wat deur ‘n bulk sms stelsel gestuur word? Ek ignoreer dit. Dit is onpersoonlik en koud. Die Here se troos is nie so nie. Hy is betrokke en troos jou persoonlik (v.12, 3, Joh. 14:16, 2Kor. 1:3). Sy teenwoordigheid beteken jy hoef nie die vyand en jou vervolgers te vrees nie: hulle sal so gou sterf soos gras (v.12, 6-8, 40:6-8).

Wie vrees jy dat jy die Here vergeet wat ‘n 13-biljoen-ligjaar-hemelruim (of groter) uitgestrek het, wat die aarde op niks hang en die see se magtige golwe teen die rotse laat slaan (v.13, 15, 40:12, Job 26:7)? Wie is die vyand wat jou verdruk? Wie is hierdie vyand teen die ewige en almagtige God (v.13, 14:4)? Eendag sal jy jou vyand soek en nie vind nie (41:12). Moet daarom nie mense vrees nie (Spr. 29:25). Die Here sal jou red van die vyand wat jou verdruk (v.14). Jy sal nie in die kuil van die doderyk afsak nie; die Here sal jou versorg (v.14, Eks. 16, Matt. 6:11).

Glo jy nie in die Here nie, sodat jy vrees? Is die Here nie jou God en jy sy kind nie (v.15-16)? Is Hy nie die soewereine Here van die hemelse weermag nie (v.15)? Sal Hy jou dan vergeet? Is jy biddeloos en versaak jy die Bybel, asof die Here dood is? Jy kort die medisyne wat Martin Luther se vrou vir hom gegee het. Luther was depressief. Sy vrou en kinders het swart klere aangetrek. Luther het gesê: ‘Ag nee! Wie is dood?’ Kate (sy vrou) het geantwoord: ‘Het jy nie gehoor dat God dood is nie? My man, Martin Luther, sou nooit so depressief gewees het as hy die lewende God gehad het om op te vertrou nie.’ [Vry vertaal uit Charles Spurgeon, Commentary on Isaiah (Titus Books, 2014), note on Isaiah 41:19].

God het sy woorde in die Messias se mond gesit (v.16, 50:4). Hy wil deur die Woord en gebed met jou praat. God het die Messias in die skaduwee van sy hand gehou, en Hom op die regte tyd geopenbaar (v.16). Hy het sy nuwe skepping in ons kom maak en ons deel gemaak van sy volk in die Nuwe Jerusalem (v.16, 49:2, 2Kor. 5:17). Ons kan nie lewe soos mense wat voor die kruis bestaan het, soos mense wat nog nie die daglig van sy verlossing gesien het nie.

Ek moes hierdie week vir die Here jammer sê dat ek in my beproewing kla en Hom nie dank soos Ef. 5:20, 1Tess. 5:18 sê nie. Wat van jou? Vergeet jy wie die Here is en wat Hy gedoen het om jou te verlos? Hoekom kla jy dan oor alles wat verkeerd is en dank jy Hom nie meer vir sy Seun, jou redding, sy seën, en alles wat reg is nie?

 

  1. Vergifnis (v.17-23)

Toe my jongste dogter klein was het sy altyd aan die slaap geraak wanneer die res van die gesin dinge geniet. Israel het gesê dat die Messias slaap, maar eintlik het sý geslaap terwyl die Here groot dinge doen (v.17, 9). Nou moes hulle wakker word, opstaan, en terugkeer na die Messias en Nuwe Jerusalem toe.

Die straf was verby; hulle het die beker van God se toorn leeg gedrink (v.17, Ps. 75:8, Jer. 25:15). Toe God Jerusalem in sy toorn straf, is die stad verwoes en het mense dood in die strate gelê soos ‘n bok in ‘n vangnet (v.18-20, Klaagl. 2:11-12, 19, 21). Daar was niemand oor om die volk te lei en te troos nie (v.18-19). Hulle het onder God se toorn gesteier soos iemand wat dronk is van wyn (v.21). Maar die Here het hulle gehelp, vergewe en vir hulle opgestaan (v.22). Hulle sou nie meer uit die beker van sy toorn drink nie (v.22, 7). Babilon sou nou daaruit drink (v.23, Jer. 25:17, 26, 28). Hulle het op Israel getrap soos wat ‘n mens op die grond en strate trap, maar nou sou die Here hulle straf (v.23).

In die Nuwe Testament het die Messias die bitter beker van God se toorn gedrink. Ons moes hierdie beker drink, maar Hy het dit gedoen sodat ons die beker van sy verlossing kan geniet (Ps. 116:13, Mark. 14:36, Joh. 18:11, Op. 14:10-11). Prys Hom daarvoor en onthou dit wanneer jy die nagmaal gebruik (Mark. 14:23-24).

Dalk verkies jy die kelkie omdat jy siek is, omdat een beker wat die rondte doen te lank vat, of vir higiëniese redes. Die beker herinner jou egter aan die beker van God se skrikwekkende toorn en sy lieflike verlossing. Drink uit die beker as jy kan, of sien dit ten minste op die tafel. Verbly jou in die Here wat die beker van verlossing en seën in jou lewe laat oorloop (Ps. 23:5).

Die feit dat jy in God se liefde en verlossing rus, beteken nie Hy slaap nie. Hy is wakkerder as ‘n uil in die nag, of ‘n man wat sopas tien double espresso’s gedrink het. Hy waak altyd oor jou: 24 uur ‘n dag, 7 dae ‘n week, 365 dae per jaar, vir altyd en ewig. “…jou Bewaarder kan nie sluimer nie. Kyk, die Bewaarder van Israel sluimer of slaap nie.” (Ps. 121:3-4).

Christene in beproewing

Boat on stormy sea

Oor die afgelope vier maande het ek met verskeie Christene gepraat wat deur moeilike beproewings gaan. In ons eie gemeente is daar sonde. Ek het ook binne ses weke drie roudienste gehou (daar is maar net 70 mense in ons gemeente).

Ek ken meer as een predikant wat op die oomblik teenkanting van die gemeente kry, en weet ook van gemeentes waarin die mense links en regs bedank. Ek weet van sendelinge wat baie sukkel om visums te kry, en wat ook ernstige konflik beleef het met ander Christene.

‘n Skelm besigheidsman het R10 000 by een van my familielede gesteel en spoorloos verdwyn. ‘n Skoolkind het my swaer (wat ‘n onderwyser is) met ‘n yster geslaan. Volgens die Departement van Onderwys mag hulle die kind nie skors nie. Vandag het kinders by dieselfde skool ‘n juffrou met ‘pepper spray’ gespuit. Daar is nie gevolge vir hulle optrede nie. Suid-Afrika is ‘n drukpot wat wag om te ontplof: boere word op hulle plase vermoor, die regering wil grond gryp sonder vergoeding, ens.

Die punt is dat ons beproewing nie kan keer nie, maar dat ons dit moet verwag. Die vraag is wat jy met die beproewing gaan doen? Sal jy ongehoorsaam reageer soos Israel? Of sal jy gehoorsaam wees soos die Messias? Jes. 50 leer ons om beproewing reg te hanteer.

 

  1. Twee voorbeelde van beproewing (v.1-9)

 [A] Israel (v.1-3)

‘n Geskeide man het vir my gesê: ‘Egskeiding is die ergste ding wat ek nog ooit deurgemaak het.’ ‘n Ander een het vir my gesê: ‘As jy skei, voel dit of iemand doodgaan.’

Toe Israel in Babilon was het dit vir haar gevoel of God haar skei. Maar sy was verkeerd. Sy het nie ‘n skeibrief gehad om dit te bewys nie (v.1, Deut. 24:1). Dit het vir haar gevoel of die Here haar verkoop soos ‘n pa wat sy kinders verkoop om die skuldeiser te betaal. Maar niemand het van buite af druk op Hom geplaas toe Hy die volk verkoop nie (v.1). Hoekom het die Here haar dan Babilon toe gestuur? Hy het die volk vir haar sonde as ‘n slaaf verkoop (v.1). Hy was van plan om haar terug te koop (hfst. 53, 1Pet. 1:18-19). Hy het haar nie geskei nie, maar tydelik weggestuur a.g.v. haar egbreuk (v.1, Hosea). Alles was dus nie verlore en onherstelbaar soos sy gedink het nie.

Moenie soos Israel in jou beproewing dink dat die Here jou vergeet het nie. Die beproewing is tydelik (Job 7:7, Ps. 77:8-10). Dit sal nie altyd donker bly nie; die son sal weer opkom (Ps. 30:6, 42:6, 12, 103:9).

Israel het die Here vir haar lyding blameer, maar eintlik het die skuld by haar eie deur gelê. Toe die Here mooi na haar geroep het, het sy Hom geïgnoreer (v.2, 2Kron. 36:15-16, Spr. 1:24). Hoekom het sy so gereageer? Was dit omdat die Here se hand te swak en te kort was om haar te help (v.2, 59:1)? Verseker nie. Hy het haar dan uit Egipte gered: Hy het die Rooi See oopgekloof, die Jordaanrivier laat opdroog, die visse in die Nylrivier laat vrek, en Egipteland donker laat word (v.2-3).

Ons is soos Israel. Ons luister nie wanneer die Here mooi praat nie. Ons onthou nie sy krag nie en vra nie gereeld sy hulp nie. Soms moet dit eers moeilik gaan voor ons ore oopgaan en ons Hom deur gebed aanroep.

Kon die God wat Israel uit Egipte gered het haar nie uit Babilon red nie? En kan Hy jou nie van jou sonde red of ‘n sondige gewoonte van baie jare breek nie? Kan Hy jou nie uit die beproewing red nie? Kan Hy ons land nie van oorlog red nie? Kan Hy jou geliefdes nie red en hulle verander nie? Die vraag is nie of Hy dit kan doen nie, maar of jy jou sal bekeer, Hom sal vertrou en sonder ophou daarvoor sal bid?

[B] Die Messias (v.4-9)

Beproewing toets ons gehoorsaamheid soos wat vuur goud toets. Toe God die Messias deur lyding toets, was Hy nie ongehoorsaam soos Israel nie (v.1-2), maar ten volle gehoorsaam (v.4-9). Dalk sê jy: ‘Maar vir Hom was dit maklik, omdat Hy God is.’ Dit is nie waar nie. Alhoewel Jesus God is, het Hy ook ten volle mens geword soos ek en jy. Hy moes die Bybel leer soos ons. Hy het nie sonde gedoen nie, maar moes gehoorsaamheid leer (Heb. 5:8). Hy het nie uit sy Goddelike natuur ‘getap’ om dinge vir Homself makliker te maak nie, maar het op sy Vader gewag (sien bv. Matt. 4:3-4).

Die Vader het Hom daagliks deur die Woord en gebed geleer (v.4). Hy het geleer soos iemand wat die beste opleiding ontvang het (v.4). Hy het nie net geleer om dit beter te ken nie, maar sodat Hy dit met groot effek kon gebruik om ander te bemoedig (v.4, Matt. 11:28, Luk. 24:27, Joh. 4).

Die Vader het Hom geleer om die presiese woorde te sê wat elke mens benodig (v.4, Joh. 12:49-50). Die Vader het Hom in die oggend wakker gemaak vir sy stiltetyd (v.4, Mark. 1:35). Dit was o.a. sy daaglikse gemeenskap met God wat aan Hom die krag gegee het om sy lyding te verduur.

En as Jesus ‘n stiltetyd nodig gehad het, hoeveel te meer het ons dit nie nodig nie? Laat ons sy voorbeeld volg (1Joh. 2:6). Jou stiltetyd is een van die middele wat die Here jou gee om deur beproewing te kom. Waar moet jy begin?

Vra vir vergifnis as jy verslap het. Jy het elke dag nuwe krag en genade nodig (v.4, Klaagl. 3:23, 2Kor. 4:16). Bid vir selfdissipline en neem ook stappe om te verander.

[a] Kies vir jou ‘n tyd. Party mense verkies die aand, maar dit is goed as jy die dag met God begin (v.4, Ps. 5:3). In die oggend is jy vars, terwyl jy na ‘n dag se werk moeg is. Dit is ook goed as jy stil raak met die Here, voordat jy ander mense en die las van die dag se werk in die gesig staar.

In the morning deep calls to deep

In the morning, you quietly speak.

In the morning, you find those who seek,

In the morning.

In the morning, I bring my request.

In the morning, each care is confessed.

In the morning, you quiet unrest

In the morning.

In the morning, I listen and wait.

In the morning, faith anticipates.

In the morning, you make my way straight,

In the morning.

-Steve Green-

[b] Kry genoeg slaap. Probeer om elke aand dieselfde te tyd te gaan slaap. Vra die Here om jou te help om op te staan wanneer jou wekker afgaan (v.4). Moenie bly lê wanneer jy wakker word nie, want anders sal jy dalk weer aan die slaap raak. Staan op en was jou gesig of stort as dit jou help om wakkerder te voel. Stap en bid hardop as dit jou help.

[c] Begin dalk met ‘n kort oordenking. Charles Spurgeon se Morning by Morning is gratis beskikbaar op die internet. Dit sal jou aan die gang kry en jou hart warm laat voel.

[d] Bid kortliks dat die Here jou oë sal oopmaak om te verstaan wat jy in die Bybel lees (Ps. 119:18).

[e] Kies ‘n gedeelte. Moenie rond en bont lees nie. Werk deur ‘n boek of onderwerp in die Bybel.

[f] Lees die gedeelte. Soek kruisverwysings op. Dink na oor die vers of verse wat vir jou uitstaan. Kies ‘n metode wat vir jou werk. Na ‘n jaar of twee kan jy dalk jou metode verander. Maak notas indien dit jou help. Moenie die Bybel koud en akademies lees nie. Vra dat die Here jou ore sal oopmaak om te hoor wat Hy vir jou wil sê (v.4).

[g] Bid wat jy uit die Skrif geleer het. Bid ook volgens die Onse Vader. Moet dit nie as ‘n rympie bid nie, maar gebruik dit as ‘n patroon. Kom na God toe soos ‘n kind wat na sy pa toe kom. Kom om met respek, omdat Hy die Koning van die hemel is. Bid soos volg:

Laat U Naam geheilig word: Prys en dank die Here vir alles waaraan jy kan dink. Bid ‘n Psalm. Sing lofliede. Gebruik ‘n CD as jy wil: Steve Green, Keith & Kristyn Getty, Stuart Townend, Isaac Watts en Charles Wesley se liede het goeie Bybelse inhoud.

Laat U Koninkryk kom: Bid vir God se werk in jou gemeente. Bid vir jou leraar, evangeliste, sendelinge en herlewing. Bid spesifiek. Bid vir jou geliefdes, kollegas, bure en vyande wat nie die Here ken nie.

Laat U wil geskied: Bid vir insig om die Bybel beter te ken en te gehoorsaam.

Gee ons vandag ons daaglikse brood: Bid vir jou eie behoeftes en arm gelowiges. Bid vir geleenthede om met ander te deel.

Vergewe ons ons skulde soos ons ons skuldenaars vergewe: Bely jou sonde so spesifiek as moontlik. Vergewe ander teen wie jy iets het.

Lei ons nie in die versoeking nie, maar verlos ons van die Bose: Vra dat die Here jou teen die vyand se versoeking sal beskerm.

Maar om net die Bybel te lees en te bid is nie genoeg nie. Die Messias se ore was oop om God se wil te doen (v.5, Ps. 40:7, 9). Hy was gehoorsaam tot aan die einde, en nie rebels soos Israel nie (v.5, 1, Fil. 2:8). Soos die Messias moet jy nie net die Bybel oordink om dit beter te ken nie, maar omdat jy gemeenskap met God wil hê en omdat jy Hom wil gehoorsaam (v.4-5). Moenie rebels wees nie, maar maak jou ore oop (v.5). Dit sal nie die beproewing wegvat nie, maar dit sal help dat jy deur dit kom.

‘n Liefde vir die Vader en ‘n verhouding met Hom het die Messias gehelp om nie rebels te wees en terug te draai nie, maar om deur die lyding van die kruis te kom (v.5). Hy het sy rug gegee dat sy vervolgers Hom gesel, sy wange dat hulle sy baard uitpluk, sy gesig dat hulle Hom slaan en spoeg, eerder as om sy rug op die Vader se wil te draai (v.6, Matt. 26:67-68, 27:26, 30, Joh. 19:1). Om gehoorsaam te wees was vir Hom belangriker as om die pyn vry te spring.

Wees soos Jesus. Moenie ‘n slaaf wees van drank, dwelms of pille, omdat jy die pyn wil vryspring nie. Moenie op onwettige maniere jou sake doen, omdat die regering dinge vir jou moeilik maak en jou nie wil help nie. Bo alles moet jy God se wil doen, al veroorsaak dit ongemak en pyn (Op. 12:11).

Die Vader het die Messias gehelp om die pyn te verduur (v.7). A.g.v. hierdie hulp het Hy vasberade en gefokus kruis toe gegaan (v.7, Luk. 9:51). Sy wenkbroue het gefrons en sy oë het stip vorentoe gekyk, sodat sy gesig so hard gelyk het soos ‘n grys keisteen (v.7). Hy het geweet dat mense Hom sal verneder (v.6), maar op die einde sou die Vader Hom verhoog en sou Hy nie in die skande kom nie (v.7, Fil. 2:9-11, Heb. 12:2).

Wees vasberade soos Hy: doen God se wil in beproewing, al is dit moeilik (Hand. 20:24). Op die einde sal God jou daarvoor beloon en sal jy nie skaam kry nie (v.7).

Die Vader was by die Seun en het sy onskuld bewys toe Hy Hom uit die dood uit opwek (v.8, Hand. 2:24, Rom. 1:4, 4:25). Jesus het geen sonde gehad nie en tydens sy verhoor het die Vader Hom gehelp, sodat sy vyande Hom nie kon vastrek nie (v.8-9, Matt. 26:59-60, Joh. 8:46, 2Kor. 5:21, Heb. 4:15, 1Pet. 2:22). Hy het die straf vir ons sonde gedra (53:4-6).

Ons kan nie onskuld pleit soos Hy nie (Rom. 3:10-12, 23). Daarom sal ons verslyt soos klere wat iemand baie dra en was; soos klere wat vol gate is a.g.v. die vismotte (v.9). Tog sal Jesus sy regverdige rekord vir jou gee as jy berouvol glo. As jy glo sal die Vader sy dood in jou plek aanvaar en jou skuld afskryf (Rom. 3:28, 5:1, 2Kor. 5:21, Kol. 2:14). God sal by jou wees om jou te verdedig, sodat niemand ‘n klagte teen jou kan inbring nie (v.8-9, Rom. 8:33-34, Fil. 3:9, 1Joh. 2:1). En as God vir jou is, is enige beproewing draaglik.

 

  1. Twee reaksies op beproewing (v.10-11)

 [A] Geloof (v.10)

‘n Man het blykbaar vir Spurgeon gesê dat hy perfek is. Spurgeon het hard op sy toon getrap om sy reaksie te toets. Pyn het ‘n manier om te wys wat in jou hart is: murmurering, bitterheid, kwaad, vrees, ongeduld, ongeloof, arrogantheid, nederigheid, ‘n sagte hart, geduld, eerbied vir Here, liefde, iets anders?

Hoe reageer jy in beproewing? Vrees jy die Here, sodat jy jou bekeer en onder sy swaar hand neerbuig (v.10, 1Pet. 5:6)? Gehoorsaam jy God se Seun en Kneg (v.10); is jy gehoorsaam soos wat Hy was (v.4-5)? Vra jy na God se wil, omdat jy gehoorsaam wil wees? Volg jy die Here in voorspoed en in teëspoed (v.10, 4-6)?

Vertrou op die Here as dit donker is en jy geen lig sien nie (v.10, Miga 7:8). Hy was self daar en weet hoe om uit te kom (v.6, 42:16, Matt. 27:45-46). Vertrou dat God wys, goed en kragtig is in jou beproewing. Hy weet wat Hy doen en sal jou help. Vertrou sy karakter en weet dat sy lig vir jou die pad sal wys (v.10, Joh. 8:12).

[B] Ongeloof (v.11)

Ek ken ‘n vrou wat gesien het dat sy word oud en nie gaan trou nie. Om haarself uit te help het sy met ‘n man geslaap en ‘n kind gekry. Luister: as jy die Messias se bevele ignoreer, die donker beproewing omseil en jou eie vuur aansteek, sal jy sleg daarvan afkom (v.11). Loop gerus in die lig van jou eie fakkel, maar op die einde sal jy in die donker struikel en val (v.11). God sal jou in die hel straf. Dit is immers waar die pad wat jy vir jouself gekies het eindig (v.11).

Dit help nie jy kies die kortpad om jou lyding te omseil nie, want op die einde sal jy vir ewig in die hel ly (v.11). Volg die regte pad, al is dit nie noodwendig die maklike pad nie. As jy dit kies sal die Here jou help. Maar as jy dit nie kies nie, is jy op jou eie.

Moenie so bang wees vir beproewing nie. Dit is ‘n tipe winter wat nodig is, sodat die lentebloeisels en somervrugte kan uitkom. John Bunyan het gesê: ‘It is said that in some countries trees will grow, but will bear no fruit, because there is no winter there.’ [Aangehaal in https://www.desiringgod.org/messages/to-live-upon-god-that-is-invisible%5D.

Bunyan kry sy idee in die Bybel. In Heb. 12:11 lees ons: “Nou lyk elke tugtiging of dit op die oomblik nie ‘n saak van blydskap is nie, maar van droefheid; later lewer dit egter ‘n vredevolle vrug van geregtigheid vir die wat daardeur geoefen is.”

Maak die beste van jou beproewing

Blacksmith

Stuart Olyott het eenkeer in ‘n preek gesê: ‘Dit is nie beproewing wat jou heilig maak nie, maar jou reaksie daarop.’ Ons moet reg reageer op ons beproewings en dit nie mors nie. Toe ek eenkeer deur ‘n beproewing gaan, toe vra ek ‘n vriend om vir my te bid. Sy reaksie het my gehelp: ‘I want to encourage you not to waste this time of discouragement. The Puritans used to say that it was common sense to put the seal of the wax on when it was soft. You are tender right now. The wound is open… I want to encourage you to seek what the Lord can teach you in this time, while the wound is open.’

Toe John Piper jare gelede kanker kry, toe skryf hy ‘n boekie met die titel: ‘Don’t waste your cancer.’ Hy wou sy kanker gebruik om die Here te dien en te verheerlik. Ons moet so wees. Moenie heel eerste bid dat die Here die beproewing sal wegvat nie, maar dat jy daaruit sal leer. Anders is jou beproewing so sinneloos soos Israel s’n in Jes. 48.

 

  1. Skynheiligheid (v.1-2)

Het jy al ouers ontmoet wat vier of vyf keer dieselfde ding vir hulle kinders sê, omdat hulle nie luister nie? Omdat Israel nie wou hoor nie (v.8), moes die Here vier keer vir hulle sê om te luister (v.1, 12, 14, 16). Israel het gesê dat hulle God se volk is, en dat hulle uit Jakob ontspring het soos wat ‘n rivier uit ‘n fontein ontspring (v.1, Ps. 68:27). Hulle het by die God van Israel gesweer en gesê dat Hy húlle God is (v.1, Deut. 6:13, 10:20).

Maar hulle het dit nie opreg en in waarheid bedoel nie (v.1). Hulle het m.a.w. by Hom gesweer, terwyl hulle leuens vertel (Lev. 19:12, Matt. 23:16-22). Hulle het bely dat hulle Hom ken, maar hulle het Hom nie in hulle harte liefgehad nie (29:13). Hul het geroem dat hulle van die heilige stad (Jerusalem) af kom, en dat hulle op die God van Israel, die Here van die leërskare, steun (v.2). Hulle het gedink dat hierdie dinge outomaties vir hulle seën bring. Is dit enige wonder dat die Here hulle getugtig het?

Ons moenie soos hulle wees nie. Moenie in jou Baptiste, Dopper of enige ander identiteit roem, en dink dat die Here jou daarvoor sal seën as jy in die week in sonde leef nie. Moenie soos Israel die Here se Naam bely, terwyl jy ongehoorsaam lewe nie (Luk. 6:46, Tit. 1:16). Lei eerder ‘n lewe wat by jou Christelike getuienis pas (Ef. 4:1, Fil. 1:27, Kol. 1:10). Hoe mense jou by die kerk, die werk, die braai en in jou familie sien, moet met mekaar ooreenstem en ‘n geheelbeeld vorm.

 

  1. Hardkoppigheid (v.3-8)

Rifrûe is bekend vir hulle hardkoppigheid. Hulle luister vir hulleself. My rifrug luister net as dit hom pas. God het geweet dat Israel so is. Hulle was hardkoppig in Egipte, in die woestyn, in die tyd van die Rigters en Israel se konings, en met die profete. Hulle het onbuigbare en harde nekke gehad soos yster; hulle voorkoppe was soos brons sodat hulle nie van gedagte wou verander nie (v.4, Deut. 9:24, Eseg. 3:7, Hand. 7:51).

Daarom het die Here lank voor die tyd gesê dat Hy sy volk gaan bevry en nuwe dinge gaan doen. Hy het dit vooraf gesê, sodat Israel dit kon sien, hoor en die Here erken. Hy wou nie hê dat hulle moes sê hulle het dit lankal geweet, of dat hulle afgode hierdie verlossing bewerk het nie (v.5-8, Eks. 10:4). Die afgode kon nie die toekoms voorspel en dit uitvoer soos die Here nie (v.3, 41:22-23).

Maar t.s.v. die Here se voorspellings het Israel rebels gebly. Hulle ore was nie oop vir die Here nie (v.8). Hulle was ontrou en rebels soos voor hulle geboorte (v.8, Gen. 25:22, 26, Ps. 51:7, 58:4). Dit is tragies as ons soos hulle is en die beproewing nie help nie. Die beproewing is ‘n vuuroond, maar as jou hart hard is bak die beproewing jou harder.

Bid dat die Here jou hart van klip sal uithaal en vir jou ‘n hart van vlees sal gee wat sensitief is vir Hom (Eseg. 36:26). Bid vir ‘n hart wat gewillig is om te verander; ‘n hart wat sag is sodat die Here dit kan vorm. Bid vir oop ore, sodat jy kan hoor wat Hy jou wil leer (v.8, Ps. 119:71).

 

  1. Beheerstheid (v.9-11)

Wanneer ‘n pa met sy 5-jarige seuntjie stoei, hou hy terug sodat hy nie die kind seermaak nie. Die Here is so. Hy het sy krag beheer en nie vir Israel volgens haar rebelsheid gestraf nie (v.8-9). Tot sy eer het Hy die volk gered. Omdat Hy wou hê dat sy Hom moet prys en dat die nasies Hom nie moet belaster nie, het Hy haar nie afgesny nie (v.9, 11, Eks. 20:7, Eseg. 36:20-23, Matt. 6:9, Rom. 2:24).

God het sy volk uit die smeltkroes van ellende in Egipte gered (Deut. 4:20). As Hy haar soos silwer in die smeltkroes gelos het om die onsuiwerhede weg te brand, sou sy verwoes gewees het omdat sy byna nét uit onsuiwerhede bestaan het (v.10, 1:22). God se tugtiging in Babilon was ook nie genoeg om Israel se onsuiwerhede weg te vat nie (v.10, Jer. 6:29-30). Die Here moes haar weer suiwer.

Die Here doen dit met ons ook. Dit is genade, want as Hy ons in een sessie moes suiwer het Hy ons a.g.v. die sonde in ons harte weggebrand. Die Here tugtig ons nie na verdienste nie (Ps. 103:10, 130:3). Prys Hom daarvoor! Hy tugtig ons om Homself te verheerlik. Sy eer moet ook ons doel wees wanneer Hy ons tugtig (v.11).

Moenie geld, jou goeie planne, die feit dat jy koel kop gebly het, die internet, jou intellek, ander mense, of enige afgod prys as jy deur die beproewing gekom het nie. Gee aan God alleen die eer: Soli Deo Gloria (v.11). Vra jouself hoe jy Hom kan verheerlik in jou beproewing, en nie net hoe jy gou uit dit kan kom nie (v.11). Dink meer aan die heerlikheid van God as aan jou eie gemak (v.11).

 

  1. Liefde (v.12-16)

‘n Man wat aan dwelms verslaaf was het vir my gesê dat sy ma hom nooit weggegooi het nie, maar dat sy hom altyd versorg het. Israel was so. Selfs toe sy opgemors het, het die Here weer met haar gepraat en haar daaraan herinner dat sy aan Hom behoort (v.12). Die God wat haar geroep het is die Eerste uit wie alles ontstaan het, die Laaste vir wie alles bestaan (v.12, 41:4, 44:6, Op. 1:8, 17, 2:8, 22:13). Hy het die fondasie van die aarde gelê, die hemel uitgesprei, en hou alles deur sy mag in stand (v.13, 40:12, 22, 42:5, Job 38:4-7, Kol. 1:17, Heb. 1:3). Soos wat die skepping na God luister, moes Israel na Hom luister (v.14). Wat het Hy vir haar gesê?

Anders as die afgode kon die Here sy volk uit Babilon vrylaat (v.14). Hy het sy volk liefgehad en Babilon om hulle ontwil gestraf (v.14, Deut. 7:7-8). Hy het vir Kores geroep en gemaak dat hy suksesvol teen Babilon veg (v.15, 45:1-2, 46:11). Soos die Here duidelik deur Moses en die profete gepraat het, het Hy die volk duidelik van Kores vertel (v.16, 45:19). In die Nuwe Testament het Hy die Messias en die Heilige Gees gestuur om duidelik met die volk te praat (v.16, Joh. 1:1, 14, 18, 16:13). Die Drie-Enige God het met sy volk gepraat (v.16).

Hoe help v.12-16 jou in beproewing?

[a] Die ewige, Drie-Enige Skeppergod is vir jou in beproewing (Rom. 8:31). Dalk voel jy soos Job en dink jy dat Hy teen jou is, maar Hy is lief vir jou (v.14). As jy aan sy liefde twyfel, dink aan die kruis (Rom. 8:32, 1Joh. 4:10).

[b] Die Here sal jou red van die vyand wat jou onderdruk (v.14). Satan sal nie vir altyd die oorhand hê nie. “En die God van vrede sal die Satan spoedig onder julle voete verbrysel.” (Rom. 16:20).

[c] Moenie die Bybel afskeep in jou beproewing nie. Volhard in jou stiltetyd en luister na wat die Here vir jou sê (v.16). Lees en bid veral die Psalms.

 

  1. Boosheid (v.17-22)

Waaraan dink jy as jy die woord ‘boosheid’ hoor? Verkragting, moord, seksuele losbandigheid, dronkenskap, vuil taal? In v.17-22 gaan boosheid oor Israel wat haar voordele misbruik het en nie ná die tugtiging teruggekeer het na God toe nie. Hy het haar verlos, is die Heilige van Israel en haar God, het haar geleer om voordeel te trek uit die Woord en ‘n persoonlike verhouding met Hom, en het haar op die regte pad gelei (v.17, 30:21, Ps. 25:12, 119:105).

Maar sy het nie geluister nie. Sy het die Here se gebooie geïgnoreer en sy vrede en geregtigheid wat so aanhoudend is soos ‘n rivier en die golwe van die see, verbeur (v.18). Verder het Israel ook die Here seën verbeur. Hy het haar nageslag uitgedun, sodat sy nie soos die sand van die see was nie (v.19, Gen. 13:16, 22:17).

Die Here het egter ‘n oorblyfsel uit Babilon laat terugkeer, aan haar groot blydskap gegee, en gesê dat sy dit aan die nasies moet verkondig (v.20). Hy het ook vir die volk voorsien soos Hy met die uittog uit Egipte water uit die rots voorsien het (v.21, Eks. 17:1-7). Maar Israel het die Here se goedheid verag en boos gebly (v.22). ‘Leaving Babylon, the people do not escape from their own character… To come home to Canaan is not to come back to God.’ [Alec Motyer, The Prophecy of Isaiah (Leicester: Inter-Varsity Press, 1993), 382].

Die vraag wat jy jouself dus in beproewing moet vra, is of jy jou sonde gelos het om terug te keer na die Here toe? Het jy jou opnuut aan Hom toegewy? Het jy Hom vir Jesus se kruisdood gedank, omdat daar by Hom oorvloedige genade is? As jy met jou sonde aanhou en nie deur Jesus se kruisdood vergifnis ontvang nie, sal jy nooit vrede hê nie (v.22, 57:21).

As die beproewing jou nie verander nie beteken dit so min soos Israel se 70 jaar in Babilon: hulle was so ongehoorsaam, boos, hardkoppig en onveranderd soos voorheen (v.22, 18, 45:25). Met dit in gedagte het ‘n sendeling eenkeer vir my gesê: ‘Learn your lessons wel, want as jy dit nie leer nie sal die Here jou daardeur vat totdat jy jou les geleer het.’

Jy sal soos ‘n perd wees wat ‘n stang in sy bek moet kry om naby die Here te bly (Ps. 32:9). Moenie so wees nie. Dit is baie beter om Petrus se raad te volg: “Verneder julle dan onder die kragtige hand van God, sodat Hy julle kan verhoog op die regte tyd. Werp al julle bekommernis op Hom, want Hy sorg vir julle.” (1Pet. 5:6-7).

 

Die beste troos in beproewing

Eagle Soaring

Waaroor gaan die top-verkoper boeke in Christelike boekwinkels?  Nie oor God nie, maar oor hoe jý ‘n beter mens kan wees.  Martyn Lloyd-Jones het dit reg gehad: ‘Our thoughts revovle around ourselves.  We think we are the centre of the universe.  But we are not, my friends.’[1]

 

Jesaja se benadering om ons in beproewing te troos is heeltemal anders as moderne Christenskap s’n.  Jes. 40 begin nie by mense nie, maar by God.

 

  1. God se vergifnis (v.1-2)

Soms praat mense van koffie as boeretroos.  Maar as jy sonde in jou lewe het sal die beste koffie jou nie troos nie.  Net die Here kan.  Sy troos is so goed dat Hy dit ‘n eeu voor 39:5-7 se beproewing voorspel het: “Troos, troos my volk, sê julle God.” (v.1).

 

Jesaja se herhaling van die woord ‘troos’ wys dat die Here ‘n God van vertroosting is (v.1, Joh. 14:16, 2Kor. 1:3).  Ons het God se troos in die Messias en sy vergifnis leer ken (v.1-3, Luk. 2:25).

 

Jerusalem het teen die Here gesondig, maar Hy het saggies tot haar hart gespreek (v.2, Hos. 2:13).  Dit is hoe die Here sondaars na Hom toe trek.  ‘n Puritein genaamd William Gurnall (1617-1679) het gesê: ‘Sondaars word nie met die klippe van harde en uitdagende woorde in Christus in gesmyt nie, maar met sagte vermanings wat die hart smelt word hulle na Hom toe getrek.’[2]

 

Wat het die Here vir sy volk gesê?  Juda se stryd met Babilon was verby, maar haar stryd met die Here ook (v.2).  Met die koms van die Messias sou die Here met haar versoen raak en haar sonde vergewe.  Sy het uit die Here se hand dubbel ontvang vir al haar sondes (v.2).  Dit beteken nie dat Hy haar dubbel sou straf nie.

 

Die Hebreeuse woord [kephel] beteken ‘duplikaat’ of ‘om dubbel te vou’.[3]  Jesus se kruisdood was m.a.w. genoeg om sy volk se sonde te vergewe.  Daar is nie ‘n sonde wat Hy nie kan vergewe nie.  ‘The deepest sin can’t rise above Calvary’s love.’ (Steve Green).  “waar die sonde meer geword het, het die genade nog meer oorvloedig geword” (Rom. 5:20).  Vat dan die sonde wat jou so pla na Jesus toe dat Hy dit kan vergewe.

 

  1. God se heerlikheid (v.3-5)

Richard Wurmbrand (1909-2001) was ‘n Roemeense Christen wat vir sy geloof vervolg is.  Hy was vir 14 jaar in die tronk.  Hy vertel hoe hy God se heerlikheid in die tronk beleef het.  ‘Ek het nog nie iets mooier in my lewe gesien nie,’ het hy gesê.[4]

 

Dít is die heerlikheid waarmee Jesaja die volk bemoedig het.  Johannes die Doper het in die woestyn gepreek dat mense hulle moet bekeer en vir die Messias se koms moet voorberei (Matt. 3:1-6).  Hy was as’t ware die boodskapper wat voor die Koning uithardloop om slaggate op te vul en hindernisse uit die pad te verwyder (v.3-4).

 

Johannes het aangekondig dat Jesus die Here en God van Jes. 40:3 is!  In sy Persoon, lering, wonderwerke, kruisdood, opstanding, hemelvaart en wederkoms sou mense God se heerlikheid sien (v.5, Ps. 24:7-10, Hab. 2:14, Matt. 17:2, 25:31, Luk. 9:32, Joh. 1:14, 2:11, 11:40, 17:1, 2Kor. 3:18, 4:4-6, Heb. 1:3, Op. 1:12-17).

 

As ons die Here vra sal Hy sy belofte vervul en hierdie heerlikheid vir ons wys (v.5).  Dit sal miskien nie dadelik jou beproewing wegvat nie, maar dit sal jou help om dit beter te hanteer.  Wat my betref hardloop ons te gou na beraders toe.  Ek is nie teen berading nie, maar glo dat ons eers die Here moet vra om sy heerlikheid vir ons te wys.  As dit gebeur sal jou beproewing nie vir jou soos ‘n berg lyk nie (v.4), en sal ons ook met die regte ingesteldheid na die berader toe kom.

 

  1. God se Woord (v.6-8)

Omtrent ‘n maand gelede toe staan ek en die buurman op die sypaadjie en gesels.  Ek het gister gehoor dat hy oorlede is.  Ons heerlikheid is nie soos die Messias s’n nie, maar is soos gras en veldblomme wat verdor en verlep (v.6-7).  As God se asem oor ons gaan sterf ons (v.7, 24).

 

God se Woord daarenteen bly vir ewig (v.8, Matt. 5:18).  Sy belofte om sy volk te vergewe kan nie faal nie (v.2).  As jy hierdie ewige Woord glo sal jy ook vir ewig lewe (1Pet. 1:23-25).  Leef vir dit wat ewig is en nie vir tydelike rykdom en plesiere nie (Matt. 6:19-20, 1Kor. 7:31, 1Joh. 2:17, Jak. 1:10-11).  ‘Only one life, it will soon be past; only what’s done for Christ will last’ (C.T. Studd).

 

  1. God se arm (v.9-11)

As jong seuns het ons arm gedruk om te kyk wie die sterkste is.  Maar hoe sterk is die Here se arm?  “Het jy dan ‘n arm soos God?” (Job 40:4).  Hy is die onoorwonne kampioen van die heelal; niemand kan Hom wen nie.  En Hy is ons God.

 

Jerusalem of Sion moes van ‘n berg af vir die ander stede in Juda skreeu dat hierdie God hulle sou herstel (v.9).  Sy moes ook die goeie nuus van die Messias se vergifnis aankondig (v.9, 2).  Die goeie nuus of evangelie het inderdaad van Jerusalem af na die res van die land en wêreld toe versprei (2:3, Luk. 24:47, Hand. 1:8).

 

Juda se magtige God sou met sy sterk arm oor haar vyande triomfeer (v.10).  Die magtige Messias of arm van die Here (9:5, 52:10, 53:1) sal kom om sy kinders te beloon en sy vyande te vergeld (v.10, Rom. 2:6-11).

 

Hierdie selfde magtige arm laat God se skape wei, tel die lammers op, en lei dié wat swak is (v.11).  Wat ‘n troos is dit nie in beproewing nie?  Ek is nie verbaas dat Ps. 23 baie mense se gunsteling hoofstuk in die Bybel is nie (veral op grafstene en begrafnisse).  As die Herder van v.11, Ps. 23 en Joh. 10 jóú Herder is, het jy niks om te vrees nie.

 

  1. God se grootheid (v.12-26)

In C.S. Lewis se Chronicles of Narnia vra die heks vir Aslan die leeu hoe sy met sekerheid kan weet hy sal sy belofte hou.  Ewe skielik brul hy sodat sy op haar agterstewe beland.

 

Hoe kon Juda weet dat God die beloftes van v.1-11 sou hou?  Want Hy is die God van v.12-26.  Hy het die oseane, riviere, damme, mere en ondergrondse water in die holte van sy hand afgemeet (v.12).  Hy het die ‘oneindige’ hemelruim met sy handbreedte afgemeet (v.12).

 

Hy het die sand van die woestyne, strande en seebodem in ‘n skaal gemeet (v.12).  Hy het die magtige Himalayas, Rotsgebergtes, Andes, en ander berge saam met die heuwels in ‘n skaal geweeg (v.12).  En wat is nou weer die beproewing waaroor jy stres?

 

God is ‘n oneindige Gees (Ps. 139:7-8, Jer. 23:23-24, Joh. 4:24) en kan nie soos die skepping gemeet word nie (v.13, Heb. tâkan).  Hy is oral in sy volheid teenwoordig.  Hy het nie afmetings nie.  ‘n Puritein uit die 1600’s het gesê: ‘God se senter is orals en sy omtrek nêrens.’[5]

 

Ons kan Hom ook nie raad gee nie (v.13).  Die Babiloniërs se skepper god Marduk kon nie sonder Ea se raad skep nie.[6]  Die ware God is nie so nie en het geskep sonder iemand se insette (v.13-14).  Sy kennis is oneindig en perfek; niemand kan Hom iets leer of vir Hom insig gee nie (v.14, Ps. 139:17-18, 147:5).

 

John Piper sê van sy kennis: ‘[it] makes the Library of Congress look like a matchbox, and all the information on the Internet look like a little 1940’s farmers’ almanac, and quantum physics – and everything Stephen Hawking ever dreamed – seem like a first grade reader’.[7]

 

En dan wil ons vir die Here sê hoe Hy ons probleme moet oplos.  In ons era van wetenskap, tegnologie, filosofie, Google, ens. dink ons ons weet baie, maar eintlik weet ons niks.  Ons verstand is klein en beperk.

 

Daarom is dit ook dom om die Here te probeer uitwerk.  Ek ken twee baie intelligente mense (‘n dokter en ‘n ingenieur) wat alewig besig is om die Here te probeer uitwerk: sy alomteenwoordigheid, ewigheid, almag, ens.  Maar is dit nie beter om saam met Dawid te sê: “O Here, my hart is nie hoog en my oë nie trots nie; ook wandel ek nie in dinge wat vir my te groot en te wonderbaar is nie.” (Ps. 131:1)?

 

Laat vaar jou trots.  Jy ken nie eers 1% van die kennis wat bestaan nie.  Wat weet jy van die wêreld se tale en grammatika, die visse van die see, al die insekte, voëls en diere, die geskiedenis, die menslike liggaam, DNA, kulture, wetenskap, biologie, die sterre, engele, demone, die Bybel, die getal van mense se hare, die sand, die sterre, en God se gedagtes?

 

Almal van ons se kennis saam is soos ‘n enkele sonstraal s’n teen die triljoen x triljoen x triljoen… sonne van God se oneindige kennis.  Ons roem gans te maklik oor ons sandkorrel-grootte kennis wat buitendien van Hom af kom (Spr. 2:6, 1Kor. 4:7).  Berus jou eerder daarby dat God alles weet en dat Hy sal doen wat reg is (v.14).

 

‘Maar wat van my beproewing?’ wou Juda weet.  ‘Wat van die nasies wat teen my is?’  Wat daarvan?  Die nasies is ‘n druppel in die emmer, stof wat die skaal nie eers ‘n millimeter laat roer nie, niks en minder as niks (v.15, 17).  En wat kan ‘n druppel doen aan die God wat die oseane in sy hand afmeet; kan ‘n stoffie Hom seermaak wat die eilande soos stof tussen sy twee vingers optel (v.15, 12)?

 

En as die nasies niks teen die Here kan doen nie, wat van die individu by jou skool of werk wat dinge vir jou moeilik maak?  Moet jou nie verder daaroor bekommer nie, maar gee dit vir die Here (1Pet. 5:7).

 

Laat God se grootheid jou ook help om van jouself te vergeet: jou sg. goeie selfbeeld, jou selfbejammering, jou begeerte om erken te word, jou obsessie met jouself op Facebook, ens.

 

Jy is niks voor die Here nie en kan ook nie genoeg offers bring om sy guns te wen nie (v.16, Job 35:7, Hand. 17:25).  Slegs Hy kon die offer van oneindige waarde voorsien om ons met Homself te versoen (Jes. 53).  Sonder Jesus se kruisdood is daar vir ons geen hoop nie.  Wat jy het en is, is alles a.g.v. Hom.

 

Moet Hom dan nie met ander gode vergelyk nie (v.18).  Hy is een van ‘n soort, heilig en uniek (v.18, 25).  Hy is in ‘n klas van sy eie; daar is nie ‘n ander God soos Hy nie.  Logika sê vir jou dat daar nie twee oneindige en ewige gode kan wees nie.  Om die waarheid te sê kan daar glad nie ‘n ander god wees nie: “Ek is die HERE, en daar is geen ander nie; buiten My is daar geen God nie” (45:5).

 

Moet dan nie TBN se onsin glo wanneer hulle sê dat ons klein gode is nie.  Moet ook nie vir Allah, Vishnu, Krishna, of ander sg. gode in dieselfde asem as Jesus Christus noem nie.

 

Juda het van die Here af weggedraai om afgode te aanbid.  Maar hoe is ‘n houtbeeld wat iemand gemaak en met goud en silwer oordek het, jou skepper (v.19-20)?  En hoekom het mense in ons tyd die idee dat geld jou maak wie jy is?  Die begeerte na rykdom is niks anders as antieke afgodery nie (Matt. 6:24).

 

Van die begin af is dit duidelik dat die Here alles gemaak het (v.21, Rom. 1:19-21).  Hy sit as Koning bo die sfeer van die aarde om daaroor te heers en dit in stand te hou (v.22).  Hy strek die hemelruim uit soos ‘n gordyn of ‘n tent (v.22).  Vanuit sy verhewe posisie lyk die bewoners van die aarde soos sprinkane op ‘n grasperk (v.22).

 

Voor die Koning van die hemel is aardse regeerders soos Jacob Zuma en Robert Mugabe niks (v.23, 17, Joh. 19:10-11).  Hulle is soos plantjies wat sopas gesaai is en skaars wortel geskiet het: hulle vrek as die Here op hulle blaas en is soos stoppels wat in ‘n stormwind wegwaai (v.24, 6-8, Ps. 1:4, 35:5).  Moet Juda dan die koning van Babilon vrees, of sal ons paniekerig raak as Julius Malema in die Here se ore raas?

 

Vrees Hom wat die sterre met sy asem en vingers gemaak het, wat hulle getal bepaal, wat aan elke ster sy naam gee, en wat hulle in die lug hou dat hulle nie koers verloor nie (v.26, Ps. 8:4, 33:6, 147:4-5, Heb. 1:3).

 

Kyk minder op jou selfoon, staan onder ‘n uitgestrekte hemel koepel en besef dat God groter is as wat jy gedink het en jy kleiner.  Moet egter nie soos Juda en Babilon die sterre aanbid nie (47:13, Deut. 4:19); moenie in die Huisgenoot kyk wat die sterre oor die toekoms sê nie, maar aanbid die Een wat die sterre gemaak het (v.26).

 

  1. God se mag (v.27-31)

James se pa is ‘n biljoenêr.  Toe die atletiek seisoen aanbreek toe sê die afrigter dat elke kind die volgende dag R5 skool toe moet bring.  James was bang dat hy nie die geld sou hê nie.

 

Grap jy?  Nee, want dit is presies wat ons met die Here doen.  Al is Hy die God wat ek hierbo beskryf het, dink ons soos Juda dat Hy ons vergeet het (v.27, 49:14).  Maar sal Hy wat die sterre se name onthou sy kinders s’n vergeet?  Het Hy van Juda in Babilon vergeet?  Of vergeet Hy van jou soos ‘n vrou haar kos op die stoof vergeet?

 

Eintlik is daar nie ‘n goeie rede om kleingelowig en depressief te wees nie.  As die Here sterflik en veranderlik was het jy ‘n verskoning gehad, maar Hy is nie.  Hy is nie soos veldblomme en gras nie (v.6-8), maar is ewig (v.28, Eks. 3:14, Ps. 90:2, 102:28).

 

Volgens v.28 het Hy die eindes van die aarde geskep (ook Babilon).  Sy krag kan nie opraak nie; Hy is onveranderlik (v.28, Mal. 3:6, Heb. 13:8).  Selfs wanneer Hy vir ons krag gee het Hy nie minder krag nie (v.28-31).  Ons kan nie die dieptes van sy verstand peil nie (v.28, Rom. 11:33).

 

Benodig jy krag in jou beproewing; voel jy fisies, geestelik en emosioneel uitgeput (v.29-30)?  Vra die Here om jou krag te vermeerder (v.29, 31).  Wag deur gebed op sy beloftes en glo dat Hy vir jou bonatuurlike krag sal gee, sodat jy soos ‘n arend is wat met min moeite bo die aarde sweef (v.31, Ps. 27:14, 103:5, 130:5-6).

 

Met die Here se krag kan jy aanhou, selfs as die stryd so hard soos ‘n maraton is, of so aanhoudend soos iemand wat ver moet loop (v.31): “Ek is tot alles in staat deur Christus wat my krag gee.” (Fil. 4:13).

 

Moenie vergeet dat Jesus die God van Jes. 40 is nie.  Die Herder wat jou in sy arms dra is die God wat die skepping afgemeet het in sentimeters en gramme.  Die Messias met spyker merke in sy hande is die God wie se hande die heelal en oseane afgemeet het.  Dit is ook hierdie hande wat jou deur jou beproewing lei, sodat jy in die toekoms sal getuig van “die goeie hand van my God oor my” (Neh. 2:8).

 

[1] Martyn Lloyd-Jones, The All-Sufficient God, The Banner of Truth Trust, Edinburgh: Scotland, 2005, p. 83

[2] Vry vertaal uit Iain Murray, Pentecost – Today?, The Banner of Truth Trust, Edinburgh: Scotland, 1998, p. 102 n. 1

[3] James Strong, Strong’s Hebrew and Greek Dictionaries, 1890, Public Domain, H3718; Alec Motyer, The Prophecy of Isaiah, Inter-Varsity Press, Leicester: England, 1993, p. 299

[4] Richard and Sabina Wurmbrand: The Underground Pastor and his Wife (DVD)

[5] Vry vertaal uit Thomas Watson, A Body of Divinity, The Banner of Truth Trust, Edinburgh: Scotland, 1958, 1965 (1692), p. 46

[6] Motyer, Ibid., p. 303

[7] John Piper & Justin Taylor (Ed.), Sex and the Supremacy of Christ, Crossway Books, Wheaton: Illinois, 2005, p. 39

Die soort gebed wat beantwoord word

Praying hands on Bible

Hoe moet dit wees om ‘n knievervanging te kry omdat jy so baie gebid het, en nie a.g.v. ou ‘n rugby besering of ‘slytasie’ nie?  John Welch het so baie gebid dat sy knieë so hard soos ‘n bees se horings was.[1]  Op Martin Holdt se begrafnis het sy dogter gesê dat daar eelte op haar pa se elmboë en knieë was omdat hy so baie gebid het.

 

Volgens oorlewering het Jakobus so baie gebid dat sy knieë so hard soos ‘n kameel s’n was.[2]  In hierdie kort brief maak hy drie keer melding van gebed (1:5-8, 4:2-3, 5:13-20).  Vandag wil ek op Jak. 5:13-16a fokus en in die volgende preek op v.16b-20.

 

  1. As jy ly (v.13a)

As ek reg onthou het Joel Beeke die volgende storie vertel.  ‘n Eeu of wat gelede het ‘n klomp predikante van hulle goeie vroue gepraat.  Een van hulle het ‘n slegte vrou gehad en kon nie saam praat nie, maar het gesê dat dit hom dryf om sewe keer ‘n dag te bid.

 

As jy ly moet jy nie oor jou omstandighede kla nie, maar bid (v.13).  Sê vir die Here as iemand jou sleg behandel, as jou baas jou nie betaal nie, of as jy deur ‘n ander beproewing gaan (1:1-2, 2:5-6, 5:1-11).  Hy weet al klaar (Matt. 6:8), maar wil hê dat jy vir Hom moet sê.

 

Prys die Here in jou beproewing (1:2, Hand. 16:25); dank Hom dat dit nie langer sal duur as wat Hy beskik het nie en dat Hy dit vir jou voordeel sal uitwerk (Job 23:14, Rom. 8:28, 1Tess. 5:18).  Bid vir wysheid om jou lyding reg te hanteer (1:5), bely alle sonde wat die Here vir jou uitwys (v.16a), bid vir krag om staande te bly, en vra die Here om jou uit te help.

 

  1. As jy bly is (v.13b)

Dit klink voor die hand liggend dat mense die Here sal prys as dinge met hulle goed gaan en hulle bly is, maar dit is nie altyd so nie.  Party mense bid as hulle ly (v.13a), maar prys hulleself, hulle geld, die dokter, Donald Trump, die DA, of iemand anders as dit met hulle goed gaan.

 

Dit is nie hoe die Here dit wil hê nie: “Is iemand opgeruimd? Laat hom psalmsing.” (v.13b).  Erken dat die goeie dinge in jou lewe van God af kom (1:17, 1Kor. 4:7).  Laat daar ‘n lied in jou hart wees, en maak seker dat dit nie Hansie Slim of een van Kurt Darren se liedjies is nie.  Prys die Here as Hy vir jou werk gee, jou rug beter maak of jou kind red.

 

  1. As jy siek is (v.14-15a)

Ons het al ‘n paar keer hierdie verse in ons gemeente toegepas; ek het ook al gesien hoe ander gemeentes dit doen.  Dit het egter net in twee gevalle gewerk.  Hoekom?

 

Ons en die ander gemeentes het die verse verkeerd verstaan en toegepas.  Hoe so?  Ons het dit op siek ongelowiges toegepas en op enige siek gelowige.  Die ander gemeentes het die siek mense tydens die erediens vorentoe geroep, hulle met olie gesalf en vir hulle gebid.

 

Natuurlik kan ‘n mens vir siek ongelowiges en enige siek gelowige bid.  Dit is ook nie verkeerd om tydens die erediens vir siek mense te bid nie.  Maar dit is nie wat Jakobus bedoel nie.  Hier gaan dit spesifiek oor ‘n gelowige wat siek is, en nie oor ongelowiges wat die kerk besoek nie: “Is daar iemand siek onder julle?” (v.14).

 

Verder gaan dit nie oor enige siek gelowige nie.  Die Griekse woorde in v.14-15 [astheneō en kamnō] praat van iemand wat fisies en emosioneel uitgeput is.  Die persoon kan nie kerk toe kom nie, en vra daarom dat die ouderlinge na hom toe kom (v.14).  Hy vra húlle om te bid, omdat hy nie eers die krag het om dít te doen nie (v.14).  Die feit dat hulle oor hom bid (v.14) en die Here hom oprig (v.15), impliseer dat hy plat op sy rug lê en nie kan opstaan nie.  Jak. 5:14-15 geld dus nie vir ‘n siek gelowige wat self sy inkopies kan doen en kerk toe kom nie, maar vir een wat bedlêend is.

 

Hy moet die ouderlinge laat roep en nie net die predikant nie (v.14).  ‘n Diaken kan vir die siek persoon medisyne of kos vat (Hand. 6:1-7), maar die ouderlinge is herders wat sy na siel moet omsien en vir hom moet bid (v.14, Eseg. 34:4, 1Pet. 5:1-3).

 

Die siek persoon se behoefte om die ouderlinge te sien moet van sy kant af kom (v.14).  Dit wys dat hy God se Woord glo en gesond wil word.  As die ouderlinge by die sieke se huis of hospitaal bed aankom, moet hulle vir hom bid en hom met olie salf (v.14).  Wat is die doel van die olie?

 

Omdat olyfolie in die Bybel se tyd as medisyne gebruik is (Jes. 1:6, Luk. 10:34), dink party mense Jakobus bedoel die siek persoon moet sy pille drink.  Medisyne is God se geskenk aan ons en werk nie teen gebed nie, maar saam met dit (2Kon. 20:1-7).

 

Moet dan nie dink dat dokters, hospitale en medisyne ongeestelik is nie.  Maar aan die ander kant moet jy nie van een dokter na die volgende toe spring en elke liewe medisyne onder die son probeer terwyl jy v.14-15 ignoreer nie.  Sonder Jesus is jou huisdokter, snydokter en medisyne ‘n nul op ‘n kontrak; dit beteken niks (2Kron. 16:12, Luk. 8:43).

 

En tog is ek nie oortuig dat die olyfolie in v.14 van medisyne praat nie, aangesien Jakobus geweet het dat dit nie vir elke siekte werk nie.  Wat my betref het die olie ‘n simboliese betekenis soos in Mark. 6:13 toe die apostels mense met olie gesalf en hulle genees het.

 

Die olie wys dat God die sieke vir spesiale genade, gebed en guns afsonder.  Ons glo nie dat die krag in die olie lê nie, net soos wat ons nie glo dat die modder of spoeg in Joh. 9:6 die blinde man laat sien het nie.  Die krag lê in die Here wat ons gebede verhoor.

 

Dit is hoekom die ouderlinge nie net die sieke salf nie, maar dit in die Naam van die Here (as sy verteenwoordigers) doen (v.14).  Dit is asof Hy self by die persoon se bed is om hom te genees (Hy is inderdaad!).

 

Die ouderlinge moet glo dat Hy die sieke sal, kan en wil genees.  As hulle aan sy getrouheid, gewilligheid en krag twyfel, moet hulle nie iets verwag nie (1:6-7).  Maar as hulle die gebed van geloof bid sal die Here die sieke genees (v.15).

 

Wat is die gebed van geloof?  Dit gaan nie oor hoe groot jou geloof is nie, maar oor hoe groot die God is in wie jy glo.  Glo jy dat Hy groot, almagtig, goed en getrou is?  Glo jy dat Hy jou gebede kan en sal beantwoord?

 

Om met geloof te bid beteken dat jy sonder twyfel weet die Here gaan jou beantwoord.  Jy weet m.a.w. vooraf dat Hy jou gebed verhoor het en dat jy sal ontvang waarvoor jy vra: “Alles wat julle in die gebed vra, glo dat julle dit sal ontvang, en julle sal dit verkry.” (Mark. 11:24).  Dit is wat dit beteken om volgens God se wil en in sy Naam te bid: jy vra omdat Hy iets belowe het (Joh. 14:13-14, 15:7, 16, 16:23-24, 1Joh. 5:14-15).

 

Jy kan uit die Bybel weet as die Here iets belowe het, maar hoe weet jy of Hy vir jou iets gaan gee wat nie in die Bybel staan nie?  Hy belowe tog nie dat Jan gesond gaan word nie?  In Stuart Olyott se boek Something Must Be Known and Felt, wys hy hoe ‘n mens God se wil in sulke gevalle kan ken.

 

[Verskoon asb. dat ek illustrasies uit my persoonlike ervaring gebruik, maar as ek gelykenisse vertel sal party mense dink dat hierdie dinge nie regtig gebeur nie.  Ek is ‘n streep teoloog of ‘cessationist’ wat glo dat gawes soos profesie na die tyd van die apostels uitgesterf het.

 

En tog het ou skool streep teoloë soos Charles Spurgeon nie soos vandag s’n geglo dat die Heilige Gees ons nooit op subjektiewe maniere lei nie (sien b-e hieronder).[3]  Waar die Heilige Gees ons egter subjektief lei moet ons dit aan die objektiewe waarheid van die Woord meet.  As die ‘gees’ wat ons lei met die Bybel bots, is dit nie die Heilige Gees nie maar ‘n vals gees.  Die subjektiewe leiding van die Gees kan nooit die Bybel vervang nie].

 

[a] Die Heilige Gees herinner jou aan Bybelse beloftes waarvan jy skoon vergeet het.  Bring hierdie beloftes in gebed na die Here toe: “Julle wat die HERE herinner aan sy beloftes—moenie rus nie en laat Hom nie met rus nie, totdat Hy…” (Jes. 62:6-7).  Vra die Heilige Gees om jou aan die Woord te herinner wanneer jy bid, en strek deur gebed die hand geloof uit om aan God se getrouheid, gewilligheid en krag vas te hou.

 

[b] Soms sal die Here ‘n persoon, behoefte of saak op jou hart lê.  Dit sal so swaar op jou weeg dat jy nie anders kan as om daarvoor te bid nie.  Ek het ‘n berading-kursus geloop en R1000 nodig gehad vir boeke.  Ek het vir niemand gesê nie, maar die saak voor die Here gelê.

 

‘n Ruk later toe kom daar ‘n vreemdeling by die kerk aan (dit was ‘n weeksdag).  Dit was iemand wat my by ‘n begrafnis hoor preek het.  ‘Ek glo die Here wil hê ek moet hierdie koevert vir jou gee,’ het sy gesê.  Daar was R1000 in.  As dit nie die Here was wat dit op haar hart gelê het nie, wie was dit?

 

[c] Die Here bring nuwe gedagtes na jou toe.  Ek was eendag besig om te bid toe ek skielik aan ‘n tannie in ons gemeente gedink.  Ek het vir haar gebid.  ‘n Dag of wat later toe bel sy my.  Toe ek vir haar gebid het, het sy ‘n krisis beleef.  Die Here het dit opgelos.

 

[d] God se voorsienigheid (wat die wêreld ‘geluk’ noem) bevestig soms dat jy vir iets of iemand moet bid.  Op een of ander manier kom jy by Kallie uit toe jy vir Hannes bel.  Jy het drie jaar laas met hom gepraat en vind uit dat hy jóú wou bel, maar nie jou nommer gehad het nie.  Hy vertel jou van sy situasie.  Jy bid vir hom en hoor later dat die Here sy krisis opgelos het.

 

[e] Partykeer gebeur iets buitengewoon waarvoor jy nie gesoek het nie.  Op Saterdagnag 12 April 1856 het Spurgeon erg met sy preek gesukkel.  Hy het die Here vir lig gevra, maar niks het gebeur nie.

 

Sy vrou het voorgestel dat hy gaan slaap en baie vroeg opstaan.  Hy het haar gevra om hom wakker te maak.  Êrens na middernag het hy in sy slaap gepraat.  Mev. Spurgeon het wakker geword en gehoor dat haar man sy teks in sy slaap preek.  Sy kon dit nie neerskryf nie, en het die belangrike punte oor en oor vir haarself gesê.  Toe hy wakker word het sy hom vertel wat gebeur het.  Hulle het die Here saam gedank.[4]

 

Die Here gee nie nuwe openbarings nie (Op. 22:18-19), maar dit is ‘n feit dat Hy soms op buitengewone maniere ons gebede beantwoord en selfs in ons slaap (of op ander vreemde maniere) vir ons wys waarvoor ons moet bid.

 

Iemand in ons gemeente het onlangs so iets met my gedeel.  Ek het my verstom oor hoe die Here ons in ons slaap troos, bemoedig, waarsku en leer.  Die Woord van God kom inderdaad in die dag en in die nag na ons toe (Ps. 16:7, Spr. 6:21-22).

 

Ons moet egter nie die buitengewone najaag nie, en dit altyd aan God se Woord en volwasse gelowiges toets (Spr. 11:14, Hand. 16:9-10, 2Pet. 1:18-19).  As jy weet dat dit die Here se wil is, kan jy met vrymoedigheid daarvoor bid.  As jy onseker is kan jy Hom vra om sy wil vir jou te wys, sodat jy daarvolgens kan bid en seker kan wees van ‘n antwoord.

 

Dít is die gebed van geloof waarvan Jakobus in v.15 praat.  Waarvoor het jy geloof?  Glo jy dat die Here vir jou die nodige R500 sal gee?  Bid dan daarvoor.  Glo jy dat Hy iemand sal stuur om jou ou tent vir hierdie bedrag te koop?  Bid daarvoor.  Om volgens jou geloof te bid en ‘n antwoord te verwag is heeltemal Bybels (Matt. 9:28-29, 20:32-34).  In die ou dae het mense soos John Welsh, George Müller en Hudson Taylor het dit persoonlik ervaar.[5]

 

Jy moet egter eers reddende geloof hê voordat jy die gebed van geloof kan bid (Heb. 11:6).  Hoe kry jy dit?  Jy moet besef dat jy verlore is.  Jou luiheid, selfliefde, ondankbaarheid, murmurering, selfbejammering, kort humeur, oneerlikheid, onbetroubaarheid, ongeduld, hoogmoed en ander sondes staan die Here nie aan nie; Hy haat dit.

 

Eers as jy reddende geloof het kan jy in ‘n regte verhouding met Hom staan.  Vra Hom daarvoor; Hy sal dit vir jou gee (Ef. 2:8, Fil. 1:29).  Jy sal weet as jy dit het: jy sal glo dat Hy sy Seun gestuur het om jou te red, jy sal glo dat Jesus die ware God is wat mens geword het, dat Hy ten volle God en mens is, dat Hy aan die kruis die straf vir ons sonde gedra het, dat Hy op die derde dag opgestaan het uit die dood.  Jy sal in Hom glo om jou van jou sonde en God se oordeel te red, en jouself aan Hom toevertrou.

 

Om die gebed van geloof te bid moet jy jou hart met die Bybel vul en dit glo.  Hoe meer jy die Skrif ken, hoe meer beloftes het jy om aan vas te hou en hoe meer waarhede is daar waaraan die Heilige Gees jou kan herinner.  Om jou geloof te versterk moet jy ook baie bid.  ‘n Christen wat baie bid sal meer antwoorde sien as iemand wat gebed afskeep (4:2).  En as jy gereeld antwoorde sien sal die Here jou geloof versterk sodat jy nog méér bid.

 

Waar die ouderlinge só bid sal die Here die sieke genees (v.15).  Hy sal hom red van die siekbed waaraan hy ‘vasgeketting’ is; Hy sal hom laat opstaan sodat hy vrylik kan rondloop (v.15).  Moenie kleingelowig en biddeloos wees soos die dissipels nie (Matt. 17:20-21), maar glo dit.

 

  1. As jy gesondig het (v.15b-16a)

Charismatiese predikers sê te maklik vir siek mense dat hulle gesondig het.  Maar die meeste konserwatiewe predikers sê dit nooit.  Die Bybel sê nie dat siekte altyd deur sonde veroorsaak word nie (Job 2:3, 7, 10, Joh. 9:1-3), maar soms is dit die oorsaak (Ps. 38:4, Joh. 5:14, 1Kor. 11:30).

 

In sulke gevalle moet God die persoon vergewe voordat hy genees kan word (v.15b, Mark. 2:1-12).  Om genees te word moet die sieke sy sonde bely (v.16a).  Hy moet dit nie aan die gemeente of ouderlinge bely nie (ons is nie Katolieke nie), maar aan die Here en die persoon teen wie hy oortree het.

 

Om te bely [Gk. exomologeō] beteken letterlik om saam te stem met wat die Here sê.  Moenie jou kort humeur versag en sê dat jy ongelukkig is nie.  Moenie sê dat jou verslawing ‘n siekte is nie.  Moet jou bitterheid regverdig nie.  Moenie jou omstandighede of ander mense vir jou woede blameer nie.  Moenie maak of jou onreinheid nie so erg is nie: ‘Dis nie asof ek…’  Moenie van jou leuens sê: ‘Jammer, ek het dit nie bedoel nie.’  Moenie jou geskinder wegpraat en sê: ‘AS ek iets gedoen het om jou seer te maak is ek jammer’ nie.

 

Bybelse belydenis sê nie ‘ek is jammer’ en loop weg nie.  Dit vra vir vergifnis en wag vir ‘n reaksie.  As jy vir vergifnis vra plaas jy die skuld op jouself en fokus jy nie op die ander persoon se sonde nie.  Dus moet jy ook spesifiek wees: sê wat jy gedoen het en waarvoor jy jammer is.  Erken dat jou sonde die persoon seergemaak het.  Wees gereed om te verander en die negatiewe gevolge van jou sonde te dra (dit wys dat jy regtig berou het).

 

As jy klaar met die persoon reggemaak het, moet jy dinge met die Here regmaak (Matt. 5:23-24).  Opregte belydenis is een van die gebede wat beantwoord word; die Here sal jou vergewe (v.15-16a, 1Joh. 1:9).  As jy die slagoffer van iemand se sonde is, moet jy die Here vra om die persoon te vergewe (v.16a, Gen. 20:7, Job 42:8, 10, Hand. 7:60, 2Tim. 4:16).

 

Dalk moet jy dit vandag doen?  Of miskien moet jy vir iemand vergifnis vra?  Moenie uitstel nie, maar vra die Here om jou te help.  As jy dit gedoen het sal jy die vryheid ervaar van iemand wat vir 8 km in die berge gaan stap het en sy rugsak neersit.  Jy sal weet dat beantwoorde gebed nie maar net ‘n teorie nie, maar ‘n werklikheid.

 

[1] John Howie, The Scots Worthies, The Banner of Truth Trust, Edinburgh: Scotland, 1995 (1870), p. 138

[2] John Foxe, Foxe’s Book of Martyrs, Whitaker House, New Kensington: PA, 1981, p. 10

[3] C.H. Spurgeon, Autobiography: vol. 2, The Banner of Truth Trust, Edinburgh: Scotland, 1973, pp. 59-60.  Wayne Grudem (Ed.), Are Miraculous Gifts for Today? – Four Views, Inter-Varsity Press, Leicester: England, 1996, pp. 201-203

[4] C.H. Spurgeon, Autobiography: vol. 1, The Banner of Truth Trust, Edinburgh: Scotland, 1962, pp. 419-420

[5] Bestel gerus hulle biografieë by Good Neighbours in Randburg of Augustine Bookroom in Pretoria.  Ek lees op die oomblik The Autobiography of George Müller (Whitaker House, New Kensington: PA, 1985) en put baie seën daaruit.

Leer uit ander mense se foute

Learn from mistakes of others 1

Ek het eenkeer vir ‘n ouer Christen gevra hoekom hy so baie in geskiedenis belangstel.  ‘Dit help o.a. dat ek nie die foute herhaal wat ander mense gemaak het nie,’ het hy gesê.  Hy het m.a.w. uit ander mense se foute geleer.

 

Volgens Rom. 15:4, 1Kor. 10:11 is dit ‘n Bybelse beginsel.  Paulus sê: “Want alles wat tevore geskrywe is, is tot ons lering tevore geskrywe… Maar al hierdie dinge het hulle oorgekom as voorbeelde en is opgeskrywe as ‘n waarskuwing aan ons…”

 

Vandag wil ek hierdie beginsel gebruik om uit koning Hiskia se foute te leer.  Maak asb. jou Bybel oop by Jes. 38-39.

 

  1. Hiskia se siekte (38:1-8, 21-22)

‘n Oom wat ek geken het, het eenkeer in die hospitaal beland.  Terwyl hy daar gelê het, het hy van koning Hiskia se siekte gelees: “In dié dae het Hiskía dodelik siek geword; en die profeet Jesaja, die seun van Amos, het by hom gekom en vir hom gesê: So spreek die HERE: Gee bevel aan jou huis, want jy sal sterwe en nie lewe nie.” (38:1).

 

Op grond hiervan het hy gedink hy gaan nie gesond word nie.  Toe hy dit vir sy vrou sê was sy glad nie beïndruk nie.  Hiskia was ook nie bly toe Jesaja die nuus met hom deel nie.  Hoe sal jý voel as iemand vir jou sê om jou familie bymekaar te roep, en vir hulle opdrag te gee oor wat hulle met jou geld en besittings moet doen as jy weg is?

 

Toe Hiskia die slegte nuus hoor het hy sy gesig na die muur toe gedraai en gebid (38:2).  Hy het bitterlik gehuil en by die Here gepleit om sy lewe te spaar (38:3).  Ons sal later sien hoekom hy bang was en nie soos Paulus uitgesien het om by die Here te wees nie.

 

Hiskia het die Here aan sy opregte lewe herinner (38:3).  Hy het inderdaad reg gelewe (2Kon 18:3, 5-6, 2Kron. 31:20-21), maar het ook ernstige foute begaan soos om Egipte se hulp bo die Here s’n te kies (Jes. 30-31).

 

Hiskia was dus verkeerd om te dink dat die Here hom op grond van sy goeie lewe moet verhoor.  Nogtans het die Here sy trane gesien en sy gebed verhoor.  Jesaja was nog nie behoorlik deur die voorhof van die paleis nie, toe die Here hom met hierdie woorde na Hiskia toe terugstuur (38:4, 2Kon. 20:4):

 

“Gaan sê vir Hiskía: So spreek die HERE, die God van jou vader Dawid: Ek het jou gebed gehoor, jou trane gesien; kyk, Ek sal vyftien jaar by jou dae byvoeg” (38:5).  Hiskia was bly toe die Here sy lewe spaar, maar dit het nadelige gevolge gehad.  Sy seun Manasse is kort hierna gebore, en was die slegste koning wat Jerusalem ooit gehad het (2Kron. 32:33-33:1).

 

Die Here het verder belowe om vir Hiskia en Jerusalem uit Assirië se hand te red (38:6).  Saam met 38:1 (“in dié dae”) dui hierdie vers aan dat Hiskia se siekte vóór Assirië se aanval op Jerusalem gebeur het.  Dit is asof Jesaja Assirië se aanval in hfst. 36-37 beskryf, en dan in hfst. 38-39 sê: ‘Kom ek wys vir jou hoekom dit gebeur het.’  Ek sal later hierop uitbrei.

 

Hiskia wou nie ongelowig wees soos sy pa Agas nie, en het daarom vir ‘n teken gevra (vgl. 7:10-14).  ‘Wat is die teken dat die Here my sal genees en dat ek Hom op die derde dag in die tempel sal aanbid?’ het hy gevra (38:22, 2Kon. 20:5, 8).

 

‘Moet die Here die skaduwee op jou pa se sonhorlosie tien trappies vorentoe, of tien trappies agtertoe beweeg?’ het Jesaja gevra (2Kon. 20:9).  ‘Agtertoe asb.,’ het Hiskia gesê (2Kon. 20:10).    Toe Jesaja die Here aanroep het dit so gebeur (37:8, 2Kon. 20:11).

 

Het die aarde agtertoe gedraai, of het die Here die lig gemanipuleer en die skaduwee terug geskuif?  Die teks sê nie vir ons nie.  Hiskia het wel besef dat die Here wat die son beheer (Jos. 10:12-13), hom van sy siekte kon genees.

 

God het hom nie deur ‘n wonderwerk genees nie, maar het deur Jesaja gesê hulle moet medisyne gebruik (38:21).  Hulle het ‘n vyekoek op sy sweer gesit.  Die sweer het waarskynlik ‘n dodelike infeksie veroorsaak.  Gedroogte vye is baie goed om swere te behandel, en help vir meer as 40 ander siektes (kyk gerus op die internet).

 

  1. Hiskia se psalm (38:9-20)

Partykeer raak Christene teleurgesteld, omdat die Bybel nie met die realiteit strook nie.  As jy só voel, moet jy een van twee dinge doen.

 

[1] Lees Prediker.  Salomo het met dieselfde vrae as jy gesukkel.  Jy sal gou agterkom dat die Bybel nie lugkastele bou nie, maar dat dit met die harde realiteit te doen het.

 

[2] Onthou dat die Bybel-skrywers soms hulle persoonlike omstandighede beskryf.  Dit beteken nie noodwendig dat jy dinge soos hulle gaan ervaar nie.  As Dawid bv. in Ps. 103:3 sê dat die Here al sy siektes genees het, bedoel hy nie dat die Here alle gelowige se siektes gaan genees nie (sien bv. 2Kon. 13:14, 20).

 

Hou dit asb. in gedagte wanneer jy Hiskia se psalm lees.  Hy probeer nie om ‘n teologie van lewe na die dood te formuleer nie, maar beskryf sy persoonlike omstandighede (38:9).  Hy het gedink dat die Here hom in die middel van sy lewensjare vir die doderyk bestem het (38:10).

 

‘Ek sal nie meer die Here, sy werk en ander mense in die land van die lewendes sien nie,’ het hy gesê (38:11).  ‘Soos ‘n herder sy tent afslaan, sal die Here my lewe afslaan; soos ‘n wewer sy materiaal afsny en oprol, sal Hy my lewe kortknip en oprol (38:12, Job 7:6).  So gou soos wat die dag in nag verander, sal die Here my lewe beëindig (38:12-13).

 

‘Ek het probeer om in die nag kalm te bly, maar dit het nie gehelp nie.  Die Here was soos ‘n leeu wat my bene breek (38:13).  Daar was nie ‘n kans dat ek hierdie siekte sou oorleef nie.  Ek kon skaars praat en het nie eers die krag gehad om op te kyk nie (38:14).  Ek het soos ‘n swaeltjie of kraanvoël getjirp, en soos ‘n duif gekerm (38:14).  “Kan die Here nie my genesing waarborg nie?” het ek gewonder (38:14, 7-8).

 

‘Hy het!  Hy het!  Die Here het my van my bitter siekte genees.  Voortaan sal ek versigtig lewe en nie weer sonde doen, sodat die Here my daarvoor moet tugtig nie (38:15, 17).  Ek het my les geleer, en glo dat ander ook daaruit sal leer om nie die weg van sonde te kies nie (38:16).

 

‘Diep in my hart weet ek dat die Here hierdie bitter siekte gestuur het om my te bevoordeel (38:17).  In sy groot liefde het Hy my van die graf of kuil van verwoesting gered (38:17).  Hy het die sonde wat sy tugtiging oor my gebring het agter Hom gesit (38:17, Ps. 103:12, Miga 7:19).

 

‘As ek gesterf het sonder dat my sonde vergewe is (38:17), sou ek hel toe gaan waar die dooies nie die Here prys of dank nie, en waar daar vir hulle geen hoop is om uit te kom nie (38:18).  Die Here het my sonde vergewe en my laat lewe, en daarom prys ek Hom saam met die lewendes (38:19)!

 

‘Ek sal God se getrouheid aan die volgende geslag verkondig (38:19, Gen. 18:19, Deut. 6:7, Ps. 78:1-8).  As ons die Here met snarespel in die tempel prys, sal almal weet dat Hy my genees en van die dood gered het (38:20).

 

  1. Hiskia se sonde (39:1-8)

‘n Bietjie agtergrond sal ons help om Jes. 39 beter te verstaan.  Soos ek in die vorige preke gewys het, was Assirië die wêreld se supermag.  Babilon wou egter die titel oorneem, en daarom het koning Merodag Baladan teen die Assiriërs gerebelleer.

 

In 721 v.C. het hy homself die koning van Babilon gemaak.  In 709 v.C. het koning Sargon van Assirië hom gevange geneem.  Toe Sargon in 705 v.C. oorlede is, het Merodag Baladan weer teen Assirië gerebelleer en sy koningskap opgeneem.

 

In 703 v.C. het hy ‘n veldslag teen die Assiriërs gewen.  Met ‘n paar helpers kon hy die Assiriërs finaal van die tafel afvee.  Terwyl hy sy planne gemaak het, het hy gehoor dat Hiskia siek was, gesond geword het, en dat die skaduwee op die sonhorlosie tien trappies agtertoe beweeg het (39:1, 38:8, 2Kron. 32:31).

 

Dit was die kans waarvoor hy gewag het.  Hy het afgevaardigdes met geskenke Jerusalem toe gestuur (39:1).  Hy het ook briewe geskryf waarin hy vir Hiskia gevra het om saam met hom teen die Assiriërs te veg (39:1).[1]

 

Die Here dit gebruik om te wys hoeveel hoogmoed daar in Hiskia se hart is (2Kron. 32:25, 31).  Hiskia was bly dat iemand hom teen die Assiriërs kon help (39:2).  Hy het met sy rykdom en voorraad gespog, so asof hy gesê het: ‘Ek is heeltemal daartoe in staat om jou teen die Assiriërs te help’ (39:2, 2Kron. 32:27-30).

 

Hiskia het nie erken dat die Here was wat Hom ryk gemaak het nie (2Kor. 32:29).  Hy het nie vertel hoe die Here hom genees het nie.  Hy het nie gesê dat die Here daartoe in staat is om tyd terug te draai nie.

 

Hiskia het nie in die Here geroem nie, maar in homself.  Jesaja het hom hieroor uitgevra.  Hy het met trots vertel hoe hy al sy rykdom vir die Babiloniërs gewys het (39:3-4).

 

‘Jou rykdom beteken niks nie Hiskia!’ het Jesaja hom bestraf.  ‘Eendag sal die Babiloniërs jou skatte na hulle eie land toe wegvoer.  Hulle sal jou nageslag wegvoer en hulle amptenare in die koning van Babilon se paleis maak’ (39:5-7, 2Kon. 24:12-13, 25:6-7, 13-17, Dan. 1:2-3, 7).

 

Dit het nie eers vir Hiskia gepla nie.  Hy was net dankbaar dat dit in die toekoms gelê het, en dat daar in sy tyd vrede sou wees (39:8).

 

Wat leer hierdie twee hoofstukke vir ons?

 

[1] Soos met Hiskia is die dag van jou dood en die res van jou lewe in God se raadsplan (38:5, 46:10, Job 14:5, Ps. 139:16, Spr. 16:1, 9, 19:21, 20:24, Pred. 3:1-8, Jer. 10:23, Ef. 1:11, Jak. 4:13-15).

 

Beteken dit jy moenie bid nie, omdat die Here buitendien sy planne in jou lewe gaan vervul?  Nee.  Die Here bepaal nie net die einddoel nie, maar ook die middele.  Hy het besluit om sy planne deur gebed in jou lewe te vervul.

 

Toe Daniël bv. in Jer. 29 lees dat Juda vir 70 jaar in Babilon sou wees, het hy nie gesê: ‘Die Here het dit bepaal, en daarom hoef ek nie te bid nie.’  Hy het eerder gesê:  ‘Omdat die Here dit bepaal het, gaan ek bid en vra dat Hy sy planne volbring’ (sien Dan. 9).

 

Dít is hoe jy moet redeneer.  God se soewereiniteit moet jou nie minder laat bid nie, maar meer.  As jy nié bid nie, skiet jy jouself in die voet: “julle het nie, omdat julle nie bid nie.” (Jak. 4:2).

 

[2] Hiskia het gedink dat die Here hom op grond van sy goeie lewe sal verhoor (38:3).  Maar t.s.v. sy verkeerde idee het die Here hom verhoor (38:4-6).  Die Here word nie beperk omdat jy verkeerd bid nie (38:3).  Hy antwoord jou tog nie op grond van jou elegante woorde nie, maar op grond van Jesus wat vir jou gesterf het, sy getrouheid aan Homself en sy beloftes, en sy goedheid aan dié wat in Hom glo.

 

[3] Nog voordat Assirië in hfst. 36-37 teen Jerusalem geveg het, het die Here belowe om die stad te beskerm (38:6).  Maar ten spyte daarvan was Hiskia benoud (37:1, 3).

 

Is ons nie ook so nie?  Die Here belowe om in jou behoeftes te voorsien, en sê vir jou om nie angstig te wees nie (Matt. 6:25-34).  Jy werk hard en mors nie jou geld nie, maar sodra daar ‘n nood ontstaan wat jy nie voorsien het nie raak jy angstig.  Moenie so wees nie, maar glo die Here se beloftes en herinner Hom daaraan (Jes. 62:6-7).

 

[4] As die Here wil, kan Hy ons op buitengewone maniere help.  Ons moet egter nie verwag dat dit altyd so moet gebeur nie.  As ons alewig ‘n wonderwerk soek, sal ons nalaat om die Here te dank as Hy besluit om ons op gewone maniere te help.

 

Ons sal bv. vir almal vertel dat die beste dokter in die land aan ons gewerk het, en dat dít die rede is hoekom ons lewe om die storie te vertel.  Maar sonder die Here kon die dokter jou nie help nie (2Kron. 16:12, Luk. 8:43).

 

Gód is immers die een wat sekere middels in die skepping gegee het, sodat ons daardeur genees kan word (38:21).  Hý gee aan mense die wysheid om medisyne in die regte mates en kombinasies af te meet en te meng.  Laat ons dus baie versigtig wees om vir Hóm die krediet te gee as ons gesond word, of as Hy ander krisisse in ons lewens oplos.

 

Omdat dit God is wat ons genees, moet ons nie aan medisyne verslaaf raak of daarby sweer nie.  Aan die ander kant moet ons onthou dat medisyne God se gawe aan ons is.  Ons moet dus nie soos sommige mense weier om dit te gebruik, omdat ons kamtig op die Here vertrou om ons te genees nie.  Dit is nie meer geestelik om sonder medisyne genees te word, as om ‘n pil vir jou rugpyn te drink nie.

 

[5] As jy ‘n gelowige is, is elke beproewing tot jou voordeel (38:17).  Jy sien dit nie nou raak nie, maar later sal die Here vir jou wys dat Hy besig was om jou meer soos Jesus te maak (Ps. 119:67, 71, 75, Rom. 8:28-29, Heb. 12:10-11).  ‘The providence of God is like a Hebrew word – it can only be read backwards.’ (John Flavel).[2]

 

[6] Hiskia het geglo dat sy siekte die direkte gevolg van ‘n persoonlike sonde is (38:17).  Maar dit beteken nie dat almal a.g.v. ‘n persoonlike sonde siek is (Job 1-31, Joh. 9:1-3), of dat almal wat gesond is reg lewe nie.

 

Dit is nie verkeerd om te wonder of jy a.g.v. ‘n persoonlike sonde siek is nie (1Kor. 11:30).  Maar jy moet jouself ook nie kasty om die sonde te vind wat jou siekte veroorsaak het nie.  Rus eenvoudig in die Here se algenoegsame genade (2Kor. 12:7-10).

 

[7] As jy die Here ken en jou sonde vergewe is, hoef jy nie die dood te vrees nie (38:18, Joh. 11:25-26, 1Kor. 15:55, Fil. 1:21, Heb. 2:14-15).  Soos met Paulus, Lasarus en die dief aan die kruis, is die dood die swart perd voor die goue koets wat jou na Jesus toe vat (Luk. 16:22, 23:43, 46, 2Kor. 5:8, Fil. 1:23).  Wanneer Jesus weer kom sal Hy jou liggaam uit die dood uit opwek (1Kor. 15:35-58, 1Tess. 4:13-18).

 

[8] Hiskia het in homself geroem (39:2).  Dit was ook die rede hoekom God die Assiriërs teen hom gestuur het (2Kron. 32:25).  Toe hy en die volk hulle voor die Here verneder, het dinge vir hulle reg geloop (37:1, 14-20, 2Kron. 32:26).

 

Roem dus in die Here en nie in jouself nie (Jer. 9:23-24, 1Kor. 1:31, 2Kor. 10:17).  As jy hoogmoedig is, is jy soos die duiwel en sal die Here jou aktief teenstaan; as jy nederig is, is jy soos Jesus en sal God jou genadig wees (Jak. 4:6).

 

Onthou ook dat alles wat ek en jy het van die Here af kom, en dat ons nie in onsself kan roem nie (1Kor. 4:7).  ‘n Jong predikant het eenkeer vir Martyn Lloyd-Jones gevra om te bid dat hy nie hoogmoedig word nie.  ‘Wat het jy om oor hoogmoedig te wees?’ het Lloyd-Jones hom geantwoord.

 

[9] My vrou het ‘n gawe.  Sy kan kyk hoe iemand teëls lê of iets mooi van draad maak, en dit dan self regkry.  Net so moet ons Jes. 38-39 fyn dophou en uit Hiskia se foute leer.

 

[1] [1] Falvius Jospehus, The Antiquities of the Jews, Book 10, ch. 2, par. 2.  [2] D. Guthrie & J.A. Motyer, New Bible Commentary: Third Edition, Inter-Varsity Press, Leicester: England, 1970, p. 364.  [3] Alec Motyer, The Prophecy of Isaiah, Inter-Varsity Press, Leicester: England, 1993, pp. 291, 296

[2] Ek is nie presies seker waar hierdie aanhaling vandaan kom nie, maar reken dat dit uit Flavel se boek, The Mystery of Providence (Banner of Truth) uit kom.

God se hulp in jou krisis

Drowning man

In die mid-1700’s het Jonathan Edwards sy gemeente se verkeerde praktyke oor die nagmaal aangespreek.  Hy is van die gemeente afgesny.  ‘n Vriend van my het onlangs iets soortgelyk ervaar.  Dalk het so iets al met jou gebeur: jy doen wat jy dink reg is, en dan neem dinge ‘n wending vir die ergste?  Skielik beleef jy ‘n krisis, sodat jy nie weet waarheen nie.  Jy besef dat jy nie meer op jouself kan staatmaak nie.  Nou is dit net jy en die Here.  Hy is die enigste hulp in jou krisis.  En soos gewoonlik stel Hy nie teleur nie.  Dit is waaroor Jes. 33:1-12 gaan.

 

  1. Assirië se verraad (v.1)

Voor elke verkiesing is daar politieke werwing of ‘canvassing’.  Politieke partye maak die paaie reg, gee gratis hulp aan die armes en belowe om vir hulle huise te bou.  Wanneer die verkiesing egter verby is, vervul hulle nie hulle beloftes nie, en bly die mense so arm soos wat hulle voor die verkiesing was.

 

Dit is wat Assirië volgens 2Kon. 18:13-17 met Jerusalem gedoen het.  ‘As jy vir my 10 ton silwer en ‘n ton goud gee, sal ek jou nie aanval nie,’ het Sanherib van Assirië vir koning Hiskia van Juda gesê.

 

Hiskia het Sanherib se vereistes nagekom, maar nog steeds het Sanherib met ‘n weermag Jerusalem toe gekom.  Sy plan was om dit te verwoes soos hy die nasies verwoes het (v.1, 16:4, 36:10, 37:12).  Sanherib was ‘n troubreker en het vir Hiskia ‘n rat voor die oë gedraai (v.1).

 

Maar elke hond kry sy dag.  Êrens in die toekoms sou iemand met die Assiriërs trou breek en hulle verwoes (v.1).  Alec Motyer sê: ‘for every trickster there is a trickster to outdo him’.[1]

 

Kort na hierdie gebeure het die Here op een nag 185 000 Assiriërs doodgemaak (37:36).  Sanherib se eie seuns het hom doodgemaak (37:38).  Jare later het God die Babiloniërs gebruik om die Assiriese ryk tot ‘n val te bring.

 

Dalk het mense jou onregverdig behandel en, soos my vriend, afgeskryf.  As jou sonde dit verdien, is dit nie eerbaar nie (1Pe 4:15).  Maar as jy nie verkeerd was nie, sal die Here met jou vyande afreken (v.1).  Moet daarom nie mense terugkry nie, maar staan terug en laat ruimte vir die Here om wraak te neem (Rom. 12:19).  Hy weet hoe om dit te doen, en het nie jou of my hulp nodig nie.

 

  1. Jerusalem se gebed (v.2)

Een van ons lidmate het my Vrydag van ‘n ander lidmaat se moeilike omstandighede vertel.  ‘Dit gaan baie sleg met hom, maar wat sy verhouding met die Here betref gaan dit baie goed.’

 

Is dit nie hoe dit met Israel was nie: sodra hulle voorspoed beleef het, het hulle van die Here af weggedraai (Deut. 6:10-12, 28:47)?  Maar as die Here die bankskroef van hulle omstandighede stywer gedraai het, was hulle geestelik op ‘n goeie plek.  Dit is die les in v.2

 

In reaksie op Sanherib se aanval, het Jesaja, Hiskia en die volk in gebed na die Here toe gedraai.  “HERE, wees ons genadig, op U wag ons; wees hulle arm elke môre, ja, ons verlossing in die tyd van benoudheid!” het hulle gebid (v.2).  Hulle het besef dat hulle ‘n dag op ‘n slag moes neem, en dat hulle elke dag op die Here moes staatmaak.

 

Soos reeds gesê besef ons dit nie altyd wanneer dit goed gaan nie.  Ons dink dat ons onsself kan help, en is soos ‘n stout kind wat nie sy pa se hand wil vashou om oor die besige pad te kom nie.  Ons steun op ons lewenservaring, geld, talente, dissipline, die internet, geleerdheid en nie op die Here nie.

 

Omdat ons op onsself staatmaak, bid ons nie soos ons moet nie.  Dit is hoekom die Here ons partykeer deur moeilike tye laat gaan, sodat ons op Hom kan vertrou en kan weet waar ons hulp vandaan kom.  As Hy dit nie doen nie, sal ons self oor die pad wil hardloop en raakgery word.  Ons sal onsself m.a.w. geestelik benadeel.

 

  1. God se reaksie (v.3-4)

‘n Bekende aanhaling oor gebed sê:  ‘When man works, man works; but when man prays, God works.’  Dit is wat ons in Jes. 30:2, 31:3, 33:3-4 sien.  Jerusalem wou self die krisis oplos, en het vir Egipte gevra om haar te help.  Sy was onsuksesvol.  Toe sy egter in gebed na die Here toe draai, het Hy eenvoudig opgestaan en soos donderweer gedreun om die Assiriërs te verjaag (v.3, 37:36-38, 1Sam. 7:10).

 

Net so is dit vir die Here kinderspeletjies om jou krisis op te los; NIKS is vir Hom onmoontlik of moeilik nie (2Kon. 3:18, Jer. 32:17, 27, Luk. 1:37, Ef. 3:20).  Volgens v.3-4 was die oorlog verby nog voordat dit begin het.  Soos wat sprinkane ‘n mielieland kaal stroop, het Jerusalem goud, silwer en allerhande buit by die vyand afgeneem (v.4).

 

Alhoewel dit vir die Here maklik is om jou omstandighede te verander, doen Hy dit nie altyd nie.  Indien Hy dinge onveranderd laat, is dit om jou meer soos Jesus te maak (Rom. 8:28-29).  Hy wil jou volharding leer… of sagmoedigheid, nederigheid, liefde, geloof, geduld, ens.

 

Uit eie ervaring weet ek dat dit nie maklik is nie, maar ongelukkig is daar nie ‘n ander manier om dit te leer nie.  ‘Swords get sharpened through heating and beating,’ het iemand eenkeer by ‘n konferensie gesê.

 

  1. Jerusalem se fondasie (v.5-6)

Vyf jarige Martin de Bruin se pa is besig om die kar se remme te vervang.  Terwyl hy besig is, wil Martin die wiel losmaak.  ‘Laat ek jou help,’ sê sy pa.  ‘Ek het nie pa se hulp nodig nie; ek kan dit self doen,’ antwoord hy.  Na 3 minute se gesukkel vra hy dat sy pa hom moet help.

 

Jerusalem was so, en het gedink dat sy nie die Here se hulp teen Assirië nodig het nie.  Kort voor lank het sy besef dat nie sy óf Egipte haar kan help nie.  Sy moes haarself verneder en na die Here toe draai.  Sy moes erken dat sy klein is, en dat Hy in die hoogste hemel verhef is (v.5, 2:11, 17).

 

In antwoord op haar gebede het die Here belowe om Jerusalem of Sion met reg en geregtigheid te vul (v.5).  Jerusalem sou nie meer ‘n stad vol ongeregtigheid wees nie.  In koning Hiskia en Josia se tyd het reg en geregtigheid geheers (2Kon. 18-20, 22-23).  Maar toe hulle oorlede is, het ongeregtigheid weer die oorhand gekry.

 

Volkome reg en geregtigheid kan net deur die Messias kom.  Hy het dit deur sy kruisdood verseker, maar sal dit by die wederkoms vervul (2Pet. 3:13).  Vir mense in ‘n land en wêreld soos ons s’n, is dit iets om na uit te sien.  Geen meer aborsie, moord, korrupsie, rowery, diefstal, rebelse jongmense, dronkenskap, rasse haat, seksuele losbandigheid, ens. nie.

 

Op die nuwe aarde sal mense in Jesus se oorvloedige liefde, blydskap en vrede lewe.  Ons sal altyd ander bo onsself stel.  My vriend sal nie weer deur ander Christene uitgeskuif word nie, en ons sal nie vir ‘n enkele sekonde bitter voel of met iemand baklei nie.

 

God is die Rots wat sal sorg dat sy volk in standvastige tye leef (v.6, 26:4).  Hy het dit in Hiskia en Jesaja se tyd gedoen (39:8), en sal dit in die toekoms herhaal (v.6).  Ons liefde vir die Here, menseverhoudings, die politiek, die ekonomie, die weer, die diereryk, en alles anders sal nie so onstabiel, wispelturig en wisselvallig wees soos nou nie.  Dit kán nie, omdat die Here self die fondasie van sy volk is (v.6).

 

Wanneer sal dit wees?  Premils glo dat dit na die wederkoms in die millennium sal wees.  Postmils dink dat dit êrens voor die wederkoms tydens ‘n goue era sal wees, en volgens amils sal dit op die nuwe aarde gebeur.  Hoe dit ook al sy, ons moet hiervoor bid: “laat u koninkryk kom” (Matt. 6:10).

 

Ons hoef egter nie tot in die toekoms te wag voordat ons die rykdom van hierdie lewe kan smaak nie.  In Christus is die rykdom van God se verlossing, wysheid en kennis ons s’n (v.6, Joh. 10:10, 1Kor. 1:30, Kol. 2:3, 2Pet. 1:2).  Wat beteken dit in die praktyk?

 

God se oorvloedige verlossing beteken dat Hy jou tot die uiterste toe kan red.  Sy verlossing is m.a.w. nie tydelik nie.  Dit is nie net vir hierdie lewe bedoel nie.  Jy verloor dit nie as jy jou asem uitblaas nie.  As jy by die Here is, sal jy dit eers geniet.  Wanneer Jesus weer kom en jy jou nuwe liggaam het, sal die volheid van God se verlossing jou oorweldig soos ‘n vis wat uit ‘n seetenk in die oseaan vrygelaat word.

 

Maar die feit dat ons die rykdom van God se verlossing op die nuwe aarde sal geniet, beteken nie dat jy dit nie nou al kan geniet nie.  Wat ek bedoel is dat jy nie in hierdie wêreld misrabel hoef te wees, omdat jy eers op die nuwe aarde vreugde kan hê nie.  As jy in Jesus glo het jy reeds sy lewe in jou.  Dit beteken dat jy in die midde van die grootste krisis die Here se lewe, liefde en krag kan ervaar – sy oorvloedige verlossing.

 

Sy oorvloedige verlossing beteken verder dat dit nie opraak nie.  Hy kan m.a.w. nie op ‘n punt kom waar Hy vir iemand sal moet sê: ‘Ek weet jy het gevra Ek moet jou red, maar ongelukkig het die fontein van my verlossing opgedroog en kan Ek jou nie help nie.’

 

Ek het eenkeer met ‘n man gewerk wat gedink het sy sonde is te groot.  Hy het geglo dat die Here hom nie kan red nie.  Hy het gedink dat Jesus se kruisdood vir ander mense was, maar nie vir hom nie.

 

Ek het hom van die oorvloedige verlossing vertel wat van Golgota afstroom.  Hy moes leer dat daar genoeg verlossing is vir almal wat in berouvolle geloof na Jesus toe draai.  As jy vir die Here vra om jou te red, sal Hy jou nie wegwys nie.  “Ek sal hom wat na My toe kom, nooit uitwerp nie.” (Joh. 6:37).

 

Die oorvloed van God se verlossing beteken laastens dat die Here jou kan vergewe as jy vir baie jare met dieselfde sonde sukkel.  Ek bedoel nie dat jy met jou sonde moet aanhou nie (Rom. 6:1-2), maar sê dit as ‘n bemoediging vir die gelowige wat alweer in dieselfde strik getrap het, en depressief voel omdat hy dink die Here kan hom nie hiérdie keer vergewe nie.

 

God se verlossing is oorvloedig.  As jy jou sonde bely en jou daarvan bekeer, sal die Here jou vergewe… al is dit ook 70 x 7, so hoog soos Berg Everest, of so diep soos die Stille Oseaan (Matt. 18:21-35, Ef. 3:17-19, 1Joh. 1:9).

 

There is a fountain filled with blood

Drawn from Immanuel’s veins

And sinners plunged beneath that flood

Lose all their guilty stains

-William Cowper-

 

Omdat die Here ons God is, het ons ook ‘n oorvloed van wysheid en kennis (v.6).  In Hom maak al jou vrae oor God, jouself, die lewe, die dood, sonde en die ewigheid sin.

 

Waar kom God vandaan?  Waar het alles begin?  Hoe kan ons besluit wat reg en verkeerd is?  Wat is die doel van die lewe?  Wat is die sin daarvan om vir 70 of 80 jaar ‘n eindelose siklus te volg:  opstaan, werk, slaap, opstaan, werk, slaap… naweek… opstaan, werk, slaap… naweek… aftree, oud word, doodgaan?

 

Hoe het die dood in die wêreld ingekom, en wat gebeur wanneer iemand sterf?  Jesus is die bron van alle wysheid en kennis (v.6), en daarom kan net Hý hierdie vrae beantwoord.  Hy hét dit ook in die Bybel gedoen.

 

Deur Jerusalem se kennis van die Here (v.6b), sou hulle leer om Hom te vrees (v.6c).  Die vrees van die Here sou vir hulle ‘n skat wees (v.6c), want saam met dit kry ons baie ander voordele:

 

  • Kennis en wysheid (v.6, Spr. 1:7, 9:10, 15:33).
  • Haat vir sonde (Spr. 3:7, 8:13, 16:6).
  • Goeie gesondheid (Spr. 3:7-8).
  • ‘n Vol, gelukkige en lang lewe; beskerming teen die strikke wat tot die dood lei (Spr. 10:27, 14:27, 19:23, 22:4).
  • Sterk sekerheid en ‘n veilige vesting vir jou kinders (Spr. 14:26).
  • Rykdom en eer (Spr. 22:4).

 

  1. Jerusalem se krisis (v.7-9)

Ek ken ‘n sendeling wat in Etiopië gewerk het.  Hy het my vertel hoe die polisie sommer in die strate op mense losbrand.  In sulke plekke huil mense in die strate, en bly hulle liewer in hulle huise.

 

In Jerusalem was dit ook so.  Die boodskappers wat na die Assiriërs toe uitgegaan het om vrede te bewerk was onsuksesvol.  Die koning van Assirië het besluit om die stad aan te val en dit te vernietig.  Toe Hiskia se boodskappers na die stad toe terugkeer het hulle bitterlik gehuil (v.7, 36:22).  Jerusalem was in beroering, sodat selfs die dapperste helde in die strate geskreeu het (v.7).

 

Niemand het dit gewaag om op die hoofweë te reis nie (v.8).  Alles was verlate; Jerusalem was letterlik van die buitewêreld afgesny (v.8, vgl. Rigt. 5:6).  Assirië het haar vredesverbond met Jerusalem gebreek; sy was gereed om voor die voet dood te maak en die stad te vernietig (v.8, 1).

 

A.g.v. die Assiriërs het die land getreur en weggekwyn (v.9).  Om skanse te bou het hulle die Libanon woud en Basan – vandag se Golan hoogte in Sirië – se bome afgekap (v.9, 2:13).  Met duisende perde het hulle die Saron vlakte, Basan en berg Karmel se prentjiemooi-weivelde in ‘n woestyn verander (v.9, 1Kron. 5:16, 6:71, Jer. 50:19, Nah. 1:4).

 

Maar selfs in die ergste krisis kan die Here jou woestyn in ‘n paradys verander, jou trane in gejuig en jou geween in voete wat dans (35:1-2, Ps. 30:6, 12).  Soms beteken dit dat Hy jou omstandighede verander.  Maar partykeer verander Hy jóú, sodat jy in jou krisis ‘n vrede en blydskap ervaar wat jy nie kan beskryf nie (Hand. 16:25, Fil. 4:4, 7).

 

  1. God se toorn (v.10-12)

Partykeer kyk ek op my dag af stories saam met my vrou en kinders.  In een film was daar ‘n klein vroutjie wat in die biblioteek gewerk het.  Sy het kwaad geword as iemand in die biblioteek raas.

 

Toe een van die karakters dit hoor, toe sê hy:  ‘Who’s afraid of a little librarian?’  Toe die klein vroutjie agter die toonbank opstaan was sy glad nie so klein nie; sy was amper so hoog soos die dak.

 

Assirië het haarself verhef… totdat die Here van sy troon af opgestaan en Homself oor haar verhef het (v.10).  Toe dit gebeur was dit asof Assirië met strooi swanger was, stoppels gebaar het, en haarself met haar eie vurige asem aan die brand gesteek het (v.11).  Haar sonde het soos ‘n boemerang na haar toe teruggekom; sy het haarself vernietig (37:38).

 

Soos kalksteen het die Here haar tot poeier verbrand; soos doringtakke het Hy haar in vlamme laat opgaan (v.12).  Dit is nie net die lot van die Assiriërs nie, maar van Moslems, Kommuniste, ateïste en elke vyand wat God se kinders onderdruk: “wie julle aanraak, raak sy oogappel aan.” (Sag. 2:8).

 

Dit is hartseer om te sê, maar op die einde van die dag is dit nie God se kinders wat die krisis het nie.  Dit is dié wat op sy liefde spoeg en nie wil luister om hulle te bekeer en in Jesus te glo nie (Joh. 3:16, 36).  Hulle sal ‘n ewige krisis beleef, en die Here sal hulle nie help om daaruit te kom nie.  Hulle wou nie sy hulp hê toe hulle op die aarde was nie, en sal dit ook nie in die hel kry nie.  Hoekom nie?

 

C.S. Lewis het gesê: ‘Sin is man’s saying to God throughout life, “Go away and leave me alone.”  Hell is God’s finally saying to man, “You may have your wish.”  It is God’s leaving man to himself, as man has chosen.’[2]

 

[1] Alec Motyer, The Prophecy of Isaiah, Inter-Varsity Press, Leicester: England, 1993, p. 263

[2] C.S. Lewis, The Problem of Pain, MacMillan, New York, 1962, p. 28 aangehaal in Millard J. Erickson, Christian Theology, Baker Book House, Grand Rapids: Michigan, 1983, p. 1240